三月近況

以前做job唔係咁趕，除非某些specific 印刷相關的job必定要上疊之外，一般website 野遲少少，俾人鬧可以灑賴皮，嘻嘻哈講sorry 就過骨，頂多扮下死狗。

宜家好多job都唔得，唔係個客發老脾，而係deadline過左就無得追返。
例如星期一個客要出席某某presentation，你份draft 出唔到就可以收皮。
以前deadline遲左的理由通常都好簡單，就係自己懶 (或者太樂觀)，宜家未必單純係懶唔懶的問題，handle三五單project其中一單有變卦成個schedule就錯晒。

例如客戶A突然話deadline提前，客戶B諗到新idea，客戶C等左好耐好不安，想你「做左幾多都send來睇睇」(其實未做，只係deadline前兩日先得閒開波)。淨係想法子拉鋸、educate個客或者想折衷辦法都花唔少時間精力，試過有一日除左公事MSN同埋傾電話之外，朝早十一點開工去到夜晚七點後先有自己時間做野。

做time management 只係無咁大鑊而已，呢d變卦要爆出黎，一樣會整亂成個安排。你expect個design需時兩日，再估佢會改預多兩日，再預鬆一日突發，結果點呢？個客同你講無五日咁多，後日出個draft啦，要快，收線三分鐘唔夠，另一個客打黎，阿黑人，頭先唔記得同你講...

(你估我唔想請個人幫忙咩，有得揀，邊個唔想做老闆)

*********

近年真係唔可以挨咁多夜，因為挨完夜either 傾電話時唔夠精神，問漏野、答錯野或者應承左唔應該應承既野，或者唔夠ram 去諗d program 或者諗design點樣做，甚至完全無動力開工都唔係未試過。

同埋，就算訓得足，一個人最sharp既時間真係有限，有時一d明明好廢既溝通手續同電話粥，就撞正你最sharp果陣先至殺埋黎。幸好一般人對freelancer都有少少包容，兩點前唔接電話，佢地會以為你做到好夜三點不露 (唔到三點都唔露面)，咁樣先至有早段時間做野。

最福佳既，係你劃左十二點上床訓，但係因為之前兩日通左一次頂，個生理時鐘倒轉左，唔係話訓就訓。

********

菲傭終於返左黎，打掃一輪成間屋係乾淨左既。

話晒，當時我只係做最minimal 既家務，基本的洗衫洗碗，間中加送煮飯，有塵有污糟在所難免。

反而果陣最多做既，係多左行出廳check下阿麻點。

以前有菲傭在佢身邊轉來轉去，就算個菲傭吞pok都好，至少唔駛擔心阿麻有事。菲傭放假果排，真係耐唔耐就走出去望下佢點，無野講都搵一兩句野來講、開多d燈、開電視、倒下抽濕機d水(自從有抽濕機佢d風濕改善80%)、換下佢個暖水袋 etc，因為頭幾日真係試過佢太過悶，個人無乜心情，連血壓都暴跌。

最麻煩係阿麻八十幾歲人又懞唔晒，成日會擔心好多野，五分鐘前講好左無問題，話咁快又驚今日中午餐飯點算、晚飯無買送、隔夜送要快d食埋唔係就變壞、菲傭幾時返 etc，真係要有個人constantly在佢眼前揚來揚去抹抹掃掃，佢先至會安樂。

********

有左今次經驗，我係超佩服果d同我差唔多年紀，但係已經為人父母公私都打點得妥當既人。
果d做足三十個鐘唔訓，補眠幾粒鐘再踩三十個鐘既人，我真係做唔到。
再諗諗下，我自己30歲都開始覺得精力唔夠用，咁果d大我十幾二十年，有老婆仔女兼情婦既人又點挨既呢？照計佢地應該比我更加唔掂，所以要呻又真係輪唔到我，丟那媽，頂硬上囉！

********

最後，誠意推薦「中文解毒」，陳雲著。

睇左一半已經超慚愧，嘩，乜原來我d中文有咁Q多語病 (即使我正正經經寫文時都係)

其次就明白，中國或者沒有輸出革命，沒有輸出貧窮，但肯定輸出大量文字污染，內地的中文隨時差過香港，因為多水份多虛字，仲衰多錢崇洋，唐文英語化。本書個封面係一pack雞蛋，其中一隻個蛋黃有種不正常的紫紅，睇到就會心微笑。

Tribes, Seth Godin著。厄錢，佢講野有少少point既，但查實佢講的東西用一個blog entry就講得完，夾硬拖成一本書，又俾佢厄到。

減壓

懶，無twitter又無plurk：

- 唔算好忙，問題係d deadline經常一齊黎

- 菲傭放大假，三星期。屋企多左個八十幾歲的BB要湊，curious case, indeed

- 第一件事就係全屋無人識得用新果部洗衣機。(以前我在多倫多自住時會買送煮飯洗衣，問題係回港已有幾年無入廚房煮罐頭湯以外的東西，洗衫亦輪唔到我做)

- 第二件事，係菲傭臨走前偷左阿麻銀包d錢，又托詞向幾個家人袋左一個月額外人工

- 第三件事，都係菲傭既，原來佢臨走前幾個月吞pok吞得好緊要，原定每日幫阿麻量血壓，變成每個月量幾次，阿麻年紀大頭腦唔清楚，仲幫佢講好話話菲傭每日都有幫佢量，陣間都要睇下個血壓計點用，另加早一粒降血壓藥，中午還青丹，晚降膽固醇

- 要再商量下點處理個菲傭

- 遊行上左蘋果頭版，正。不過對件事無幫助，普遍的善信將遊行人士label為兩種人a.) 同志或同志之友 b.) 敵基督，under 呢兩個label，基本上講乜班信徒都唔會聽

- 無練過上落斜，昨晚練跑時小腿前方一條肌肉好冤，條氣夠10km，但對腳頂唔到。日後要重新plan過練跑路線，可能要試下搵一次玩柴灣斜

- 要早睡早起湊BB，以後不能再晝伏夜出

生日、話劇和女生們的情人節

今年情人節都算頻撲，首先要為老爸六十大壽張羅禮物，結果買了一尊琉璃工房飛馬雕塑，付款時見到一對小葫蘆花瓶，叫「胡裡胡塗在一起」，感覺頗佳，順便買下送給老爸老媽作為情人節禮物。曾經滄海，空白多年後第二段感情少半點糊塗也不行，福氣。

早上收到Haruka小姐邀請看她的話劇，上次錯過她主演「挪威的森林」，新一套話劇煞科場不俾面，實在說不過去。

劇名叫The Foundling (撫摸)，圍繞一家人發展：父親是個剛失業的banker，每天扮上班，母親是control freak前港女，還有一電車男兒子和傭人，最特別也是由Haruka 飾演的Wendy，自幼被虐待疏忽，被狗養大以為自己是狗，無法說人話或以人類身份過活。

故事的佈局張力很夠，但尾段有點落雨收柴，港女母一直期待在老公的annual dinner威威，結果老公攤牌話自己失業，兩公婆+仔+人/犬攬埋一舊，傭人辭工，完。

總括而言，話劇比起電影有另一種精彩，可能平日少接觸，間中品嚐感覺很新鮮就是。以前朋友是專業話劇團成員，所以順道看了不少話劇，最有趣是風車草劇團的「你咪理，我愛你，死未」，講男親女愛，深入淺出又好笑，其實頗適合情侶一起看。

另一套感覺頗佳的是「薜達與情人」，講一個印度男孩由出家修道變成高僧、又還俗變成富翁，再由富翁變回一無所有自得其樂的故事。

素來不喜歡悲春傷秋的故事，黃家衛式的東西都不對胃口，可能因為主角通常都太過遊手好閒甚至頹廢，身邊已有不少這裡朋友，不須再在電影提醒我多一次，謝謝。

************

女生情人節

幫老爸慶生後連忙趕去塔小姐、E小姐和貝隆小姐的情人節迷你派對。

一面去還一面擔心：死啦，今次會唔會又俾人圍插到hihi，幸好缺乏邪惡A小姐的煽動，加上眾女滿肚壽司刺身，討伐黑人的意欲不高。

三女一男，切蛋糕，勉強吃幾口撐到不行。

大概是女生gossip，化妝品、八卦、感情事。E小姐和塔小姐一身戰衣，分明要在老蘭大殺四方。話到酣處，塔小姐展露白色閃亮絲腿一雙，坐姿尤如年輕版沙朗史東的「本能」，突然嬌嚶：「哎喲不好，勾了個大洞。」

E:「甭擔心，陣間買過對黑色的...拿咁咁咁就會sexy 多d...咁咁咁拉上去會好順滑...對鞋要咁咁咁襯先至靚...」

黑人心想到一個懲罰色魔強姦犯的方法，就是把他雙手縛起然後不斷有stimulus，那種辛苦程度其實不亞女人每月最痛。(幸好黑人的血液忙於胃囊救急，加上不再是十八廿二血氣年華，很快就熬過去了)

說正經點的，頗感覺到身邊男女生的角色在倒轉，女生越來越粗豪 (當然會化妝漂亮漂亮啦)，男的越來越細膩敏感猶豫，阿塔小姐就是那種勇往直前外向陽剛的錯體女孩，如果她生為男身，大概會變成另一個萬人迷男blogger吧？

E小姐也是爽直豪快之人，可能工作有關，稍為拖泥帶水的人或事會被她屌死。雖然未曾在公事往來，信我，你不會想跟E小姐交手來硬的。

說話(相對)較少的貝隆小姐，溫文爾雅端莊可人，原來是個籃球健將！黑人一直不知道學校和國家隊以外，真的會有香港女生打籃球的！(汗)

其實也很難想像，三位女中豪傑的華倫坦甚至丈夫是甚麼樣子。

吹水到夜深，E和塔小姐繼續LKF尋歡，貝隆小姐要養精蓄銳明日決戰，黑人肚滿腸肥兼被美色折磨亟須出火，是以當晚隻紅渣古，槍法特別勁。

機友們盡皆被嚇親：「鬍鬚佬，你今晚食左藥呀？」

註：各位blog友不用羨慕黑人了，有得睇無得食是餓鬼地獄的現世版，羨慕那些有得攬攬錫錫收花收名貴手袋喪食豪飲爆房過夜直落的情侶吧！

一個男人

最近有富豪將八成身家分給另一半，令人又敬又恨，敬佩富豪的眼光膽色，又恨不得自己是故事的女主角。

黑人都認識一位將十成身家分給另一半的人，就是家父。

盤古初開時，黑人尚在幼蟲期，黑人母決定離婚了，離開前閃電提走了聯名戶口所有錢。(正式辦理離婚手續則留待許多年後才成事)

黑人爸孑然一身當上帶子雄狼返回娘家，身無分文百廢待舉，古時候香港人很喜歡DIY，家中的床、書櫃、衣櫃甚至入牆櫃全是黑人爸親手傑作。印象中小時候跟黑人爸到五金舖和木材舖，黑人負責拿兩小袋螺絲鉸鍊，黑人爸則抬著大塊大塊的木板回家，有時整個周末就見到他在後巷鋸板、打釘或髹油漆。

當時黑人爸工作的公司需要懂英語的人替洋人上司辦事。黑人爸只有初中程度，頂硬上惡補，有時見他累極睡著了還是喃喃唸著英文。

黑人小時候有眼疾，在校被同學當成怪獸圍毆，在家性格孤僻乖戾，再加上哮喘多病，非常難湊，當時黑人爸工餘可謂無微不至，買課外讀物、落街看巴士...當年電視還未播Z Gundam，小黑人只因在模型舖見到「鐵甲人」好想買(印象中那是Mk II 1:144模型)，立刻就買回家，而且連雙星的專用模型油漆1x元也買回來(當年一支阿波羅雪條售價1元)，兩父子動手塗塗砌砌，黑人年幼橫蠻，見到老爸塗出界還要么一句：「粗手粗腳油得咁核突架...」

(現在想，如果我個仔咁對我講野，我忍唔忍到唔斬開佢幾碌呢？)

黑人每晚做完功課玩累睡覺了，老爸案頭的燈還在亮：新案子需要兼顧市場策劃，只好拿著字典捧著筆記惡補 Philip Kotler的principles of marketing (初中程度看，會不會吃力了點？)。第二朝清早還得叫醒黑人起床梳洗，梳洗完了，飯桌已放著嘉頓忌廉包和鮮奶還有午飯的保溫瓶，忙了一整個早上將黑人送上校車後，回到家才開始忙自己穿西裝趕上班，所謂父兼母職就是這樣了。

真正啟蒙黑人英語不是甚麼乜sir物sir，是Dungeons & Dragons。當年在勝利道戰棋研究中心黑人爸買了第一盒「魔域奇遇」回家，他親自當了幾次主持(相信沒有太多父親會這樣做)，之後公事太忙要經常出差，黑人唯有自己當主持，上癮後開始尋找更多英文說明書跟朋友玩。幾年後留學遇到摩門教的傳教士，對方問：「Pung yau 你知不知甚麼是resurrection?」「我知，cleric level 7 復活咒丫嘛。」「......」

提起黑人媽，印象已十分蒙糊，只記得小時候她間中還會接黑人出街玩，後來越來越少見面，一年才見一次，甚至兩三年才見，最後一次是留學前辦理離婚手續和授權書才有緣碰頭，那是十多年前的事了。

黑人父母儘量將上一代的恩怨隔走，從未在黑人前批評對方一句，甚至好像從沒有發生任何事一樣。關於黑人媽閃電提錢鬆人的事，也只是某次黑人太過反叛，祖母嚴斥後，力陳黑人爸茹苦種種時略為提及。

黑人爸自己從來不會將公事帶回家，亦甚少提及自己的感受。他工作上的表現全都是同事或舊部旁聽而來，大意不外乎：「你老豆好醒，佢好鬼錫你，你生性d喇...」

留學時某次長途電話，黑人爸當時輕描淡寫地說：「上星期四個腦開刀，後腦切了一粒瘤，宜家要背脊向天訓...」以他絕少報憂的性格，自是大為驚險才禁不住事後淡淡一句，後來幾年公司經歷數次大裁員瘦身，每次死過翻生他都只會在茶樓輕描淡寫，年少時黑人覺得為父就應該要這樣，直至後來自己出來做事，哎也原來小小一條死線都咁難頂，老爸一直以來到底背負了多少我不知道的重擔呢？

老豆，你為頭家為個仔守寡二十幾年，係時候享下福俾d時間俾自己喇，我會生性，多謝你！

(各位留言的朋友，唔該俾d掌聲俾我老豆--百份百24孝真男人！)