湊客

保守，但怕悶。要粉色，但又要sharp，想簡單，又怕空洞，要鮮色，但不要咁搶，個logo要前衛(不是說了保守嗎？)，又接受不了自己未見過的東西。

以上就是最近一位客人的要求。

幾年前黑人肯定劈炮，幸有渣古老闆一句傍身：「江湖兒女，求財不求氣。」為了半斗米，甚麼氣也消了。

細心一想，此人缺乏美術教育，審美眼光仍然停留在小童水平，只能對最直接的刺激有反應，不懂visualize 或表達自己感受。用美學語言解釋只會雞同鴨講，但言談間估計對方頗為務實，遂從這裡埋手：

「點解有灰色？因為粉色系要襯深色先至顯眼，白色就無咁出喇，唔係我自己口味問題，人眼本身就係咁運作架，有program 可以計出來的。」

「你要轉幾多次色我唔介意，大家都想個design靚，不過我經驗話呢，太sharp 既色會好搶眼，你 d 客第一眼會覺得正，但係睇得耐會好辛苦，唔想留咁耐囉，你都係想佢地睇多d product嘛，係咪？」

「點解第一版咁大幅公仔？好多客，尤其係女人，係以圖像記憶一件事，佢地好多時係靠一種主調顏色或者一兩個公仔去辨認不同品牌架咋！(客人售賣的是女性相關產品)」

(至於個logo呢...其實你揀左最娘果個design，不過算喇)

以 前會忍氣吞聲地不斷做一些mission impossible 的改動，直至EQ bar 爆煲反台，再硬倔要求加錢或唔Q做。現在客氣解釋多幾句，終於說服客人不須再改。記得有一套以interior design為主題，類似the apprentice的真人show，其中一個designer就是衰在不斷嘗試滿足客人所有的改動和要求，最終雙方不歡而散。

很多要求往往出於不安和疑惑，若果能夠解釋設計背後的目標，可以避過很多冤枉路。

黑人不排除有些客人心理有問題，純粹想見到designer很痛苦地改幾轉。亦有些客人本身不是decision maker，為求卸膊(或邀功)作出很多無謂要求。所以一個好的sales的確很重要！R君，謝謝你幫忙擋了不少箭！

小病是福，身在福中，唯福無雙至，所以現在除了病，暫時無乜其他運行。