星期日, 12月 01, 2013

追男仔必敗秘笈





朋友提起想在佳節前識男仔,問睇邊套戲適合,其實以睇戲作為起手式是很差的,因為個場所根本唔容易傾計,隨時俾其他朋友隔開左,就連樣都見唔到,戲院黑媽媽,有其他適合的事可做,但首次見面和破冰並不在此列。

見過兩個女追男的失敗例子,第一個係首次見面即揀浪漫燭光餐廳,那是TVB用來偷懶的美指手法,現實個男仔見到咁大排場,會周身唔聚財,乜情調都無。另一個是女仔講自己有幾叻,我有次見到鄰桌一中女,姣到空氣中也感受到佢的相對濕度,但佢不斷講炒樓炒倫敦金,誤以為咁樣會impress 對面的男人,結果對面用返finance consultant 的專業口吻對答,本來應該充往別處的血,都流返晒上頭,變得好似返工咁。

以上近乎必敗的手法,無謂試了。

查實天口冷,打邊爐或者日式烤肉是很適合的,因為可以合理地食好耐,好多機會傾計,亦都可以不著跡地叫酒飲,三杯下肚,大家講野都放鬆d ,仲有打完邊爐,興起可以轉場,無計傾亦可以體面地收檔,進可攻退可守,格調好些可以去shabu shabu 叫幾杯暖清酒,好快上頭。想穩陣可以去意粉屋吃芝士火鍋,荷包損失有限,亦不算太失禮,重點是準備好話題,祝朋友捕鳥成功。