星期一, 7月 30, 2007

周瑮


偶然在70樓睇到呢篇文,沿住條線一路睇落去,感受都幾複雜。

1. 小弟個blog都試過被人cyber-bullying 不斷貼粗口

2. 自問又真係幾鍾意睇 AV。雖然睇的AV都是收費的,但係覺得BT AV是一種necessary evil,大家某個階段都會做過,敢唔敢認一回事。

3. 近來的青少年風化案,少男強姦少女案固然令人髮指,但四皇一后果單case,卻不是甚麼新鮮事,以前在she.com 石屎版睇唔少十幾歲的集體true or dare 回憶錄,輸左不是罰濕吻,而係除衫除褲甚至罰BJ 罰打飛機。黑人不是認同這些事情,只想講不是近日才有,更不是因為BT AV 片猖獗才發生。

4. 人的本性就是搵代罪羔羊祭旗。小朋友齊性交,一定係睇得咸片多!多年前,美國某某小鎮有個小朋友拿支shotgun 隊林全家,傳媒在佢睡房一看。咦? Dungeons & Dragons!不得了,一定是令人有嚴重暴力傾向的遊戲。Dungeons + Dragons = Death!

5. 黃賭毒是人性不可分割的黑暗面,無可能禁絕,但可以立例規管,陳以利弊,讓人自行選擇。記得倫敦SOHO區某些書店,地面那層是藝術書,地庫乜都有,gay, les, gang, 戀物癖, 性虐etc,落去睇書的不是「時下青少年」,往往係衣冠楚楚十足道學先生的老外。佢地就係在果個小小的地庫滿足左最黑暗的幻想,行返上樓先至可以繼續當別人的老公、老婆甚至老師。

6. 指斥青少年性道德敗壞的人們,應該反思現在的性教育是否依然係兩張人體解剖圖?有邊個夠膽在堂上跟學生討論戀鞋癖呢?斷估最叻就係譚育英姐姐式的教導:「各位千祈不要學,發現有類似症狀就要叫家長一齊搵心理醫生輔導」,呢類教育只會令處於反叛年齡,有性經驗或特殊性癖的學生被打進邊緣,無法做到教育的效果,誤人子弟往往出於一片好心。

7. BT AV是雙重不道德,道理上好難為其辯護。日本不盛行BT,卻會將睇完的AV 片流到二手市場,呢樣野好難照搬落華人社會。正版的日本AV,售價由三數百至六七百元不等,到底如何將法律上的刑罰、AV片的售價以及人的性慾三者取得一個平衡點,係一個比盜版軟件更delicate 的難題,難題在於,盜版軟件尚有空間討論,盜版AV卻沒有。

8. 就算俾你學似大6同星加坡咁禁絕晒,需求始終有響度,唔係一刀切世界就會乾淨左,即使切左人地條J都係咁話,唔通封埋女人個gap咩?唔好以為女仔就唔睇AV唔玩咸game,一樣大有人在。不信,試試走去信和某同人AV店子,經常有少女及OL三五成群 (壯膽?)翻閱BL H game catalogue。

9. 周瑮寫得呢類題目,真係預左俾人圍插。佢唔知有呢個風險,只怪佢唔夠Golden-savvy。呢一點我幾認同袁彌明的見解。

10. 歡迎討論


頂...六點幾又訓唔返,食左早餐出去游水先!

************************

後補:

書展買的設計書

星期六, 7月 28, 2007

100回目達成!




據聞去到第100 篇就會失去"勢頭"被逼休blog,到底是否屬實?

我想是的。

人的下意識很容易受影響,令主觀事實改變。

最近刨書展搜刮回來的Blink,看了約7x頁,大概也是一個idea 脹大再用不同例子貫連的美式棉花糖書籍。話雖如此,把它當成一個六十分鐘專題報導來閱讀,趣味性還可以。

當中引述幾個例子,案例之一是叫學生做幾個簡單的重組句子練習,奇怪的是做完之後,學生離開時步速會變慢。

原來習作中藏有大量意象徵年老的字眼如gray, worried, old, wrinkle等等,在過程中滲進當事人的潛意識裡,令他不自覺表現得像個老人家 (行得較慢)。

書中稱之為psychological priming,且勉強譯作「心理塗抹」。

書中提及類似的「塗抹」實驗:將一班黑人學生分成兩組,同時進行考試,其中一組在試前須填上自己的祖籍,另一組則在試前花五分鐘想像一下自己身為教授並寫下任何有關的感想。

結果兩組人的考試成績相差達25%,第一組人下意識聯想到各種關於黑人的stereotype,覺得自己不夠聰明。相反,另一組人以為自己較聰明,故比現較佳。

(死喇...黑人成日叫自己做黑人,若果叫白人係咪會有運行呢?)

其實上述的例子跟snap judgement 算不上有太直接關係,Blink真正主題是人類如何在短的時間內以極少的資訊作出正確判斷,例如見工面試、speed dating、購物、打波甚至打機等等。

問題在於人無法有意識地暸解這種思考模式,作者認為snap judgement之所以快,在於濾走了大量的資訊,甚至在邏輯思維未起動前已經運作完畢。

所以黑人成日覺得,好多自稱理性的消費者,只不過用一套看似有邏輯的說法解釋自己的潛意識行為。書中甚至提及索羅斯及其老父也是靠直覺行先,事後先至搵証據支持。

我的直覺叫我快d訓...個layout留返聽日先做,信唔信佢好?

星期二, 7月 24, 2007

書展



花了差不多成千銀,今次無乜點買design 書,書得起、page瘟都無晒有質素的日本graphics書,頂多都係放些炒雜碎潮童graphic books (我估呢d書最受歡迎)。反而Japan Art Director Annual, Applied Typography annual果類書就唔見晒。

再查返本directory,原來走漏眼,無去到競成以及Nippon International Publication Service 呢兩個攤位,以往最好的日本design書都是在這兩處買到。聽日有時間或者會作最後衝廁掃多一輪...荷包傷晒!

書展越來越保守,只怕HR Giger, 空山基呢類插畫大師以後無緣再登場,以前買空山基的裸女畫集真係靚到dum一聲,後來佢唔知痴左邊條筋,將舊作翻新變左SM版,果d女人著晒金屬及橡膠奇裝異服,又真係正常人未必諗得到既,而且...佢係用最傳統的air brush作畫,唔似我地宜家有photoshop,宜家乜7工具都齊,做唔出好東西是人的問題囉。

上書局all star 上陣,先後向蔡子強、道長以及劉細良索取簽名,仲有幾個我唔識的,而沈旭輝未到場,無緣見到號稱30會最靚仔的青年才俊,嘿嘿。聽返梁文道同劉細良把聲,幾懷念佢地以前做打書釘的日子,始終以當時最好聽。

去左全力圖書掃喬老大的著作,因為我同朋友w的荷包都重傷,所以決定大家各買一部份,w買了全套殺禪。本來仲有機會可以向喬靖夫取簽名的,但係要等多差唔多一個鐘,又已經周身行李,唯有作罷。

新買的blink似乎幾有趣,講解人類在一瞬間判斷事物的行為。可惜小弟blink錯左,買左本2000年的日本web design annual...DLLM丫...當時d野呢...十足frontpage整出來的業餘作品,若果唔係d photography救返件事,真係可以丟落垃圾筒,雖則係二手台灣野,$120 ,不過阻訂丫嘛...

星期三, 7月 18, 2007

improvement


創意前輩講過 (忘了是ogilvy 還是paul rand),若果一份design 你無法做得比上家好,就不要接。

小弟現在就面對這種困境。

上一手的design其實並不算差,至少沒有明顯的缺陷。而客人亦沒有明顯的不滿
接到這單job,純粹因為個客有其他理由轉supplier,而我碰巧是supplier 用開的designer 而已

開會後的感覺是這個客很難服侍
個客見慣風浪,慣左走精面、凶人、敷衍人等等,甫坐低對方已經在衡量誰吃誰 (像黑人這類小角色,她是衡量怎樣吃)

開會傾左兩個幾三個鐘,主要是聽對方曬命,包括佢的身世、發跡史、about us、contact us etc
至於點樣design,查實真係無乜頭緒

若果唔係朋友開到口,呢個客我甚至可能一開始已經唔會approach

應承左,又係要頂硬上。不過做左少少預警功夫,劃定止蝕位,講明改幾多次之後就唔改
good fences make good neighbors

暫時大家都要互相依賴,要在「抵得諗」同「醫肚」之間取個平衡位,又談何容易。

原本想睡一覺明早再戰,諗諗下,以往經驗係睡一覺後果day 被人追到瘦,壓力下係做唔出好東西的

甚至連貨都交唔到,所以通一晚比較穩陣

身體實在對不起了...明天會好好休息

星期日, 7月 15, 2007

one more night



完全道出近日的心情...
give me just one more night...
oh one more night
one more night
coz I can sleep forever...

風格論




近日太忙,好像做極都無得停。現在最低底線是儘量維持休息時間,暫時寫不出有深度的blog,rant 就可以寫好多!

曾經見到有些人做了好多年design,production 是很熟了,印刷對稿肯定不會錯,但做出來的稿就是唔對路,而且變唔到。

又或者,接乜job 都用同一種"style"去handle...(黑人成日覺得做design 幫人解決問題第一,表現自己是其次)

因為好多創作人去到若干年紀,做出來的作品會老化。到底經驗和歲月會令一個人更純熟地表達自己,還是會令人有一個comfort zone,停止創作?

自己會否去到某個位就技窮?諗起都有點擔心。

星期四, 7月 12, 2007

請求

其實今日有野趕,根本就唔想寫blog
不過既然小弟個blog 發生接連粗口炸板事件,仲影響到多位黎呢度留言的朋友
小弟先同受影響的人講聲對吾住先!連累到你地!

先澄清一下,黑人近年無「搞甚麼事」,亦已經好耐無在forum 上同人發生口角
即使業務上有磨擦,頂多各行各路,河水不犯井水,呢類case 都少到數得出

近幾個月來,周不時都會有一位匿名人上來post d 粗口entry
通常黑人都係刪左佢就算

講真,要數月如一,咁堅持地上來post 粗口
除非精神有問題,否則就需要跟黑人有相當大的仇口先至得

自問雖然不是心細如髮,但為人尚算謹慎,有幾多個朋友、仇家
向來心中有數 (因為二者都少)
而且呢位仁兄無意中透露左佢響邊度認識黑人
令個suspect pool 縮到得返兩人,一個是黑人的朋友
稍為追溯一下d歷史,拉返d線,最終指晒去一個人度

我勸閣下真係好停手喇
玩呢d唱衰遊戲,永遠唔會有贏家
when things get uglier,大家只會一齊輸
我咁講唔係一個threat,你當係reasoning又好,pleading都好

請你讓我在我呢個小小的世界混日子
大家各行各路,就當彼此不認識
為免惹人誤會,我亦不會增減過往的entry

星期三, 7月 11, 2007

假圖假字

砌稿時,間中會落假字或假圖作place holder,讓客戶大概知道 look & feel。

英文稿最出名的假字就那那堆像哈里波特咒文般的Lorem ipsum。中文我不知,知道的同行請解說一下,謝謝!

以前在小型廣告公司工作時,copywriter 和account servicing 都是同一位同事擔任,往往要在沒有文稿的情況下先行做artwork。當時黑人剛在日月神報打滾不久,習慣精確文稿及成set圖檔照單執藥。對廣告公司使用大量的假圖假字極不習慣,覺得甚麼都是假的,實在浪費精力。

近來,黑人處理一單案子,擔任的就是account 和 copy 兩個位置,由朋友負責design。

現在才發現,要將客戶的指示隔渣過濾,再將所有資料整整齊齊寫一套指示給designer,原來都是很吃力費時的工作。(以前負責跟黑人接洽的客戶們,實在難為你們了!)

又因為同時要肩負另外兩單案子,一時騰不出時間對好成份copy。

客人不斷催稿,唯有叫朋友落假字假圖。

朋友在神報工作久了,對落假字的反應,跟黑人以前一模一樣:「你不如叫個客firm 晒d野,再話俾我聽點樣做啦。」

黑人現在就處於一個「大林麻」(dilemma)當中,自己動手砌晒,隨時快過慢慢教朋友點做,因為佢在工餘時間砌,可能完稿個客都夠鐘放工。

何況,朋友砌完仲有個risk 係捉唔準個客的taste,以前都試過唔止一次。因為捉feel 呢家野,只能意會,難以言傳。

自己砌晒雖然快d 完事快d收錢,但又會得失朋友。搶左佢台戲來做,感受一定不好。

不做,又真係趕唔切,現在已經behind schedule 3日,照現時的turn around速度,必定遲多三四日,來不及上機赴印,大家一鑊熟。

唔夠production time,大家都不想的,客戶很遲才收到貨版,影product shot 都翻左幾轉,寫copy 就更加...大家都想俾designer 多d時間做野,只不過守尾陣就要cover 前面的mistakes...all shit goes downhill,請遲些才發我脾氣吧!

借袁崇煥一句:「掉那媽!頂硬上!」

星期一, 7月 09, 2007

日式pitching

通了兩晚頂,為了趕一個pitch (回報合理的話,我不反對pitching的。)

開會過程順利,自問做出來的mockup 水準尚可,照計成數都頗大。不過事情發展總會有變數,聽得太多sob story 死於親戚裙帶關係,明明條橋和design都比對方好九條街,就是輸在對家是老闆的皇親國戚,未出戰先勝出。

總之做最好準備,最壞打算,其餘一切隨天。

同事說整個mockup 極具日本風,若果個客buy 呢味就perfect,否則都幾麻煩。

一向對日本的typography 及插畫極具興趣。奈何只學得其形,未具其髓。日本是精於工藝的民族,例如像港式茶餐廳牛雜煲這類粗糙菜式,日本人總是有辦法將它擺得很精美。

日文筆劃少,似graphics 多過似文字。平假名傳統味濃,片假名則適合潮流事物,遇上較有深度的題材,更可以選用漢字。中文就沒有這麼細微的區分。雖然不太喜歡簡體字對中國傳統文化的破壞,但站在設計層面來看,簡體字也相當graphical,有一定優勢。可是簡體字的在文化層面的associations 還是負面居多,需要時間沖淡。

瀏覽器使用的字款,亦以日文字的製作最佳,繁體次之,簡體在美感和可讀性上最低劣。

中國人著重意境和大體,細節很粗疏,日本人相反。所以有時日本人的作品比較小家子氣,亦難以拍出氣勢磅礡的電影場面,但絕大多數的設計及工藝作品都是日本人天下。看日本人的portal site 更加可以體會這一點,相比起國內的資訊網站 (如簡體版的tom.com),那是一大堆pixel 雜訊,不是給人類閱讀的。套用國內的說法,是「資訊這個大方向抓得牢,美感這東西嘛,湊著看點兒罷。」

星期四, 7月 05, 2007

感想

見到李永銓對香港設計新一代的評語 (please jump to pg 70),這類的說話不知聽過多少次。

若果這是一條10分的會考中史短答題『試述香港設計衰亡原因』,model answer將會包含以下數點:不思進取(2), 眼界狹窄(2), 人才惆零(2), 民怨蓋天(2), 宦官弄權(2)。

(1)
為甚麼香港設計業沒有人才?我相信一個城市無可能連一個創作人才也產不出來,尤其是資訊較內地相對開放自由的香港。其中一個很主要的原因,就是設計行業的行業形像、待遇以及前景均無法吸引精英入行。一個有創作能力、有國際視野、精通兩文三語的人才,會考慮 8千元月薪能否開飯搭車供樓還grant loan,而且稍有長遠眼光的人都會知道做設計是一門消耗精神體力的行業,要追software,要挨夜,轉行出路窄,肯定做不長。設計熱誠的基本燃料是錢,沒錢甚麼都免談。

(2)
咁是否出手低果班老闆應該拉去打靶呢?我相信多數公司若果經費許可,都寧願出多d錢請叻人。問題係大客都已經北移,對多數跨國企業而言,香港已非重點市場。剩餘下來本地的二三線中小企客戶,可賺取的利潤有限,甚至能否建立長遠的合作關係也成問題,design house 出手低,跟佢本身賺唔到大錢有直接關係。

(3)
香港設計師本身都有頗多困局,唔係話熱血就可以解決到。例如對大陸文化認識不足,不是認識多d就得,換著我係design house 老闆,都寧願請本地薑 (最多搵一兩個art 大碌柴head 住) 好過請香港散仔上去,話晒大陸人口味梗係大陸人捉得準d,成本又平一大截,香港人點肯逗四千蚊RMB人工呢?

Dr. Li 仲以為香港人覺得自己優越,大概係佢自己對香港設計民情已經多少脫節吧?

講座無人發問,除左係佢所講的原因之外,可能亦都係「問完,咁又點?」與其俾位你入,不如留氣暖肚

對不少香港設計人來講,好多晉升的路已經斷左,對大陸人卻不然

望到有明天的人,即使今日仆街,都會努力向上爬

到底是吃肉糜還是無飯開,有得揀嗎?

星期日, 7月 01, 2007

大遊行

今年71去維園,認真甚麼訴求都有,例如屯門某居民團體反對興建垃圾站、漁民不滿航道安排、屋苑法團、投訴聖經暴力色情的年輕人、家暴關注團體、婦女權益關注團體、香港性研究學會、同志組織、台獨份子、天主教、佛教、基督教還有少不了的法輪功,人人有自己的口號,百家爭鳴。

見到維園所有球場爆滿,雖未滿溢至SOGO (03年那次71),心忖至少有十萬,原來民陣浸水發大的數字也不過六萬,也不知是可惜還是可喜。

眾多團體之中,以亞傭團體的口號最代表所有人的心聲:「^$ffsdfqreash%@#$!@#...加人工!加人工!」

真係想響應埋一份。

有些左派份子自製橫額,指斥陳日君也不是民選、教宗也不是普選產生。姑且不論他們有無道理,膽色和誠意是貨真價實的。

甚麼時候有普選?不少人炒股賺到笑,肯定不是現在。等股市樓市又大爆煲(touch wood),大家就會記起獅子山下爭取普選的日子。