星期三, 4月 30, 2008

攝位寫野

一程車睇完「四代香港人」,雖則30蚊平過一碗四送車仔麵,依然呻笨。

可能係側田之前summarize得太好,所以即使黑人未睇,都已經知到大約六七成內容,自己篇第四代黑人9up一番都扑中八成。佢個書名,換為「四代香港人:第二代香港人懺悔錄」會比較貼切。

呂大樂坦言第二代人愛指點江山扮全世界代表,中point,如現實許可,呢本書佢應該搵人co-write,因為第三代及打後都十分含糊,幾乎全部都係佢以第二代人的視點看世界。

「早上3小時完成一天工作」,福田忠昭著,好書。

早餐加一程車睇左八十幾頁,如果閣下未睇過Steven Covey 的7 habits of highly effective people 又怕雞腸,可以選擇呢本,講的東西用詞字不同,但原則相近。當然Covey 的著作比較全面,黑人會選7 habits 為「十大改變一生的書」其中一本,不要期望睇完就識變身,改變係持續而細微的過程。睇完,就會知道自己浪費左幾多時間。

「潮爆中國」睇左幾十頁,都係好野。

想了解中國國情,不一定要去政治經濟那個書架埋手。睇呢本都可以,而且最適合治療「大香港」心理病,黑人為病患之一,睇完舒服好多。

排版水平頗高,全彩,feature的照片有不少大師之作,如講述內地爛尾樓一文,就有幾張「又一山人」的照片,可能熟人拍膊頭個royalty deal 到好平,否則都唔知佢點維皮 (仲有好死多張相喎,全部都係自己影?),天窗出版d書本本都咁重皮,真係驚佢突然結業。

洩洪完畢,繼續工作。

星期二, 4月 29, 2008

graphic人怪論

未來還會做超多admin work,想起都累。

今日在又一城開會,趁有時間逛page one,又應了破財劫:分拆方卓如、遺物整理商看見了(這是唯一一本阮子健年代介紹的打書釘)、早上3小時完成一天工作(黑人現在最需要這個)

開會後跟一位flex 高人交流,黑人立心不良,想旁敲側擊打探adobe vs M$ web app 的發展,從而估計ADBE是否值得長渣。

高:「Silverlight都唔係寫俾人用的,一個text field連框帶字隨時要寫一大段code,根本唔會有人用,就算你日後寫個drag & drop SDK俾我又點,我總有需要customize的時候,到時咪又要自己寫...」

Good, 即係初步證明adobe是買得過的,不過唔多放心,繼續問。

黑:「咁你覺得M$ 敵意收購左Yahoo之後會如何?」

高:「拿,收購左就有影響喇,yahoo 本來行好多flex support,如果M$敵意收購左佢,好可能會逼yahoo用好多silverlight,到時銀光四射,眼都花,不過好難咬得入adobe啦,舊時M$用active X 搞Sun Java都唔成功,人地定位已經好堅挺,宜家adobe都一樣,遲下就算你想寫野搶adobe 個market share,都要用返flex 或者thermal,大魔頭係佢,賣武器俾你打魔頭的都係佢。」

高:「話實adobe 網絡版 office的日子不遠啦,宜家adobe都有個網上版的Word 叫 buzzword,係差在未support中文,英文版已經同word差唔多,幾好用。」

黑:「之前被傳媒吹捧果個才子企業 online版Excel Editgrid 呢?」

高:「等執笠啦,宜家仲行ajax...」

高:「你炒股既呢,六月adobe應該會升喇,到時出thermal,應該會好hit。」

(呢一點黑人查實有保留,因為thermal已經傳左好耐,個市應該消化左呢個消息,但不影響長渣的考慮。)

********

好,萬事俱備,只欠銀根。

美股戶口都開了,但要等一個月先用到。話時話中信嘉華個customer kit 做得幾好,main visual係黑夜中的鷹,買美股需要夜媽媽買,鷹就是花旗國國獸,簡單切題。不過句slogan 話甚麼黑夜中抓得更準...查實夜晚捕獵抓得準的,是貓頭鷹才對吧?

最近有諗過,如果將香港所有上市銀行的logo 一字排開比較,分析其graphic taste 與股價,應該幾有趣。

講企業形象做得最入時,黑人首選建行,其次係富邦 (28號單日升了15%),第三是匯豐,第四是東亞和星展。中行和工行都好相似,有陣官僚味,不過勝在夠consistent,二者以中行佔優,最唔掂的是交行和招行,認真肉酸呢!偏偏股價又高一高。中信銀行個logo就有點遜,股價表現亦遜一籌。恆生嘛...轉左隻綠色之後係精神左,但總有點唔老唔嫩。

既然有風水佬講股市,點解冇graphic 佬評下財經呢?查實睇CI (corporate identity) 估市值,隨時實在過睇風水喎!

星期日, 4月 27, 2008

評論

在日月報讀到影評人死亡事件簿,葉導演這番話其實已經講了至少七八年。

香港近年沒有影評文化,是事實。不是香港出不了影評人,只是優質的香港評論人都已經以大陸作為基地,間中回來悼念一下香港而已。

電影評論是種極之蝦人寫的品種,要言之有物,往往需要冗長篇幅或者旁徵博引,尤其是影評文章完全不提其他導演或作品幾近沒可能,一旦提及古代黑白電影或白堊紀年代導演編劇,一般人就會迷(lost),所以要閱讀影評文章,前設是閣下需要有一定的電影常識,香港人有大量娛樂新聞的exposure,但大多數人也無緣接觸電影理論,先天八字已經唔夾。

黑人極之同意葉導演指香港人當電影是種hea的娛樂消費,要求較高的,再加些少思考性的話題素材已經很夠。所以香港不需要影評,只須一個電影消費指南 (抵睇指數: 3粒星)。

香港人擅於高速思考,而葉導演及好些影評人心中理想的影評,往往需要靜下來細心啄磨,並且自發作大量的延伸閱讀,這跟多數香港人的習慣不符。

香港人另一個特性是實用主義,影評是辛苦讀完之後,沒有實用價值的文章,娛樂價值也未必很高,跟香港民情又不符,被淘汰是必定的事。

黑人覺得「香港影評」是很難救的死結,當年熱血地跟葉導演拗了幾個鐘,還是沒有方案。

要香港人再擁有影評文化,須花大量心力將之包裝至平易近人重新教育,但多數有身份地位的專業影評也不會做這種有失身份的事。而且,這些前輩在內地很輕易就找到高水平讀者,有辯論有互動,根本沒有incentives 去討好水平較低的香港讀者,與其嘔心嚦血對牛撫琴,不如另覓知音人?

葉導演發表影評人死亡論跟梁文道最後一代香港人互相呼應,黑人心中想到的是魔戒中精靈族大舉離開人類國土的情境。幾年前還會天真及傻地希望推動設計界專業化,現在只會掛心2628 939 3968,看來尹思哲所寫的程式員之死,換成砌稿員也一樣合適。

星期四, 4月 24, 2008

vodafone 720

好L火呀 @#%$#%&^%*&^(*&(

又一部多故障功能手機,個OS 超唔穩定,成日出事:

1. 營運商綁定:Smartone 話要鎖一年機,fine,我懶轉台由得你鎖。不過你唔好鎖到我連電話都打唔到好嗎?佢間中就會出個「營運商綁定」既screen,乜制都按唔到,除非輸入解鎖碼,搞到我成日要熄機再開機。

2. 熄機screen,亦都勁煩,熄機唔該爽快d啦,仲出咩animation

3. 自動收線設定:當部手機認為我應該收線時,就會自動幫我cut線。有時我對住個收左線的手機講左分幾兩分鐘野,完全有種做左傻仔的感覺。

4. 跳制,有時我想選1,佢會自動幫我跳左去5。搞到有幾次call 左d 唔相干的人,同埋send 左個sms 俾其他人。

5. 聽筒音量調校重視:按個dial 制(我係慣左用call history找人的),會彈左個「聽筒音量調節」畫面出來,cancel 左都繼續彈出,個dial 制就變左「聽筒音量調節」制,想點?打電話都唔俾?

6. 念舊模式:如果你用USB幫佢叉完電,或者剛用藍芽傳送左d data,即使你已經斷左線都好,佢個display icon 會一路keep 住係USB 或藍芽,直至你重新開機為止。

上網一查...原來係國貨,制造商叫「華為」,雖然個design算唔錯,但係OS真係一塌糊塗。

對唔住,我唔夠愛國囉,係我衰。

但係我真係用到好L慶呀!@#@#$%@#$ 好想一野飛爆部電話!

星期三, 4月 23, 2008

雜炒

有太多topic 想寫,時間心力不夠,唯有炒雜燴上碟

1. 國貨

之前70樓提過國貨百力茲,黑人身邊最常接觸到的國貨就是...街機:西遊釋厄傳和「拳皇98:終極之戰」。

西遊釋厄傳就是以1996年日本電玩Dungeons & Dragons: Shadow over Mystara作為藍本改良的製品,之前內地遊戲商已經抄考了好幾套以三國為主題的橫向捲軸遊戲,並且在華人市場獲得不錯的反應。

「西」最大的特點就是加入插卡模式,換言之有點像online game 般要不斷重玩儲寶物,用花花綠綠的真錢換上虛擬「西幣」。創意上也顯示了某些進步的跡象:設計人不再拘泥「忠於原著」這個框框,除了西遊記的人物還可以選「嫦娥」、「二郎神」這些九唔搭八的角色,跟「三國無雙」有得比,而且玩玩下,孫悟空還會幻化成戰機模式打飛機,有時又可以跟魔皇一起跳入熱湯中比耐力,創意上都是很好的新嘗試。黑人在機舖觀察所見,西遊釋厄傳頗受玩家歡迎,相信必然會有下一集。

拳皇98 終極之戰...單看名字就知這是10年前的遊戲了,被SNK 稍為翻新再換上簡體字,再加幾個中國的場景,graphics 還是十幾年前的水平,加了幾個新人物 (合共64人),居然可以在衰退的格鬥遊戲市場大賣。其實中國四大奇書還有一本十分適合遊戲商改編發行:水滸傳。

108個好漢,變成「水滸09無敵之戰」應該有排玩,反攻日本市場指日可待。

結論:以遊戲機來看,大陸的創意水平確實在急速進步中,只不過EQ仍然很差,例如網頁設計中最出名的FWA網站,違規抄襲的還是國內同胞,不要說樹大有枯枝了,大樹不止你一棵,人人都無事獨你中華民族有枯枝?


2. 結婚生仔

M意外成孕,恭喜晒!

朋友A愁結婚。黑人知道男方要付家用以及還一筆很大的債:除非大部份的錢由女家支付,否則短時間內想結婚都很難...唉!二十尾三十頭的男人都很苦,剛畢業腦荀都未生埋,理財能力薄弱又要付家用還 grant loan,打了幾年牛工交到女友,想結婚的話禮金一大截(估計A的母親會開價八十至一百萬,拗數頂多減到三四十萬吧?),擺酒十幾二十萬,再加首期(未敢睇樓),根本就是mission impossible。

再說,A身邊經常有高收入條件好的男生出沒,就算黑人不是她男友都感覺到the clock is ticking,真大壓力。


3. 抄

學子個扑又打大交,今次仲勁,炒到差不多100個comments,由最初評論香港設計抄襲問題變成批鬥網主,頗有宗教狂熱份子獵巫的感覺。

黑人一向覺得原創並不完全是設計人的功勞,除了放在設計展的半藝術品外,大多數成功又具原創性的作品,都是客戶、受眾和設計人的共同成果。沒有開明的受眾、肯冒險的客戶,設計人有再多創意也徒然。

香港最缺乏前二者。學子有時挖苦本地設計人抄襲問題,黑人不敢苟同。正如freakonomics 最慣用的說法,凡事皆看incentives,香港的創意工業就是缺乏鼓勵原創的incentives:受眾缺乏品味培育,大家的喜好有如複製人,崇洋單一又保守,客戶缺乏製作資金,在商言商,也不敢隨便挑戰社會接受能力的尺度。一層壓一層到設計公司老闆,自然希望穩穩陣陣,快快手(慳成本)揀個外國成功例子上馬,設計人工作環境所限,收入不高(難吸引人材),學歷低,視野窄,吸收新事物的空間細,創新的成功率和意欲自然低。

今天看日月報郭繾澂有篇很好的文章「香港缺乏推理創作環境」,選段:

...香港沒有這種創作環境,大部分創作只為單一媒體服務,如創作電視劇,對電視編劇來說,不過是日常工作的一部分。

為單一媒體創作,沒有長期利益,故此只會急攻近利,賣的是小聰明,完全不適合需要心思縝密的推理創作。

筆者很久以前跟一個日本創作人談過兩地創作的分別。

對方說如果要在三分鐘內決勝負,日本人一定輸,因為香港人的腦袋實在轉得太快;但如有三天時間,日本人會贏,因為香港人太滿意那份急智,但充滿破綻,日本人最後想出來的,很少出錯。



4. 娛樂

最近唔知點解,無左一種「期待」的感覺。

例如以前逢周五,必定跟朋友到機舖大殺四方。現在朋友忙工作,即使周五收工也眼訓得像人乾,不復當年勇,黑人曾經令銅鑼灣某些機舖聞風喪膽的「黑之彗星」馬沙專用渣古,亦孤掌難鳴,打機變得有點悶。

又,曾經有一段時間look forward to 晚上跟朋友練跑的時間,現在仍然有練跑,但為顧及工作關係不敢再在晚上練了,怕睡不著。以前練跑,是pushing boundries,現在只是追回失地而已。

古時候到信和掃四仔是一種獵奇儀式,現在信和變成精品店商場(好事來的),四仔舖頭為了維生,只能翻最大路的貨式,網上BT又太方便,搜到古靈精怪的東西又太多...再加上看了AV十幾年,體內早已沒有青春期的 growth hormone,再好看也會悶吧!

突然有點體會到 fightclub 入面Edward Norton 的心情。


炒下炒下,原來都炒到咁長篇。唔寫了。

星期日, 4月 20, 2008

天國地獄 heavenly hell

從Chris 處見到兩篇關於天國地獄的文章,值得一看。
(上)
(下)

黑人好耐之前都有諗過到底天國係點。問題係點諗都覺得悶,例如耶教的天國日日唱聖詩「賺眉豬!賺眉豬!」「太好了,「每日都可以親近神啦」,接近左又點?玩手指乎?

回教個天堂比較適合黑人胃口,有大堆俊男美(處)女美酒佳餚。

不過,日對夜對都悶啦!而且黑人都幾怕處女。

記得以前在OpenYale 旁聽心理課,個prof講左一個幾重要的concept:人會對不斷重覆的事物漸漸麻木,以便識別各種突變和差異。換言之呢種「對得多都悶」的感覺,係幫助人類學習和適應環境的機制。

所以黑人認為,上天堂要「唔悶」,最大可能就係將呢個機制剔除, 咁樣人就會變得好易滿足:每次飲汽水都好似第一次飲咁正。換一個角度,小小懲罰都變得如無間地獄。

咁樣又帶來另一個問題,如果每一刻都好似電腦 reboot咁唔記得之前做過乜,上天堂又有甚麼意義?

如果人生無左「老病死」,無意義又有乜所謂?

ECCO


太趕,黎唔切影靚d,大家自己留意啦

print ad 悶到震,website不成比例地正,就算唔識波蘭文都十分過癮!
ECCO website

香港應該好難做得到,好少客會俾咁多budget拍藍畫面片搞interactive
出到藍畫面又吊wire通常都係搞TVC,好少會為左online promotion
樂觀地想,呢方面香港仲有好大發展空間。向壞方面想,香港個市場太細,養唔到咁既客。或者在香港要sell到野,根本唔駛搞咁多創意。

太好了,非洲的人還未有鞋穿。
糟透了,非洲的人都不穿鞋。

視符閣下站在那一邊。

星期五, 4月 18, 2008

邪惡紙紮哭娃


哭娃體術項目1: 剛跤 (Solid Wrestling)


哭娃體術項目2: 交配 (Mating Contest)


哭娃體術項目3: 變裝 (Cross-dressing)


哭娃體術項目4: 踢白鴿 (Piegon kicking)
(愛國紅孩兒怒踢逢中必反白鴿黨)

星期三, 4月 16, 2008

買贏

無意中跟朋友講起流年,近日黑人周身唔聚財,應該係未應驗(夠)破財之象。
既然點都要洗錢,不如用在(自以為)較有意義的地方罷!

反正今日無晒靈感,就用行動悼念一下已故的商台節目「打書釘」,去書得起,感覺主要係討好有閱障的創意從業員,賣的都係圖多字少,唔睇字都ok的oversized 貴價書。

轉陣到實Q廣場的新加坡連鎖書店,終於見到有字的書。新年目標係睇12本,不過今年已過了1/3,為了加快達標唯有出千,睇圖多字少的字書充數。首選創意大師Paul Arden 遺作God Explained in a Taxi Ride,黑人無錢搭的士,不過一野MTR ride 都睇得晒,好淺,但講的東西好深,呢本書不值得買 (因為睇一次就夠),但絕對應該睇一次。

預左 Paul Arden 蜻蜒點水會到喉唔到肺,於是買左本講生死的書補飛:Tuesday with Morrie,睇過電影,原著應該只會更好。

跟住就掃左David Gemmel 兩本新作Troy: Shield of Thunder, Lord of the silver bow,以前睇佢寫Druss Chronicle已經覺得佢係暴力美學大師,對白爽快辛辣,大刀闊斧血肉橫飛 (鬼佬fantasy 小說寫打鬥通常悶爆,佢係例外)。唯一缺點係寫寫下開始無乜新意,今期玩經典史詩又如何?唔駛講,用錢投左信心一票了。

自問有多次受騙的經驗:Blink, no excuse, from good to great etc...十居其九都係美國佬發揮吹水國粹的產物,將書中的水份榨走,隨時得返10頁紙講人人都知的常識。 為了扮知識份子,買左The tipping point。

唔知點解好掛住肥佬 Bill Bryson,專登走去搵佢的著作,嘿!書架上無晒a short history of nearly everything (賣晒定係唔賣得?),隨手執一本講英國的Notes from a Small Island,貪佢封面的endorsement夠抵死 "Not a book that should be read in public, for fear of emitting loud snorts" -- The Times

全部都係英文書,點得?走去中文部,最多係講股票窩輪。有d想買市場先生本新作,不過睇佢個blog再買書似乎有點笨,而且市場先生的書應該唔擺得耐,入面d 資訊好快會過時。終於揀到一本「潮爆中國」,自問對國情認識是零,要睇都唔知睇乜,諗諗下不如揀創作相關的做切入點,而且係繁體書,又多少少信心保証。(黑人偏見係:簡體書的中文通常寫得好差,又係滲左好多水份之作,仲要係餿水,睇完會壞腦的)

埋單找數,承惠七百大洋,應左個破財劫喇卦?

星期二, 4月 15, 2008

文字魔力

只讓你寫55個字,能寫甚麼?

The World's Shortest Stories, edited by Steven Moss, Running Press

其中一篇:

Art Vs. Commerce

The artist stood back to view the geometric precision of his latest creation.
"Beautiful," he murmured, "but will it sell?"
No time to examine the philosophic implications. Customers, buzzing with excitement, hovered near the piece.
He wrapped up a deal quickly.
"This is business," the spider said with a vicious smile. "It ain't art."

評語:值得買,保証不悶。

星期日, 4月 13, 2008

photoshop express

最近無意中發現Adobe 出了網上版的photoshop: photoshop express
還記得七年前學堂TA預言的網上版application,亦即係好些IT geek 成日講的RIA(Rich Internet Application),已經悄悄地在我們身邊出現。

現在的黑人第一時間會想到:咁Adobe (Nasdaq:ADBE) 個股價會係點?
走上yahoo查...睇唔明,佢過往十幾年split左五次,即係...點?
要問問有關方面的專家先得。查到再後補。

如果從黑人已知的東西去分析,若干年後 adobe creative suite系列大部份會變成web application,大家買account login 上去做野。換言之distribution cost 會減低好多,正版license 的售價應該會平返一大截,唔少網民唔慣買正版software,但係對於網絡一些收費服務(如online game)就不太抗拒,可以預見將會有好多用緊翻版的用家重新納入正版懷抱。

另一點,係adobe 企圖透過flash這類網上媒體格式,取代傳統html/css/ajax 網頁成為網絡主流。

黑人以設計從業員的角度去睇,寫html/css 真係幾煩,又要怕唔同browser 走樣,有無咁多layout 上的自由(例如揀一d特別字款)。製作網頁的方式唔夠圖像化,即使你用frontpage 或者dreamweaver,仍然要寫好多code 做微調,而且做graphics 時的手續比較煩覆。若果想有互動效果(例如drag and drop),仲要搵好多javascript 去輔助,相對不及flash 咁簡易集中,而且手機支援方面flash 亦慢慢普及中,手機介面要玩花臣野,都係flash 耍家d。

html/css/ajax 網頁退下火線必定係遲早發生的事,現在的programmer 話用flash 寫網站行得慢、語言碼變換有困難、對search engine 不友善之類的問題,遲早都會解決,相反傳統html 的局限卻無法改變。換言之,未來的網頁應該會好似photoshop express 個介面,不走樣,load 得快之餘又美觀易用。

題外話,見過唔少programmer的想法都係要人去遷就technical constrains,而無technical training的人就會要求科技滿足人的需要,歷史發展通常都係後者取得最終勝利。

講返adobe...黑人只係一個BT AV的電車男,唔係尹思哲果類IT達人,唔知 adobe 有幾大機會成為網絡媒體格式戰的贏家,只可以估adobe 有flash 呢張皇牌,已經佔左一個唔細的head start。就算免費的open source 力量再大,最多只係不再由 adobe話事,但flash 依然好大機會變成網絡媒體的主流。

另外,唔好忘記好多design 學堂跟adobe 有交易,教出來的製作人/設計師都已經被adobe 洗左腦,就算你有一款更便宜功能更好的software,都好難改變佢地的工作習慣。作為老闆就算見到其他software的價格更吸引又如何?你請返來的伙記十個有十個都淨係識photoshop,慳果一千幾百,蝕時間train 伙記,仲有send file 俾其他人產生各種兼容問題,根本得不償失,所以adobe 帝國的地位短時間內都好難動搖。以前最佳的例子就有freehand vs illustrator,最終freehand被收購絕育,完了。

咁到底adobe 值唔值得入?長遠計佢點都會賺錢,至少三五七年內唔會有甚麼力量可以挑戰adobe 核心業務,而RIA 普及化之後,佢亦都有好大機會佔一個相當大的market share,前景應該向好。問題反而係,買一lot ADBE 相對買一手2628,三五年後邊個賺得較多?五年後的美國又會變成怎樣?

(以上內容屬個人網誌, 一切言論純粹是表達本人的個人意見分享, 不構成要約、招攬、邀請、誘使、建議或推薦,本人無法保證內容的真確性和完整性。讀者務請運用個人獨立思考能力自行求證和分析, 讀者一切的投資決定以及該投資決定引致的收益或損失,概與本人無涉。)

星期五, 4月 11, 2008

短片


God is a DJ
幾難拍,咁多組elements 要顧及



Go Fast
少年不窮,也莫欺白髮翁
****************

每逢遇上老人家,都會幻想到底他們二十幾歲時是甚麼樣子,也許他們身上的老人服,在五六十年前是潮著!

眼前頑固又腦筋不靈光的老伯,年輕時可能是個開明又才思敏捷的人。那位弓著背的老婆婆,從前一襲長裙,腰腿修長性感。對面坐著一對木訥的老夫老妻,六十年前是業界頂尖人物,博學善辯,開口一句話,就有幾百人忙得團團轉幫他們搞定事情。

年紀大了,衣著就得低調一點。說話講少一點,氣勢都盡斂了,世界轉得快了,自己走得慢了,就得靠在一邊讓路給年輕人,膝蓋沒氣力了,唯有走幾步就往牆邊靠站,有些魂魄已經搶閘在天國輪候入境登記手續,忘了軀殼還活著,魂魄兩邊走,所以時而清醒,時而痴呆。

以前夢見一個情節,大概是勇者(不是黑人,黑人的視點和看電影相似)主角打不過魔皇,根據老賢者指示尋找傳說中的英雄助陣。幾經辛苦找到了,只見賢者在點水煙,看守著一個英雄塚,根本沒甚麼英雄。

未幾魔皇殺至,見到所謂英雄原來不過如此,哈哈大笑,把勇者殺個片甲不留。

突然光華大作,英雄塚的枯骨敗甲化成一個個年輕的武者和術士,其中一個武士向主角回首一笑:「你先走吧。」

原本老到糊塗的賢者變成一個俊朗的年輕人,一把扶起主角到塚外。

當主角再回首時,魔皇、眾英雄、賢者、英雄塚皆消去無蹤,只餘下一片荒涼。

星期二, 4月 08, 2008

海報

每日都有大量缺乏設計常識的東西在我們四周出現,浪費金錢時間。評一流的設計輪唔到黑人,講些明顯有問題的還勉強可以吧?

無focus vs 有focus






大家都係密質質,作為一個路人,你會留意到邊款海報多d?前者每一舊visual elements差唔多比重,就算我係club 場蒲精都唔會留意到你啦。成條街咁多野望,路人平均得一秒半秒睄下你想講乜,咁多elements,又唔知睇邊樣先,只係鼓勵人地ignore你。





Design 中規中舉,但係每次copy 都明顯出事的海報,令(黑)人難忘。
話說古時候某次見到佢地海報,句copy係 No Oxygen? But Protrek...

想講乜?無氣,但protrek?呢隻錶可以供氧乎?還是你死佢都未死?

雖則今次講左等於無講,至少正常d,不過點解outdoor又要加引號?"疑似"outdoor?


(黑人並不認識上述任何團體或設計單位)

星期一, 4月 07, 2008

打書釘換上棺材釘

無聲無息地,商台少數知識型節目:打書釘,終於釘蓋了。

發現左一排都唔記得提起。

黑人由梁文道年代開始接觸打書釘,當時晚晚漏夜趕插畫,唯有開收音機嘈下自己無咁寂寞。
不知何故,第一次聽已覺得梁文道係個光頭佬 (光頭有聲聽架咩?),個jingle 係道長扮李小龍(or 拳四郎)的:「口胡...打打打打打打...打書釘!」

聽完個jingle,至少會令人覺得佢地講科索沃或者塞爾維亞問題,唔會死咕咕。

梁文道年代最好,劉細良做搭檔,一個活潑一個穩重。後來梁文道被逼身心俱疲黯然引退,劉細良缺乏活潑感,不斷搵甚麼教授、文化人助陣,水平夠晒高,可惜一個比一個悶,舉個老作的例子:

劉:「呀x教授,你對變種人都研究左好多年喎,咁你對呢本書有咩感想呢?」

x:「好有水準...真係好認真。」(講完了)

劉:「(諗緊辦法tum佢講多兩句) 你覺得佢水準高在甚麼地方?」

x:「佢花十年結集研究資料,鉅細無遺,同類型既論著中,好難得。」(再一次講完了)

當時黑人不期然會role play 劉細良,猜想佢在直播室的心情。

後來劉細良成熟至可以獨當一面,又被當奴挖走左。

接下來湛國揚、潘小濤、王慧麟等都花左一段時間,先至洗甩讀書人獨有的「悶」,當時黑人已甚少留意此節目,一來固然將之與道長年代比較,二來選書的範圍不離政經論著,又真係比較悶,或者係主持未掌握到點樣將較深的題目與日常生活掛勾。

直至阮子健及江麗芬接最後一棒,事情反而又有些起色,雖然阮子健有少少語障,江麗芬又令人覺得很假很虛偽,但選書上已貼近生活文化,尚可接受。

又好坦白講,黑人真係聽打書釘而買的書,十居其十都係梁文道/劉細良年代推介,例如The rise of creative class, 吉川英治的宮本武藏、freakonmics、a short history of nearly everything 等等。阮/江推介的,一本都不記得。估計最大原因係梁文道當年好識得賣關子,一個個hook 拋出去,黑人當年做做下野突然聽到:「細良,到底點樣衡量一個城市既創意水平呢?」「佢有幾多美術館?」「唔係。」「文化活動的數量?」「呢d答案都好大路,但係Richard Florida 既答案都好騎呢,原來佢係透過觀察一個城市有幾多基佬拉子,亦即係gay index,去衡量一個城市對異類人的包容程度,從呢個包容程度,創作人可以知道呢度有幾大創作自由。你又諗下,一個地方即使大興土木搞文化工程,又天鵝湖、phantom of the opera 乜都請晒黎,但係講下玩笑都會俾人拉俾人告,又點會吸引到頂尖創作人入黎呢?外國甚至有d人明明係直的,見工時都會問下公司對同志的包容度。」

阮子健後來慢慢都識得賣關子,但係感覺上就係無左道長的edge,好似講完收工就抹左去咁 (所以聽完亦唔會記得罷?)

點都好,打書釘釘蓋了都係一個損失。資訊文化節目除左股票、食經同埋旅遊消費之外,可唔可以有其他選擇?

星期六, 4月 05, 2008

熟女心經

大休,難得N 又在銷大假,也就來個年聚(上次聚頭大概是07年三月左右),不巧,居然又幫襯同一家拉麵舖(888拉麵,入面的牛油磚拉麵一級棒,咸了點但值得試!)

黑人生活沒甚麼特別起伏,反而 N 有趣事爆料。

話說 N 有個年輕才俊同事,偏偏就是喜歡「熟女中出」,普通的年輕女孩他隨手可以撈一大票,卻終日鬱鬱寡歡。(慚愧,黑人雖然有多年AV年資,卻搞不懂「中出」是甚麼,事後要在Yahoo 知識補課。)

才俊終於一次在公幹中遇上他的心頭好,大家一拍即合。回港旋即跟正室分手,展開一段熟戀情。

接下來,N用一種介乎national geographic 和恐怖熱線之間的語氣,向黑人解釋那位熟女厲害之處。

前人云:要留住男人,先要綁住他的胃。熟女卻首先綁住才俊的小弟弟,一個值血氣盛年,另一位已屆狼虎,供求配都恰到好處。熟女熟讀「口愛」(許佑生著/大辣出版),平日甚至會採購最新的AV,吸收市面上最新技術資訊,一身好武功,尋常港女都比不上。

「男人偷腥,因為愛新鮮。我在他想偷腥前就把最新鮮的帶給他,他自然沒餘暇偷腥了。」N 轉述熟女的營運哲學。

誠然,每次熟女來港 (又或才俊赴外公幹),必定激戰連場。「大戰三百回」或有誇張之嫌,取其一百天平均數,卻離事實不遠。

如此激耗,會否有literally 殺雞取卵之憂?黑人問曰。

不怕。熟女心經第二式,就是每次才俊拜訪她的home turf,必有湯水按摩侍候,並非一味乾耗不補。才俊甚至跟 N訴苦:「我宜家好明白咩叫性奴,不過已經走唔甩喇。」

第三式,某日才俊帶熟女見朋友,話題無意講到靚仔好仔極之搶手,熟女輕輕挽住才俊的手,笑曰:「係咩?我唔駛再同人爭咯。」據N說,才俊當時只懂傻笑。

********

能夠顧全裡子(性)、面子和肚子的女人,都是一等一的狠角色。說她們狠,因為她們知道做足了以上三項,男人再有天大的本事都逃不出掌心,既然甚麼男人都能網到手,自然就會挑條件最好的一把咬住不放。

接下來是否happily ever after,就得看男人能否一直給予女人所需的東西。以熟女為例,她直言在一段關係中,最看重性這一環。黑人和N都不禁想到,才俊假如無法「交貨」就只有分手一途。

又或者如我的麵包朋友(一)(二) 這兩篇,金錢就是維繫感情的主要關鍵。

古人謂:不講錢的女人,最貴。

********

講開又講,黑人身邊不少朋友真的開始放棄港女了,而且放棄港女的都是條件較佳的一群,縱合其理據也離不開上述熟女心經的三個範疇:裡子、面子和肚子(也包括大小家務事宜),也許香港人太專注賺錢炒股票和物質消費,忽略了這些基本功?

星期三, 4月 02, 2008

電車男管弦樂

自古以來,打機和聽古典音樂代表兩種截然不同的社會價值。尤其在保守功利的城市,主流意見永遠是勤有功嬉無益:古典音樂可以教琴賺錢,打機就是廢人。當然,這類腦袋無法想像得到打機不論作為entertainment 還是art form,都有很大(未被公眾認可)的價值。以現時的科技,製作認真的電玩可以媲美一套荷里活電影。(黑人也未能免俗,從功利角度出發)

長話短說,澳洲管弦樂團 Eminence Orchestra 將電玩和古典音樂結合在一起,團員都是game友,管弦樂不再是老人家或書獃子的東西,這是他們的訪問:



好多首主題曲都rearrange 過,訪問都講過,電玩用合成音樂可以走精面,管弦樂就不可以,而且好些傳統電玩的音樂太簡單,必須大幅修改。

Super Mario Brothers

Metal Gear Solid 2 / 3 theme(黑人至愛!勁!)

Evangelion (新世紀福音戰士) - Thanatos

Final Fantasy - one winged angel

天空之城

哈爾移動城堡

龍貓


黎緊11月18號佢地在悉尼有show...一支公淨係為左個show 去果度旅行,又好似傻得濟。

*********

追加 (跟上述樂團無關)

吾友未開始怒插生涯之前,間中會在一眾電車兄弟前彈奏的電玩音樂
Final fantasy: love theme

Final fantasy I-III Medley

Main theme of FF ,連植松伸夫也上台指揮,雖然黑人無玩過FF 系列,睇到都好感動,始終勾起不少中學至今的回憶

手腳不乾淨的Hitman

大部份時間我都覺得香港的片商十分 on 9 ,人地叫cloverfield 玩神秘,佢地就自動揭裙底「末世凶煞」話你聽入面係乜,No country for old man 得了獎,至拿拿林從櫃桶底搬出來再上畫。不過,今次佢地無上呢套戲,我認為決定正確。

劇情查實穿唔穿都無乜分別,片頭你見到主角(殺手)受到神秘組織精心培訓,跟住你九成九可以估到劇情發展落去,佢唔係失控就係失手。果然估中(兩樣都有),遇上女主角,你亦好快會估到跟住殺手就係帶住個女仔亡命天涯。

無辦法,太多好橋已經被前人玩到爛晒。殺手x舞女組合 Le Samourai 玩過,吳宇森玩過幾次,Jason Bourne 系列更加不用講。就連被bondage愛好者奉為經典之一的cult 片 The transporter (光頭佬+舒淇) 亦都拿來玩,題外話,黑人極之佩服編劇用一兩張牛皮膠紙,就合理地將舒淇的對白降至最minimal。

造型上,hitman 同電腦遊戲原作頗接近。可惜整件事太似bourne identity,連配樂都似,所以無論光頭佬點樣努力都跳唔出前人的水平。條橋發展到後期就更爛,有裸露鏡頭但係無床戲,有愛情線但發育嚴重不良,有所謂的陰謀但過份拼湊,有interpol,但係就拍唔出 Bourne 入面果種歐洲味。

最大鑊就係編劇無法解釋點解個主角擁有全知全能的佈局能力,我諗個佢寫劇本的時候,心入面應該高呼: dont ask too many fcking questions, it just happens, ok?

唯一比較有趣的,就是見到Prison Break 入面果位Teddy 扮俄羅斯國安頭子,居然又俾佢交到戲,希望佢唔好太快被typecast 吧!

明知咁多前人佳作,換著係我 (對,我在講風涼話),不如劍走偏鋒,索性從殺手組織的角度出發,將職業殺手集團合理化:主角盡力提供最專業的服務,又要提防同事爭凳仔搏上位。你要床戲?無問題,特訓時就俾一幕床戲,主角第一次破童子身享受魚水歡,高潮到處,突然「砰」一聲靚女塊面被狙擊槍開花,主角驚呼:「天!佢做錯d乜?」

答曰:「Off you go, mission accomplished, no more questions。」

有左呢段戲,之後就不用夾硬加條愛情線落去。因為凡親阻住主角發達的女人,佢都可以合理地一槍打埋去,保持劇情流暢,而且應該幾好笑添:

(恃靚行凶的索女):What? Are you going to shoot me? You wont shoot an innocent woman wont you?

Hitman: (silenced gun shot).

若果要煽情,亦可以話佢良心發現選擇唔開槍,進可攻退可守是也。

寫寫下,又係見慣見熟,不外乎拾人牙慧,算吧啦。