星期六, 6月 30, 2007

0771.HK

記得03年71,約好一班朋友上街示威
大家齊呼董建華下台,連菲傭都高叫「tung chi wa 食蛋糕la !」

沒有董建華這類民主之父,也沒有甚麼特別議題,今年相信不會有03年那種情景。

朋友各奔前程,有些往海外讀書,有些已反目不會再相見。

也沒有約甚麼朋友一起上街,大家各有自己要忙的事,無謂勉強。

今年71上街只是為了向盲光社投反對票,但相信人不會多。而且警方規定6點清場,應該很快會熄火。

星期三, 6月 27, 2007

攣男與TB

可能係一個劇本的故事情節...

若果一個gay 男愛上一個TB
到底佢地仲係 homosexual,還是已經變直呢?(或者...變左Bi)

故事骨幹可以好老土,一個豪氣TB照顧一個柔弱攣男,鼓勵佢溝仔
點知,過程間兩人漸生情愫,但大家都覺得無可能發生異性戀
攣男為左試自己,買左本甜書來看,依然無反應
TB嘗試著裙,但係一著就已經反胃

最後...呢段唔知點收科的感情故事隨著黑人眼訓而謝幕

若果用來拍短片,都幾有趣播!

星期日, 6月 24, 2007

$100 a day, get laid with your babe

以前十分流行173 熱線,由龍珠廣播劇到咸故乜都有,奈何家貧,一次都未聽過

但係有一個節目印象十分深刻,就係教你「如何用50蚊跟你心儀的女仔共渡一天」
對像大概係針對比較窮的初中生
當年數學不及格的黑人已經心諗,打上去取經,50蚊budget 至少唔見一大半
剩下來的頂多夠買包tempo 抹眼淚 (或者打完手槍清理現場)

若果以老麥作指標( I know this is not the proper way to measure inflation),當年一個豬柳漢堡餐15元,現在20大洋,即係脹左30%
65蚊在今時今日,真係好難有作為

若果將金額提升至100大洋,假設閣下是高中生或大專生
到底點樣可以跟心儀的女仔愉快地共渡一天呢?

最藝高人膽大,同時也是最懶的答案:
買一天用的避孕套,然後約佢行飛鵝山...


solution 1.
by 黑人
買一大支水,加本畫簿同一set 水彩
帶個女仔上山畫水彩畫

solution 2.
by 黑人
買張backdrop 紙 (成個客廳咁大果d)
買幾支科學毛筆
玩巨大版天下太平 (multi-player 亂入可能)
若果家中地方淺窄,可以考慮在公園等場所進行,甚至屈蛇入大學common room (若果閣下有窿路的話)

solution 3
by 塞米
坐嚮冰室/戶外茶座hea,做個旁觀者,都幾有趣架。

solution 4
by CK
不如同另一半一起去番老麥 Partime, 純惡搞可能跟她/他一起番工的經驗都幾難得下還要番一半兩個人齊齊玩辭職之後可以買外賣Super Sandwich (一下用曬一百元)去海邊吃, 順便兩番一天的感受個人有些累, 有海風, 一邊享受食物然後

*****
solution 4 b
一齊去參加饑饉三十

solution 5
by orange
中午可以去行下效野公園或者行山,但要小心太曬
夜晚咪行下海邊或者山下睇星
但要小心餵蚊真係要慳錢, 咪唔好o係餐廳食
如果約會地點唔係鬧市
咪試下自己整d三文治一齊食
(整三文治最多唔好食, 只要食材新鮮點都唔會食死人)
比起麥記平又有誠意得多

##################

不知看倌有甚麼高見?
分享下 ~

小事幾件

辛辛苦苦趕頭趕命做起的website,輪到個客唔得閒跟。都唔係頭一次,做的時候催到趕頭趕命,做起時又唔得閒覆,錢就更加要等唔知幾耐先收到。

幸好另外兩個客都頗爽快。小弟可以做design 之餘嘗試一下寫copy,都幾過癮,但最現實果句依然係希望快d完事收錢。

*****

昨日跟朋友G去某人生日party,飲飽食醉,傾得幾開心。主人家C是個獨居單身女子,第二日要收拾應該都幾辛苦,淨係消化d surplus 都有相當難度。

黑人最怕host party,若果搞得唔開心自己又難辭其疚,玩得盡興,曲終人散時又真係幾惡頂的。

記得大學時一位極前衛的typography speaker 講到要追求人生機會,否則後悔莫及,可能因為佢只演一場百無禁忌,突然爆一句 "say for example, gee I wish I shagged that girl" ,當時全場 80人聽到拍晒手掌。

無論將講師的說話當作比喻或者literally 理解都好,這種勇敢只屬於年輕人。心境漸長,開始會想後果,變得多顧慮。

以前想到idea,會衝出去做。見到傾得埋的女仔,二話不說追左先。
現在會諗其他project deadline 就來到,搵多兩個錢最實際。
或者就算tum到個女仔返黎,最終大家真本性夾唔到分手,隨時仲無癮,而且拍拖都要洗好多錢,慳d啦老細...

but hey, still got stuff in the basement, let's see.

星期六, 6月 23, 2007

好老細 (1)

黑人打工經驗咁短,都相當好彩地遇到三個好老細。

其實唔多野寫(因為共事的時間太短),只不過講完19老細,講返幾個好的平衡下。

最佩服那位,是做event production 的老細R。其實三人當中,佢對黑人最惡,甚至待遇係最差的(包括金錢、工作範疇及其他)。不過真係從佢身上學左好多畢生受用的東西。

黑人未做過event production,零經驗,能夠入行主要因熟人介紹。百份百新人又不是特別醒目,自然不停撞板。

老細R跟上環A公司19老細最大的分別,就是老細R相當務實爽快。沒有效果的脾氣,不會亂發。也沒有隔夜仇。

例如黑人撞左板,大家係槍口向外,一齊做好件事先。即使production dept 同事間有不和,都係先攘外而後安內。

換作係19老細,就會先屌後問。佢一旦對事件不理解就會發脾氣,偏偏佢理解的東西又唔多。

若果不是freehand 或photoshop解決到的問題,會再鬧,然後叫閣下自理。

隔左一段隨機的時間,又會重覆屌 -- 問 -- freehand solution (y/n) -- 屌 -- loop,無論黑人白人甚至佢自己的親細佬,都劃一處理。

佢試過跟supplier不和,係會同supplier 互相鬥氣,鬥到個project企左響度,個客唔知點算,最尾要打來搵小弟求救 (當時黑人已離開公司近一個月),所以CK講EQ低的watch dog腦細會咬死晒所有人,千真萬確之至。

幫19老細做事,經常會覺得只要炒左個老細,公司就能夠順利運作。

講返老細R,佢另一個優點就係深黯駛人唔駛本的功夫。

無論係design team, production team 甚至下家的supplier,幾乎全部都俾佢老點過、卒過、榨乾過、壓過價etc,但老細R又能夠令大家對佢的「惡感度」盈口而止,大家一面吊晒鬼,一面死死地氣幫佢做埋d野,project 完左,又可以嘻嘻哈哈,雖然不是黑人心中最ideal的管理模式,但運作良好,省了不少錢,賺了更多錢。

第三個優點,三個老細多少都近似。就是presentation / sales skills,即使管理上一無可取的19老細,在呢方面都有一定能力。

event production 不外乎台、燈、聲,但係從"experience", "sensation", "niche advertising" 去包裝成件事,層次高左好多。

老細R (至少有一部份) 確信event marketing 會係廣告未來的出路,黑人多少都被佢感染左。信一件事去sell,效果真係完全不同。

當然,老細R對operation 真係好熟,sound panel、場地取電、燈光、印刷、costume 甚至自己落手擔擔抬抬都好掂。真係文官武將都服左佢。

希望佢公司業務蒸蒸日上,多點保重身體。

題外話:曾經有位前輩將呢樣野講到好玄:每間廣告公司都有一套present 的秘笈,未做到咁高級,係唔會識的,去到適當層級,又已不需學。不同agency編寫的presentation ,正正是配合其獨門心法,即使外人偷到個powerpoint 都唔會學到乜野。

講到咁神妙,若果有人做ad agency 請告知是否真有其事,謝謝!

星期五, 6月 22, 2007

失眠

see more in here and here


訓唔著,寫d濕星野自我催眠。

早兩日破天荒去游水,兩年多無踏足泳池。以前唔去游水,因為怕show豬腩肉,其次唔想濕水後令稀疏的頭髮變得有如纏在頭上的海藻。現在剷了skinhead,後者已不成問題,但對於show 豬腩肉,仍然有少少唔自在。

望望自己那個「不見天」,白雪雪,完全man唔起。

行出泳池,果然臥虎藏龍。首先在兒童池見到個大肥佬,行雲流水的打側手翻,由池頭翻到池尾,令我想起《功夫》那位水上飄。

再望多眼,兒童池內有一班肌肉發達的男人在做伸展動作,跟旁邊的大象滑梯和海豺滑水池完全不協調,試幻想一《鋼煉》的岩士唐在歡樂天地兒童波波池舉啞鈴,情景大概就是那樣。

成人池已拉線並且佔滿泳客,唯有去中童池。

甫落水,身邊一位黑黑實實、約六十來歲的阿伯朝黑人上下打量,雖然沒說話,眼神鑿有一句:「家下年輕人咁鬼奶油既?」

黑人望一望佢完全沒有贅肉,只有精肉的鋼軀,心諗:「阿伯,你又真係串得起。」雖然水深1.4米 (黑人身高1.8米),為了藏拙,連忙整個人縮入水裡。

又因為兩年多冇游過水,上一次催谷過度弄傷腰患,今次游得比較保守,八個直池埋單。

游一次,運動量又真係比練跑大得多。全身好多不知名的部位即刻痛到飛起,但係過隔左一日,練跑時的持久力真係有進步,仲搞到宜家訓唔到添。


希望遲下會有多d 太陽啦。行雷閃電去游水,雖然水鬥水都仲ok,但搞到變閃電俠就唔多好。

星期二, 6月 19, 2007

Believe

在CK 果度睇到一篇文章,有一點黑人以前都經歷過,就是sell 一d 自己都唔相信既野。
話說約年幾之前,黑人在一間位於上環某A字頭的 studio 工作。

老闆是個三十來歲的年輕人,也是黑人的設計偶像。無論佢對design的堅持、靠自學的功力、對質素要求等等,對於一個2字頭的死小孩來講,佢的每一個意見,都會影響一生。尤其佢公司做的flash projects,全部都係國際一流水平,能夠在一間咁樣的studio打工,簡直係前世修來。

公司規模不大,只得老闆、兩個design staff 同埋一個part time 的sales/admin (老闆的舊情人,實質上可算是老闆娘)。而黑人因為語文能力相對較佳,負責的位置比較特殊,銜頭叫marketing manager。基本上所有涉及文字的工作,包括少量design、寫copy、寫brief、sales、account servicing全部都一腳踢。

但係工作的條件都幾苛刻,首先每個月要跑到15萬的單,其次要令公司的兩個designer 消化到d job,但係果兩個staff 又不是由黑人來管,當然也不只做黑人跑回來的單。

其次,公司出左名脫期,老闆出左名潛水。又因為整間公司都是designer的緣故,所有運作都向designer傾斜。

當知道晒d facts 之後,真係唔知點sell 間公司

「我地呢...做design真係好叻既,不過成日會脫期,因為老闆唔approve我地都交唔到野俾你,但係又唔知幾時聯絡到個老闆,佢唔係成日返公司,手機都未必通。同埋除左將d野整靚d之外,我地就無進一步的concept 同service 架喇。而且我地公司得兩個designer,無人識programming,sales kit 上面寫果d 甚麼research, useability test, e-marketing 全部都係9 up,全公司無人知係乜來。至於d design 對你地有無功效,就真係唔知喇,我地做完job無同個客反面已經係奇蹟,點會知發生左咩事?」

「點解你唔搵果d 幾千蚊的studio,要駛幾萬蚊來搵我地?真係唔知呀。靚d囉。」

「你見到portfolio 入面最靚果d,都係第一代既designer,佢地另起爐灶出晒頭啦。」

本來,有一間日本的財務出版公司想搵我地做annual report,但係annual report 著重準時、保密以及內容精確,再加上日本人極重視承諾,以上每一點我都唔信自己間公司deliver 得到,單單一第一封enquiry email,老闆forward 俾我的時候已是2星期後的事,幸好日本客都仲有興趣同我地傾計,照跟可也。

一丁友走去搵supplier報價、搵翻譯甚至搵一位在annual report publishing 工作的朋友取經,當然少不了每日跟日本客email 往來,同時向老闆匯報大小工作細節,以及跟其他的單。

之不過,煲一單job真係唔係話一兩個星期就掂檔。第三個星期,一直潛水(不在公司)又沉默(不online)的老闆就在msn 彈左句 "dude, we have got to talk",跟住搵d小事來爆粗,例如點解我用hotmail去問價 (why the fuck did u use hotmail? no fucking hotmail!),扮客套料,唔通用公司email咩?(eg. blackman@i-am-your-competitor.com)

鬧到尾,原來都係一句點解咁耐都翻唔到新單,翻到job佢根本就不會嘈之類,跟黑人的工作方式或態度無關。

當時黑人就覺得,呀老細,我一個新人單拖上前線搏殺,你唔幫忙都算啦,幫我倒忙,點做野?
基於入職時聽到公司各種負面資料,再加上老細咁supportive,之後真係好難提起心情幫佢sell客。即使d客肯俾我上去同佢地meet,傾到點龍飛鳳舞都好,心入面都覺得即使sell 到,個老細唔知咩時候又會發神經,令呢張單一塌糊塗。

亦可能因為咁,所以sales成績又真係麻麻,而老細亦由msn粗口問候,改為隔一兩日就借d意「的」黑人入pantry鬧兩個幾三個鐘,都是不著邊際的感性發洩,去到後期黑人甚至心諗:「呀老細,放得我返出去做野未?」

直至有一次忍唔住頂撞佢一句,佢突然拿起個玻璃樽在台面係咁敲:「你夠膽就行過黎講多次,我真係好想一野濕鳩你。」

黑人打工的經驗較淺,雖然明白打工就是要受氣,但人身安全受威脅就真係做唔過,所以無幾耐就劈炮了。

咁個老細又不是全無可取之處,否則佢間公司早就應該做唔住,但係做左六年都只能維持1-2個staff,再多就manage唔到,呢個又係不爭的事實。

唉...前輩的說話呢,真係要過濾一下,前輩頭頂的光環遠睇就幾靚,近睇又係另一回事。

practice record: 2km

Castle on a cloud

先要恭喜Paul Potts 飛上枝頭變鳳凰, yes! You deserved it!

自問不懂歌劇,除了覺得他唱得感人之外就無法辨法唱功高低。但對比真正專業的高手如PavarottiBocelliPaul 的演繹較令人感動,可能這是剪接 + 觀眾同情 + 背水孤注等因素作崇罷!

不過,更令黑人感動的,是未能摘冠的Connie
Connie: Somewhere over the rainbow



真係聽到眼濕濕,若果佢總決賽唱Castle on a cloud,肯定整喊全世界。


(每聽一次都要忍住d眼淚...唉!)

There is a castle on a cloud,
I like to go there in my sleep,
Aren't any floors for me to sweep,
Not in my castle on a cloud.

There is a room that's full of toys,
There are a hundred boys and girls,
Nobody shouts or talks too loud,
Not in my castle on a cloud.

There is a lady all in white,
Holds me and sings a lullaby,
She's nice to see and she's soft to touch,
She says "Cosette, I love you very much."

I know a place where no one's lost,
I know a place where no one cries,
Crying at all is not allowed,
Not in my castle on a cloud.



今年的評判真不易為...難怪宣判時個個都黑口黑面,俾著黑人想到小妹妹返屋企對住媽咪喊,可能喊埋一份都似。

星期六, 6月 16, 2007

煲漫畫



有 Cowboy Bebop 先入為主,所以總覺得《新暗行御史》是套加了泡菜的日本料理:文秀不就是古代哮喘版的史派克嗎?

當奇幻日漫創意開始見底時,加些泡菜又不見得壞。例如英雄劍士元述用殺氣構成的劍刃,鋒利無比卻又擋不了、對活人和死人同樣有迷幻作用的蔓陀羅花也很有趣、各種的召喚獸、永遠只穿三點式的養眼女護衛等等,全都頗新鮮。加上近年主流日漫的劇情變得奶油,就連烙印勇士格斯也無力百人斬,退居二線跟lolita玩魔法心跳回憶,偶爾一道韓漫就令人很爽了。

只不過,爽到中後期,又免不了韓劇那種長夾沉兼慘情催淚硬膠子彈,而且人物深度不足的問題開始浮現。

例如大魔頭沒有甚麼個性,只是很擅長偽裝,最終目的還不是將人間變為煉獄
又因為韓漫世界觀沒有耶教上帝,惡魔們的動機只是單純在人間殖民而已,又要講「讓世界變得更美麗」、「非美即斬」之類,殺完一個人咪又係生多一隻核突鬼,慳d口水啦。

可能因為初時只打算玩短篇小品,劇情舖排不足的問題現在靠回憶來解畫,只怕越倒帶越多犯駁位
唉! 誰說畫公仔不須識字?好編劇去到邊都值錢。

相比起來,烙印或者暗黑破壞神就有深度得多,前者劇力依然澎湃(雖然無以前咁黑暗),後者就患了爛尾炎,只怕回天乏術。

說起來,董事島耕作講到中國的部份也頗好看,可惜不知何故爛尾,看完再寫。

星期四, 6月 14, 2007

設計師專業組織

黑人freelance 初期,剛剛從加拿大回流,滿腔熱血相信香港應該有一個專業的設計師組織,同時,又相信HKDA 呢個建制組織做唔到野,應該推翻從新來過。

當年,好傻咁俾兩個中年笨伯厄左去跑腿,幫手「in general 地推廣香港設計
幸好黑人在大學時代已經有搞組織經驗,見識過空談理想的合伙人,雖則都依舊熱血上頭被人昆左入局,至少仲可以抽返個身出來。

幾年之後,建制沒有被推翻,所謂的革命組織,淪為小貓三四隻的茶會,成班人圍成一圈吹下水,吹完就覺得已經 promote 左香港設計。

現在不時都會收到佢地的newsletter,通常都係吹水座談會及興趣討論(eg. 一班人抱怨客戶唔專重design, 西九龍與後現代主義等等)。

對比起加拿大專業平面設計師公會 R.G.D.,初期核心成員花數年時間蒐集資料、做問卷調查,最後向政府反映有成立專業公會的必要。成立後,先後為設計教育定立基準、搞業界seminar、設立考牌制度、做全國薪酬調查、推出專業指引等等,咁先至算真正推動到設計發展。

而黑人又極相信呢類工作,必須要進入建制之內先可以做到。而且大多數都係政治與deal making,跟graphic design 無關,中年笨伯及烏合之眾根本完全無能力做得到。試想一下,跟Adobe同Poly U做deal,需要的不是graphical sense,而係political sense 及business savvy。多倫多就有Adobe Indesign Scholarship,設計學院規定教indesign,學校得到R.G.D. 認可,學生有錢袋,認為Adobe 無敵,呢種三贏 deal 香港有邊個做得到呢?

參與HKDA都係希望撈取短線政治利益,因為入到去做會長,名氣響d,接觸大客戶亦有一定便利及公信力,通常只能做短線小動作,例如seminar,展覽,有少少交流活動已經謝天謝地。

即使政府亦只著眼高增值的創業行業 (電影及時裝),平面設計要有出頭日,難。

要推動香港設計業,需要的不是有art sense的年輕人,而是一班有遠見又有錢的 deal maker與 politician 。

渣部坦克隨時輾死幾件art sense 青年,懂得做deal 的design 政治家真係前無古人,後亦不見有來者,更不知點樣培養出來

20年後受過大學教育的一代掌握權力,當中若能有一二人符合上述條件才能起步。現在時地人皆不適合,算吧啦。
practice record: 2km

星期三, 6月 13, 2007

Professor Liebstrom



Shoot the dog 歌詞算不上懂,歌曲也屬平平
不過MV 的卡通幾有趣
Tell him "Tony Tony Tony, I know that your horny, but there's somethin bout the Bush ain't right."

George Michael 還未算江郎才盡,但人氣下滑卻是事實
一些敏銳的fans已經聽得出米高的key不復當年勇
Billy Joel 近年翻唱舊歌都要降key
人真係要趁年輕好好發揮...

偶然發現一個頗資深的音樂blog,自問就寫不出咁詳細的東西
寫左咁多 George Michael既entry,係時候停一停。

practice record (2km)

星期日, 6月 10, 2007

Cowboys & Angels

星期日返office 工作的感覺很奇怪。
若果今日唔做咁d野,下星期會好辛苦
無乜心情寫野

聽下歌啦~ Cowboys and Angels by George Michael
MV應是網友自行加上去,正歌加靚女,夫復何求。



以前有人玩過「一青窈」slow down 變「平井堅」
鬼佬都有玩呢味野

星期六, 6月 09, 2007

Branding


最近講開劣評如潮的奧運的logo。黑人卻認為整個campaign的出發點很精彩。

Seb Coe 和Tony Blair 指新logo意在將奧運年輕化、平民化。伴隨的短片,將體育精神和平民百姓大幅拉近,二人還堅持「倫敦不是一個沉悶的城市,她未必適合所有人口味,新奧運logo必須具有獨特個性,而不是穩穩陣陣的企業設計」,黑人看得幾感動。

向來所謂推廣奧運精神只是一個很空洞的口號。沒有運動習慣的人覺得奧運不關自己事,至少黑人自己是這樣。

若果campaign能夠貫徹上述的方針,將奧運由國力展示變成推廣全民參與體育,那是極大的進步。

見到上述兩位大人物的說話,又不禁反思自己有沒有forward thinking 去接受一些大膽的新嘗試。抑或黑人心態已經有點老了,覺得某些事必定要按某種法則做,不然就是離經叛道?

2012 London Olympics 背後有穩固良好的前瞻理念,即使visual惹來爭議,整個campaign將會成功。

*******

翻看Landor 出版的Brand Strategies 2004 case studies。以前總覺得這類書是純粹Landor 省自己招牌的吹水東西。誠然,一些乏善足陳的campaign 只佔象徵性的篇幅,例如France telecom 或者香港的甩皮甩骨飛龍,簡介也行貨的可憐。

Waltor Landor 強調 design 是長遠的東西,advertising 就是短線的手段,這是黑人畢業而來第一次接觸到最清晰的分野,以前即使問資深廣告人,也只會靠 the line 去分,above就係筍野,below就奶野。Design 人除左答你廣告界是一個食人的地方外,亦無法講到甚麼實在的答案,浪濤先生,謝謝你。

一直接觸到的branding,不論在學堂還是實戰,涉及的層面也十分皮毛。

以前接觸的branding,就是logo, 信封信紙名牌等一籃子東西,較具規模的會整多個style guide,公司規模越大,style guide 就越大本。見過某些本地設計公司還堅信本style guide做得靚就是成功了。

黑人認為,這些東西只是門面「變靚d」,並無實質改善。

黑人大膽地假設(因為沒有在branding 公司做過),真正企業形象設計就有如2012奧運branding,先建基於一個前瞻性的理念,透過design將概念用視覺語言實體化,隨後再以PR / advertising等手段介紹予公眾各界 (design佔的比重其實不算很大)。

投資branding 有如投資長線股票,買的是前景而不是現在差價。Designer 對著illustrator無可能砌到公司的前景,還須research加上跟公司領導人和員工達成共識。

當公司上下知道logo所代表的願景,並確切實現其含義時,branding才能夠真正幫助發展。

若果基於以上假設,brand Hong Kong真係幾失敗的,一來並沒有持久執行,二來沒有公眾認受的具體願景,三來它的出生時辰八字不佳,每次提起就會聯想到董七年!

星期一, 6月 04, 2007

野炊達人大進擊




一直忘了將這本書納入「己讀」清單中,因為實在沒有讀完的一天。並不是說其內容博大精深,只是幾個中年漢的吃喝遊記罷。


要類比的話,就有如一首歌沒有「聽完」這回事,播完了,餘興未盡,會repeat多一次,又或收錄在ipod shuffle 的playlist,有緣的話再聽。此書也是這樣。


作者寫的東西,平常人大概很難吃得到。例如從田野獵回來的貍、獾、野豬、蒙古的山羊、新採下來的竹筍、奧多摩治助馬鈴薯、正宗油炸豆腐皮等等。


除了菜式好像寫得很美味,故事性亦不俗,感覺有如去了旅行獵奇。作者將每道菜的製作過程 (當然不是三匙油兩匙鹽那種) 詳細寫下,例如貍肉原來臭不可耐,無論怎樣辟腥臭也沒用。幾經轉折,終於查到需要用稻草將貍肉埋入地底三日,再挖出洗煮食用,依法一試,果然化腐朽為神奇。


另一次,作者為了品嚐正宗的「治助」馬鈴薯,特意在奧多摩安排耕地。相約朋友們挑糞水親自下手栽種。次年收成,大伙兒圍著馬鈴薯鍋,醮上味噌醬和長蔥末,感覺應不遜長渣的股票大漲。


還有燒竹筍、烤野豬肉等,每篇都是一段adventure。


人到中年,事業有成不須頻撲勞頓,居然還有一班豬朋狗友肯四處跑幹傻事 (eg. 耕田),傻勁之餘又很認真的做資料搜集,那是很難得的赤子之心。山珍海味大陸不是沒有,有錢甚麼都吃得到。但最難得的調味料,是過程期間的appreciation 和effort。


黑人身邊2x歲前後的朋友連上山BBQ 也很抗拒 (太費力了,不如去巴西燒烤)要露天營火燒竹筍晚會,恐怕只能靠這本書滿足一下幻想而已。


除了文字精彩,相片和插畫也有趣,間字typo也做得好,值得收藏。


椎名誠及林政明著,孫玉珍譯,遠流出版。


(頂,臨訓寫呢篇真係玩死自己,又肚餓)

星期日, 6月 03, 2007

what if

「我一心想幫人,點解有人走來做架梁?」

有人在forum求助感情事,朋友m跟不少熱心的網友一樣提出意見。但不幸地,有人鎖定朋友m玩針對,不斷拋出質疑和影射 (但沒有自己的意見或想法),純粹為了展示"critical thinking",引起他人注意 (ie 挑起罵戰)。

這種人,黑人以前也遇過。

話說以前黑人常蒲豬多金,有日在relationship 版見到一個頗奇特的求助故事:

話說一對情侶,女的堅持婚後性行為,大家親熱點到即止。一次吵架,男友突然拿住卷牛皮膠紙將個女仔綑綁封口,女仔嚇到係咁震,期間個男友係有些性舉動的 (忘了是甚麼),綁了好幾個鐘,個男仔終於肯鬆綁,不斷say sorry 之餘講了一個很lame的理由,大概是怕女仔整親自己之類。

女事主問各位網友有何對策、男友是不是變態、會唔會姦殺我 etc etc

豬多金雖然多維園阿伯,仍有一些人比較有sense,首先問個女仔現時是否安全(yes),其次問是否愛個男仔(yes),有無再發生(no),繼而就建議雙方一齊睇心理醫生,尋求解決辦法。

黑人對bondage, S&M 文化丁點認識 (不限於A片但非親身經歷),估計個男仔其實係鍾意SM的,做左咁耐純潔小綿羊,突然因為性慾到+大幅度情緒波動,跳fuse做左平日唔敢做甚至唔敢提的事情。

黑人繼而就解釋,每人多少都有些特殊性癖,有人戀臀,戀足、戀手、戀巨乳、貧乳、戀物、戀制服 etc。只不過有些性癖較常見,所以多人接受,較少見的則被認為變態。只要不是戀屍戀童亂倫或有自毀傾向,問題都不大。不過,最好找專家輔導,好過就咁滿足或deny 個男仔。

大多數的建議其實十分正路,照計講到呢度已經case closed。

之但係,有位朋友為左証明自己有「思便能力」(thinkshitability):
「萬一個男仔姦左你點算呀?」
「你點知佢聽日會唔會失控?」
「我估佢童年應該xxxx, 缺乏yyyy, 所以zzzz,你應該即刻離開佢!」
「你點知佢會唔會做戲俾個醫生睇扮正常,返到屋企就綁架你?」
「我只係從另一個角度去思考,為左個女仔好。」

當時佢十句有八句都是衝著黑人而來。而黑人有樣缺點,就是唔衰得兼夾無聊,一定會同對方拗到底。

不過最終無咁做。

拗得越火,佢就越開心。而且特殊性癖易攻難守,舉example隨時嚇壞女事主,甚至將二人間的房事扯上道德層面批鬥就前功盡廢。

黑人只是跟女事主講「凝住佢係強姦犯,嚇死自己,對成件事又無幫助」,「睇左醫生就信醫生啦,莫要聽我地呢d業餘網友亂咁估,無謂影響療程啦」

思便大師挑選的arch villain (小弟)一直當佢透明,為了引人注意,思便大師講的例子越來越偏激,鑽晒牛角尖,希望將末日鐘推向11:59.9 pm。

幸好當年未興玩分身自己支持自己,多數的網友有sense 之餘又真係幾supportive,最終女事主講返佢男友已經無事,大家依然agree 婚後才有性行為,但親熱時會俾佢綁下,而且經此事後,感情比以前好左,多謝各位關心。

why 可以令自己看上去好像很有見地,what if 可以將最普通的事變得可怕。不少網上思便大師經常用來掩飾自己的空洞。

想起Coldplay 的What if :




What if there was no light.
Nothing wrong, nothing right.
What if there was no time?
And no reason or rhyme?
What if you should decide
That you don't want me there by your side.
That you don't want me there in your life.
What if I got it wrong?And no poem or song..
Could put right what I got wrong,
Or make you feel I belong
What if you should decide
That you don't want me there by your side
That you don't want me there in your life.

Oooooh, that's right
Let's take a brave jump over the side
Oooooh, that's right
How can you know it if you don't even try?
Oooooh, that's right

Every step that you take
Could be your biggest mistake
It could bend or it could break
But that's the risk that you take
What if you should decide
That you don't want me there in your life.
That you don't want me there by your side.

Oooooh, that's right
Let's take a brave jump over the side.
Oooooh, that's right
How can you know it when you don't even try?
Oooooh, that's right
Oooooh, that's right
Let's take a brave jump over the inside
Oooooh, that's right
You know that darkness always turns into light Oooooh, that's right..