星期六, 3月 28, 2009

惡魔

以前常看B級恐怖片,最喜歡是Wishmaster, Warlock 和Hellraiser 系列,因為電影中大魔頭擅於引誘人類墜落,尤其Wishmaster的燈魔神喜歡誘人許願,再把願望扭曲實現。某次他偶遇匪徒中槍倒地,前無去路後有追兵,燈魔神問匪徒有何感想?答:I wish I have never been born! 結果匪徒的身體就不斷縮小,最後變成一條看不見的精蟲 *pop* 收皮。

最可怕的惡魔往往一邊加害,同時將受害人最陰暗面揭露無遺,令受害人感到絕望完全屈服。例如將品學俱優的主角禁錮一室,再把眼前布幕一掀!原來是面照妖鏡,鏡中主角淫亂貪婪又暴戾,主角禁受不起,哭著說:「這不是我...我不要看不要看...」「哦,好吧。」於是主角眼珠就熔掉了,完。

惡魔只是將主角的「超我」(super-ego)剔除,展示剩下本能和慾望的人如何行事而已。想深一層不太可怕,人性本惡,見怪不怪了。

現實中,假如你發現自己原來是個小氣、懦弱、表面君子內裡奸險的人又如何呢?

金無足赤,人無完人,每人個性總有一丁半點除不掉的暗陰面,荷里活電影告訴我們人性缺點可以改變。個人經驗是性格缺陷正如身高體格,改無可改。是以擅於內耗的中國人才會有「江山易改,本性難易」這句諺語,十年間可以數易旗幟,人性如故。

到底能否「改掉」不好的性格?例如小氣,黑人就不知從何改起,有人說登高,有說遠足,實際成效存疑,改善肺活量倒不錯。

人比較容易接受看得見的先天體格局限,對於看不見的東西如性格,就誤以為可以改變。較實際的做法是暸解自己性格上的弱點,取長避短。例如身高不過五呎七的NBA球員不可能「改善」身高,只能接受現實,改變打法和崗位。天性懶惰的人,最好將自己放在一個有人督促的環境(或者不用努力都有錢收的環境)。愛口舌是非者,不妨每次講某人的八卦時,幻想當事人就站在你面前,後果會如何。

喜歡Fight Quest,並非因為好勇鬥狠。最精彩是兩位主持探索自己的長處短處,以有限條件對抗更有經驗更強的對手。他們可合理地抱怨自己不夠高不夠大隻或不夠時間訓練等等,但他們寧願著手make the most out of the situation。近期黑人遇上連串困境,均以此心態自處。

記得某前輩看過黑人的八字後說:「了解自己的缺點,不要被缺點主宰你。」八字信不信由你,金石良言倒不能錯過。

星期四, 3月 26, 2009

心情差的時候



通常會聽這首,喜歡的音樂通常都沒有人唱,只能哼出來,所以很少去唱k。
這首OST旋律其實很簡單不斷重複,卻好像道盡人生悲歡離合生老病死。回想起第一代教父年輕時活在谷底中的谷底,沒有「咬著牙齦」拼搏,每逢不幸只是拍拍身上塵土,隨著華爾茲的節奏爬起來繼續慢慢走。

星期三, 3月 25, 2009

女人性格

最近接一單案子,網站製作,急趕。客戶是個典型女人性格的女人,擅於感性溝通,不擅理性邏輯思考。

因為事前規劃欠佳,網站的內容都是斷截禾蟲地一丁半點擠出來,很多時做好了轉頭又要改,死線不變。

最麻煩就是客人心血來潮,突然想起就拋個request出來,然後問你幾時有。

辛苦計出一個時間,她又討價還價「星期五太遲,黎啦幫幫忙星期三啦」「星期三前真係做唔切喎」「但係我星期三一定要出到街...幫幫忙啦」,總之玩了一輪word games,最後「咁我星期三等你喇喎」,despite the fact 我個答案係「做到幾多得幾多,做唔晒唔關我事。」

如是者交鋒一兩次,很快就摸到個pattern。原來客人需要一個口頭承諾,有承諾就有安全感,有安全感不管現實能否起貨都不要緊,deadline時就會十萬個電話打來問責 「又話星期三有既?仲有,你上次應承我有Q,點解無?」(Q是任何黑人從未聽過的requests)

長久不是辦法,其他客人的project schedule 亦全被打亂,再加上通了幾晚頂,生活節奏亂籠。於是不再輕易接她的電話,始終打舌戰不是我強項,就算給你辯到deadline提前至星期三又如何?處理technical issues的人是我,現實是星期三不行就是不行,program不能分段上,未寫好就跑不動,跑不動就無野睇,一字咁淺。

不通電話,就變成msn chat攻勢,結果淨係msn 拉鋸都可以無左整個上午。終於要「向無理要求說不」,請對方將所有requests 用email 白紙黑字寫清楚,因為她們(連同老闆)的想法天馬行空,突然就有新點子,隨口說說就要你點石成金paste字成site 幫幫手唔該啦黎啦。吾生有也涯,以有涯隨無涯,蝕入肉矣。

然後客戶老闆寫email和打電話來發脾氣,黑人絕少在公事上發沒有作用的脾氣,亦相信多數的生意人也是如此,誰知客人女老細的來電都無甚建設性,講完一輪前因後果心理背景深情分享,next step就係「你快d覆返個期俾我。」至於「期」是甚麼,整個website還有甚麼outstanding tasks 就隻字不提(主動問都依然同你分享心路歷程),來電目的純粹是表達她憤怒無助的感覺,我明,theropy session丫嘛。

故事發展是loop回文章的第三段「d字可唔可以放大d...改顏色,幫幫手啦...幾時有丫唔該?」

報酬丟那媽,計劃亂如麻。割蓆止蝕,怒出invoice,附加一句:再改,事無大小,逐次收費。

(又,坦白講,我非常明白點解佢地以前次次同freelancer合作做website都被人甩底或者反面。)

星期四, 3月 19, 2009

港男回應和新文一碟上

晚上跟兩位朋友再深入詳談「港男」和「電車男」的分別,稍為理清一下思路,也難怪製作人無法將港男定位,因為真正的港男,是一個全無內涵的黑洞。而電車男,在他專長的範圍內,是有執著有堅持的,例如某些喜歡武術的電車男(舊稱「武痴」),社交場合上跟港男沒有分別,但一講到武術就脫胎換骨,而且勉強都算打得下。

真正的港男完全沒內涵、無個性、沒passion。外觀跟普通上班族無異,不似電車男般有跡可尋,而且不一定單身甚至有能力獨立。

某次黑人在中環食肆遇到一對上班族情侶撐台腳,因為無所事事,食肆人少又無音樂,被逼旁聽他們的對答。

男:「今日我在公司呢...換左desktop個wallpaper。」

女:「(黑人聽不到)...」

男:「我銀包呢張十蚊紙呢...全新架。」

黑人當時非常好奇,為何電腦換了wallpaper都可以講一番呢?又不見得wallpaper有甚麼特別,講完就switch去全新十蚊紙等不對題的東西,只有枯燥至極的人才會這般對答吧?

例子二,就是朋友某位舊同事,sales,常揚言要轉工卻永轉不成。理由近乎「春天不是讀書天,夏日炎炎正好眠」之類,每年出花紅都會去東京,但每次去東京都只會去同一處地方用同一個姿勢拍照,如果不看照片的time stamp,是看不出任何分別的。朋友講完這個人辦的故事後,覺得此人的一生有如啟動了的for loop script。

如果說甚麼是港男,我認為上述兩種人辦就是。至於其他縮骨、孤寒、網上凶狠真人懞撚之類的,是枝節。

電車男在社交場合敗陣,是碰不對話題。港男在社交場合盡墨,死因是完全沒有話題。

*************

Peter 這類毒電車男並非無藥可救,但亦非尋常藥方可解。

他的情況就有如一個五百磅的超胖病者,被自己的體重鎖在床上,雖然知出事,但無法靠自力脫困。旁人說「你做運動啦」根本就有心無力。

過重胖者要回復正常生活,需專人長期輔導:先練習水中步行,再配合特製藥方和餐單慢慢減磅,能正常行動時才可以靠運動減肥。不知情者還以為胖者不做運動是懶,然後搬自己的練習奮鬥史作激勵,風涼話矣。

電車男也是一樣,沒有處世能力、不擅社交、衣著乏味等,全都需專人從旁「大執」。絕大多數不能單靠自力擺脫困局。就算知書識禮、外觀尚可性格良好的電車男,如果沒有人幫忙打通任督也徒然,朋友經驗之談亦証實這一點。

電車男配電車女(乾物女或腐女)行不行呢?Sorry,兩個社群有不同的focus和insider lingo,可以南轅北轍,牛頭不搭馬嘴,做朋友可以,做情侶卻難。

*************

加拿大的一套,放在香港行不通,反之亦然。

首先加拿大的稅制根本就不鼓勵你多勞多得,勞到咁上下好停手了,否則就要交重稅、支付高昂OT薪水,米搞兄所言不虛,加國一些低學歷的通渠佬人工隨時比設計學院榮譽學士生更高。

離加已久,只能憑印象分析。記憶中,加拿大人對生活質素的追求,並無香港人般嚴重。至少通渠佬、OL和高級經理都會在同一個mall買麵包,基本生活質素大家相差不遠,當全家每個人都有自己房間時,房子再大換來的滿足感卻會大幅遞減,加拿大的富人跟窮人差異很小,不似香港的偽中產般有很多變態的言行舉止。

加國是很適合養老的地方,國際層面上競爭力卻很低,認識不少加國人以港人準標衡量,均屬薯頭薯腦,遲鈍又蛇gwe。加拿大人罷工的理由,落在香港肯定俾人屌爆 「唔L係呀?咁都算剝削你?」

胡亂寫了一堆,勉強總括為:貧富差距小,人心境平和,自然較易相處也較易求偶(自信低的港男和公主病港女會大幅減少),在香港貧富差距大晉升慢的地方,港男女是社會問題的副產品。當香港只有一個Peter,是他抵死,一大群人都像Peter,就是政府和父母抵打。

星期三, 3月 18, 2009

我不是假電車男

剛剛睇左星期日檔案關於港男部份,比較有感觸既係...

原來我係識Peter架!

雖然都係今日先至知佢真名,Gundam DX入面我地已經夾左好多次。佢自稱沉默寡言,實情係非常之多野講,每場輸贏都唔會靜落黎:「哈哈哈頭先二連左隻老虎,跟住再追多一set格鬥,哈哈哈贏得幾險呀!」「哈哈哈!你隻紅渣跌得太近敵人,我部高達已經盡晒力走黎救你都死左呀哈哈哈...」

唔少網友comment話Peter講野好煩,有時都幾覺,尤其贏得太順時唔想高調廿文廿武,見佢比手劃腳興高采烈,只好敷衍幾句。不過,佢算係易夾,機品頗佳。

打Gundam DX差不多七年,粗粗地可以講閱人無數。一個人機品如何,多少反映佢人品如何。

識Peter咁耐,未見佢輸到發脾氣,劣勢都會盡力打,反而有些不太電車的朋友,連輸兩三場就會怨個partner打得差、賴手掣唔得、賴對手打得狗、拍掣、唔認輸等乜都有。

Peter衰在唔識睇人眉頭眼額,少少語障加上學歷低,在香港社會可以講死左九成。

我睇返自己寫的幾篇電車男tips,幾乎無野可以幫到佢。

如果Peter要變成marketable既港男,首先要大幅改善自己的說話技巧,唔好話呢d course好貴,就算有錢都唔知去邊度搵。其次,要轉份至少高一倍薪水的工作,現在時勢是mission impossible (中五學歷),再其次,要完全改變社交圈子,改為去蒲pub落D,或者上網搵孤男寡女/social gathering。因為佢現在蒲的地方完全不會有單身女子,至少不會有單身女仔玩Gundam DX,落場打果兩三個女仔,身邊都有個男partner。

Peter哥除左進修搵好工之外,為求談吐有趣有內涵,少不免要惡補文史哲時事經濟藝術,最好去外國旅遊見識。咁改造法,等於挖晒佢心肝脾肺腎再起骨,然後塞返隻terminator機械人入去,除左層皮無變之外,其餘全部換晒唔係果回事,唔可以再叫佢做Peter了,咁易變咩?

好些不以為然,認為電車男「懶」,自以為靠拼搏上到位的成功人士,唔該認真檢討自己有幾多靠家底,有幾多靠僥倖,又有幾多靠天份,減走呢幾浸之後先好講成功係靠自己努力 (換言之,一個無乜天份、家貧,機遇平平的人單靠努力能否有相近的成就)

電車男毒男似乎是香港和日本獨有,印象中加拿大低收入人仕都不會像「港男」般被標籤歧視。確實有一班男人比較geeky/nerdy,但係衰衰地總會搵返個女仔做老婆。

加拿大讀書不成好小事,男仔high school畢業做超市收銀不怕無錢養女朋友。老來發奮三十幾歲先至再讀collage(甚至再讀high school)都無乜大問題,英文有口音無問題,唔似香港地有港音英語會被香港人歧視 (鬼佬查實唔介意的)。加國人高學歷甚少歧視低學歷,稅收雖重,大家平平穩穩夠交租夠兩餐就算,好少學香港咁十年搵一世人既錢為求買個的式豪庭單位。加國人社會和諧係做出來,唔係靠領導講既。

香港地CE / A level衰左基本上呢世人可以收皮,例如Peter個case我就唔覺佢有咩可以「進修」,隨時讀餐死都無用俾學店白賺學費。算你好彩讀得成,除非天資異稟,否則一把年紀普通成績畢業,有幾多老細會請?

再講,世上永遠某個百份比的人不適合讀書,英殖年代講fair play,盡可能令每種人都有均等晉升機會,讀書差的慢慢都有辦法賺到錢,間接令港男女求偶的機會相對公平。現時政策向金融業傾斜,適逢市場趨勢,溝通能力較佳的女性無疑佔優。遲熟又不擅辭令的港男一旦上唔到位,真係無乜機會翻身。

姑且不提Peter這類extreme case,黑人曾上過國語和日語班,男人掌握國語的捲舌、日語拗音如tsu, kyo, gyo甚至英語的children(不少港人讀成「超鈍」)等非常吃力,性別差異非常明顯,職業無分性向或者得,無分性別就難d。

社會發展單一畸型,才造成現在男女供求失衡的情況。這是人口政策和社會資源分配問題,並非指摘「男人不發奮讀書」就可以解決。換過來,假如社會以體力勞動主導,指摘女人「唔練大隻d」同樣不合理,有遠見的政府自應處理這種社會不公平現象,當然,那絕不是我們熟悉的香港政府。

以前我最討厭人地講風涼話指指點點,想不到今次港男女成了幫凶之一,慚愧。
(Peter哥,下次機舖見!)

星期二, 3月 17, 2009

甚麼叫超忙

早一陣迷上一隻免費的online flash game,打喪屍,故事設定在一個喪屍瘟疫後的世界,大家要設法找糧食、找武器、藥物去生存,城市的人類聚居在最後一個outpost,大街以至建築物都不安全,即使回到據點,喪屍亦不時蜂湧而至,認真刺激。

Dead Frontier

以前口中一直喊忙呀忙,仍然可以煲完一套prison break,現在連玩online game的時間都無,唯有張貼連結為害各位網友。據聞遊戲全部由一個人獨力完成,不知日後如何維皮?

Trailer

星期三, 3月 11, 2009

悶死港男女

近幾日大家爭相轉載星期檔案,印象中約年多前已看過這段片,old news is so exciting!

曾遇過一個有公主病的港女,話說黑人某次寂寞難耐,約左個新識的網友出黎睇戲。

黑人山長水遠趕去買票、付票錢、請吃飯她還要遲到早走,完全沒有意思講句多謝或對不起,莫說甚麼紳士淑女風度,普通朋友基本社交禮儀都欠奉。

整晚飯局上就是聽她講自己的乜乜物物,好像全世界唯一有討論價值的話題就是她的人生,而且不管有無興趣都要聽。

不打緊,列入黑名單,早早止蝕離場好了,拯救公主此等壯舉還是留給皇子做吧!

朋友E闖浪江湖,跟無數臭四公主交過手(甚至可能交過腿),聽黑人火滾呻完只是一笑:「嘿,大把啦呢類人,總有傻仔鍾意貼錢買難受,無market佢地就唔會惡得出樣。」

收到,傻仔丫嘛。

************

某次同鄉阿塔從剛果訪港,飯局聚會時不慎聽到鄰座兩位宅男對話,頗有感觸。

宅男們其貌不揚,大概是冷氣褸或運動裝之類的衣著,鬧市高空丟個鏹水彈落街,隨時擲中四五十個這類的男人。

兩位宅男開著notebook傾談良久,講的都是工程或programming的技術東西。講夠技術野,大家想social幾句,但實在太悶又無話題,唯有草草熄機閃人。

當時黑人心中醞釀著一個問題,見近日又重提港男女,也就寫寫思考一下:「上述兩位宅男,咪話溝女,識普通朋友都死喎,點搞?」

黑人深明同一套功夫不可能人人合用,也儘管寫寫自己想法。

1. 宜:講八卦youtube短片,例如機場阿嬸、明愛小童群揪會等等,大家都有睇過,或者未睇都會追返的無聊東西。

2. 忌:講專門術語,例如「派膠」、「女體化」、「女僕控」之類需要較專門背景才聽得懂的詞彙。

3. 宜:講電影、電視劇或漫畫。通常電影的觀眾最多,電視劇次之,漫畫又其再次。總之找一些大家共同經歷過或感興趣的話題講,百搭是星相命理玄幻鬼怪宗教,總會中一項。

4. 忌:跳step講野,即是假設對方已完全明白對話的背景和前設,一般在動漫電玩(ACG)宅族比較嚴重,ACG宅男們可以突然講某本漫畫第20期某情節很好笑。假如你未看過這20期漫畫是完全無法溝通的。這亦可解釋為何ACG宅族在一般社交場合跟其他人的兼容性較低。

5. 宜:用貼近生活的方法講解技術性的東西,有時總無可避免要解釋自己的工作。記得朋友的工作是「優化人工智能編程」(ai optimization?),當時他問黑人懂不懂perl、OOP等基本常識(用以判斷講多少給黑人聽),自問略懂皮毛中的皮毛,聽了一會,大概可以超粗略地解釋為「假如桌面有杯咖啡,我想指示電腦去『飲咖啡』,我的工作就是教曉電腦自行判斷到底伸個頭埋去飲、伸手拿起個杯飲、還是用飲筒飲比較有效率。」

對一般layman來說,上述解釋應該足以令他們清楚明白閣下的工作,再加以十二分欽佩。謙虛點的,可以補充:「現在的電腦連『飲』和『咖啡』都未懂,單這一環就要十年,我希望有生之年會有丁點成果啦!」

(某失控中女:「嘩!好叻啊!田田!田田!」)

6. 忌:怕羞。極真流空手道注重挨打抗擊訓練,用意消除人害怕挨打的本能:實戰中不怕死爛命一條的人最可怕。

同樣,社交場合一般人最怕就是出醜,假如細心思考出醜的後果,又可能沒有想象般嚴重:講了個爛gag無人接被人反反白眼而已。以前黑人很怕被人笑被傳通街。但實情是,你有幾把炮?值得人地日提夜提記住你?面皮厚不是無敵,但絕對會佔優。最壞的下場是被對方不點名在blog講下你,邊個知?甚至有時被人唱都不一定是壞事,例如葉一知在節目中提及的$63.8事件,大家就同情被唱那一位。

7. 宜:基本儀容。黑人很遲才知道這一點重要,識著衫絕對有優勢,如不懂搭配衣裝,基本無穿無爛已ok,其次是無頭皮口氣體味等非常基本的衛生儀容。

8. 宜:活躍,主動撩女仔。所謂「男人不壞女人不愛」也。香港才子蕭若元解釋這句話背後有遺傳學的大智慧:壞男人四處留種,較易延續基因,生出來的下一代亦會遺傳到同樣的性格。可是現代社會男女需合力經營家庭,所以女人又希望拍拖或結婚後壞男人「從良」。非常矛盾,歷來亦有不少女人屢戰屢敗。

蕭才子又謂,大多數女人雖然根據這套遺傳智慧擇偶,但本身並不知情,口中說想找個好男人(後天理性需要),轉眼又重投壞男人懷抱(遺傳上的本能)。

所以,一般好仔宅男不須花氣力將自己完全改造成壞男人,只須瞞過這套篩選機制,得米後回復本性便可。(到時女朋友呻你悶又點?賺左啦已經。)

9. 宜:較長遠的,最好梗係有返d興趣,試下聽不同的音樂、書籍、電影等等。香港人工作效率第一,生活情趣是世界倒數頭幾位,因為香港人情感相當平板,看看日常形容心情的詞彙可知一二:「勁搞笑」,「灰到爆」。

10. 宜:建立自信。最直接的方法是高收入,但大多數人都難以憑這個法子增強自信。另一個辦法是靚仔,都不是人人做得到。最後人人可做的方法是做些令自己有成就感的事,最好當然是做運動,常做運動體能又較好的人肢體語言跟普通人有明顯分別(長年練功夫就更加覺)。打機叻或者砌電路板好勁都得,但係較少人欣賞囉。

舊文: 電車男派對求生指南

星期一, 3月 09, 2009

三月近況

以前做job唔係咁趕,除非某些specific 印刷相關的job必定要上疊之外,一般website 野遲少少,俾人鬧可以灑賴皮,嘻嘻哈講sorry 就過骨,頂多扮下死狗。

宜家好多job都唔得,唔係個客發老脾,而係deadline過左就無得追返。
例如星期一個客要出席某某presentation,你份draft 出唔到就可以收皮。
以前deadline遲左的理由通常都好簡單,就係自己懶 (或者太樂觀),宜家未必單純係懶唔懶的問題,handle三五單project其中一單有變卦成個schedule就錯晒。

例如客戶A突然話deadline提前,客戶B諗到新idea,客戶C等左好耐好不安,想你「做左幾多都send來睇睇」(其實未做,只係deadline前兩日先得閒開波)。淨係想法子拉鋸、educate個客或者想折衷辦法都花唔少時間精力,試過有一日除左公事MSN同埋傾電話之外,朝早十一點開工去到夜晚七點後先有自己時間做野。

做time management 只係無咁大鑊而已,呢d變卦要爆出黎,一樣會整亂成個安排。你expect個design需時兩日,再估佢會改預多兩日,再預鬆一日突發,結果點呢?個客同你講無五日咁多,後日出個draft啦,要快,收線三分鐘唔夠,另一個客打黎,阿黑人,頭先唔記得同你講...

(你估我唔想請個人幫忙咩,有得揀,邊個唔想做老闆)

*********

近年真係唔可以挨咁多夜,因為挨完夜either 傾電話時唔夠精神,問漏野、答錯野或者應承左唔應該應承既野,或者唔夠ram 去諗d program 或者諗design點樣做,甚至完全無動力開工都唔係未試過。

同埋,就算訓得足,一個人最sharp既時間真係有限,有時一d明明好廢既溝通手續同電話粥,就撞正你最sharp果陣先至殺埋黎。幸好一般人對freelancer都有少少包容,兩點前唔接電話,佢地會以為你做到好夜三點不露 (唔到三點都唔露面),咁樣先至有早段時間做野。

最福佳既,係你劃左十二點上床訓,但係因為之前兩日通左一次頂,個生理時鐘倒轉左,唔係話訓就訓。

********

菲傭終於返左黎,打掃一輪成間屋係乾淨左既。

話晒,當時我只係做最minimal 既家務,基本的洗衫洗碗,間中加送煮飯,有塵有污糟在所難免。

反而果陣最多做既,係多左行出廳check下阿麻點。

以前有菲傭在佢身邊轉來轉去,就算個菲傭吞pok都好,至少唔駛擔心阿麻有事。菲傭放假果排,真係耐唔耐就走出去望下佢點,無野講都搵一兩句野來講、開多d燈、開電視、倒下抽濕機d水(自從有抽濕機佢d風濕改善80%)、換下佢個暖水袋 etc,因為頭幾日真係試過佢太過悶,個人無乜心情,連血壓都暴跌。

最麻煩係阿麻八十幾歲人又懞唔晒,成日會擔心好多野,五分鐘前講好左無問題,話咁快又驚今日中午餐飯點算、晚飯無買送、隔夜送要快d食埋唔係就變壞、菲傭幾時返 etc,真係要有個人constantly在佢眼前揚來揚去抹抹掃掃,佢先至會安樂。

********

有左今次經驗,我係超佩服果d同我差唔多年紀,但係已經為人父母公私都打點得妥當既人。
果d做足三十個鐘唔訓,補眠幾粒鐘再踩三十個鐘既人,我真係做唔到。
再諗諗下,我自己30歲都開始覺得精力唔夠用,咁果d大我十幾二十年,有老婆仔女兼情婦既人又點挨既呢?照計佢地應該比我更加唔掂,所以要呻又真係輪唔到我,丟那媽,頂硬上囉!

********

最後,誠意推薦「中文解毒」,陳雲著。

睇左一半已經超慚愧,嘩,乜原來我d中文有咁Q多語病 (即使我正正經經寫文時都係)

其次就明白,中國或者沒有輸出革命,沒有輸出貧窮,但肯定輸出大量文字污染,內地的中文隨時差過香港,因為多水份多虛字,仲衰多錢崇洋,唐文英語化。本書個封面係一pack雞蛋,其中一隻個蛋黃有種不正常的紫紅,睇到就會心微笑。

Tribes, Seth Godin著。厄錢,佢講野有少少point既,但查實佢講的東西用一個blog entry就講得完,夾硬拖成一本書,又俾佢厄到。

Dark Machine



有很多東西想寫,但工作纏身,就算有空檔都沒心情。通常會聽trance令自己集中點,最常聽的是Dark Machine,電影 Swordfish 的OST。居然給我找到電影中原來的出處。

短片下半段是型男hacker Stan 俾人吹簫同時60秒內破解美國國防部電腦的片段 (Hugh Jackman 飾,也就是X men電影中的狼人)

60秒?誇左d喎...雖然可以顯示Stan係一個好堅既hacker,不過同時令人覺得國防部超兒嬉。

星期三, 3月 04, 2009

通常d屎都係一齊黎

Web

回應米搞

我姿整d,用左20min

大陸就是平宜

暫時還可成立。

最近客戶選擇外判一些工作給較平宜的內地創作人,客戶出價是香港的1/3左右,但對方嫌出價低,估計他們心中的理想價是香港價的1/2左右。可是,扣除人民幣匯價,還有遙距溝通管理或往返內地的費用,實情是聘用內地的talent已不一定比香港平宜,至少成本效益如是。

國內有一位頗出名的programmer甚至堅持收香港價,他說辦得到的事,從無失拖。
認識幾位辦設計公司的朋友,跟他合作過後都說他很可靠,然後轉過身紛紛吐舌頭說貴貴貴。
香港的programmer或許能力不及,但收費只是1/2甚至1/3左右,不過就有點甩漏需要經常manage,有辣有唔辣。

無論如何,Gundam annual日本原版賣298,版權共享國產貨質素相近,售價68元正。
所以習大人說中國沒有輸出貧窮,那是戲言了。

題外話,假如他當了總理,廣東話變成「習總」,真慘。