星期一, 3月 31, 2008

忠言逆耳

跟網友提起這個字,黑人總覺得這類成語有太多前設。這句話令人覺得要勸誡朋友,必須用上令對方反感的辭令。於是無法老起臉皮的人,乾脆閉口。

另一個假設令人覺得硬碰硬發炮,是展現友誼和忠誠的方式。

引伸下來,如果對方拒絕你的忠言,就是「不當你是朋友」和「繼續沉溺」。

黑人想提出幾點:

第一,忠言不一定逆耳。(朋友,得閒無事多相見!)
第二,逆耳的,不一定是忠言。(我燒你數簿杏家橙)
第三,忠言,又逆耳的,也未必一定正確,只代表這是honest opinion。 (你個死窮鬼想靠打工發達?咪發夢啦,如果當我係朋友,聽我講,明早即刻走去儘買4466,一定升!)

見到不少人因為一句「忠言逆耳」陷入二分法邏輯死胡同:好聽說話就是騙人的,硬繃繃有刺的才對朋友好。朋友有事,舉棒打小人是為了他好,安慰和「不批判」則害了他。

諗真d啦,朋友。

(看完謝昭仁和伊藤高史全套「朋友」電波少年後)

星期六, 3月 29, 2008

武將的分類

某日,實頭與黑人傾閒計,講到史上恆河沙數的武將。

黑:「武將分很多不同類型,有些是信賞必罰型,是信將。以衝陣見長的是闖將,一味靠符碌都有分類,叫福將,那麼靠智謀的武將叫甚麼呢?」

實:「智將!」

黑:「對,你就是智將囉。」

星期四, 3月 27, 2008

Acappella 的俊男美女



俊男組合翻唱Misia 的Everything



大塚愛再加糖

且讓黑人之心度君子之腹,總覺得個cam man 有心整蠱個肥婆,咁多野好影唔影,係要咁樣close up。留意下兩段片,佢個表情對比十分明顯,心情不言自喻。


黑人認為唱得不比中島美嘉差的 Glamorous Sky

星期六, 3月 22, 2008

迷你電影節

檔期間隙,接連看了幾套戲:23不祥、Full Metal Jacket和Raging Bull,不計昨日的The L word 還有米高曼的The Kingdom。

(其實,假期後我係有野要交的。)

(又其實,呢兩日都有野要做。)

(可唔可以俾我停一下,畫下公仔跑下步同埋煲劇集呢?)

今天看的三套戲當中,以Full Meta Jacket 最為深刻。寇比力克的大師級作品實在沒話說,頭半段訓練已經是百年難見的經典,飾演教官那位演員本身真是軍隊教頭,電影中他鬧9學員的粗口爛舌接近一半都是臨場爆肚。更甚者,casting 時最高紀錄是15分鐘不斷鬧臭對方,內容完全沒有重覆,爛口到了這個地步,不能不算是出神入化吧?

這套戲小弟當日看了兩次,以前第一次接觸奧利華史東的殺戮戰場 (Platoon)已經覺得很正,FMJ的戰爭場面或不及現在的雷霆救兵或者殺戮戰場,但劇力絲毫不減,全靠對白和精密剪接的功勞。相信這是千錘百煉得出來的成果。寇比力克一生七十載只出13部電影,每一部都是精雕細剢前無古人之作,這類級數的大師,必須在某些特定的文化土壤才能培養。黑人主觀地認為平均3年出一套電影、10年畫一套漫畫在香港都是不可能發生的。我們的文化氣候只能泡製提子汽水和釀新酒,高價的陳年佳釀還須靠外國進口。

天生對黑白片有些抗拒,習慣了節奏明快劇情鮮明,一見到黑白片就會聯想到慢和悶。因為之前腦袋已放了其餘兩套電影,品味Raging Bull時未免就打了折扣(其實raging bull的劇力也很強,但吃完辣咖哩就嚐不出魚生滋味)最驚訝當然是羅拔迪尼路37歲人,同一個角色 2x歲到60歲都演得到,主要方法就是先操到極fit 拍年輕時的劇情,再爆增暴肥飾演年老時的角色。這種演戲方式其實頗賣命,連導演也不敢拍太久怕羅拔迪尼路的身體受不了,年輕一代的麥迪文未成名之前亦嘗試為一個閒角大幅減磅至道友身形,完戲後醫生說他的心臟差點就會萎縮。這麼想來,銀色工業的錢也不易賺。

Number 23 是三套當中最普通的電影,只可以講故事為了奇情,太刻意營造謎位。記得以前有一套講魔鬼作家的電影(名字已忘),主角是私家偵探,受託尋找一個脫稿失蹤的人氣恐怖作家。偵探希望透過小說尋找線索,卻驚覺恐怖小說的情節無可避免地在他身邊逐一實現,原來作家早已被魔鬼附體,每一部作品都是將人類推向瘋狂的催化劑,看畢全套小說人類就會完全瘋狂,地獄之門也就會正式打開。雖然只是一套B級質素的電影,至少不扮高深,比number 23緊湊得多。

案頭還有飛越瘋人院和「瘦尊」的週末狂潮,從來提不起勁去HKIFF的電影節,唯有在家中搞一個超迷你版本。

星期五, 3月 21, 2008

What the F is the L word?

剛發現一套叫 The L word 的劇集。自問只識The F word,再看其中文譯名「拉子至上」,也沒有敲響一個鐘(doesn't ring a bell)。

看見簡介圖片一堆裸女摟在一起,也就深深體會一張圖說一千字的道理,拉子用國語讀就是Les (Lesbian)。

這是一套以女同志為主題的劇集,因為眼訓又沒字幕,看了第一季頭三集接下來就跳來看。粗略看完,第一個感覺是「煩」,每個角色千絲萬縷、剪不斷理還亂的關係,煩得可以。故事中有位雜誌記者甚至泡製了一個人物關係圖,十萬個人名,其中一位帥女Shane由於跟無數個女人上過床,要準確地把她的關係圖繪出來是不可能的。一堆人名,不斷離離合合,A愛B,B愛C 然後又回心轉意,但A又已愛上了Z,不過Z同時又有O和P 之類的大亂鬥,想起來就頭痛了。

另外,也深明劇中出現的男人不是奸角就是旁枝綠葉。第一集出現的男女couple Tim和Jenny 本來都是金童玉女配,然而劇情發展不出20分鐘Jenny就變成les了 (這也得怪男人太笨搬入同志區住,自己日日被基佬視姦,女友被同志撬走),拜托,雖然主調是拉子,能否間中有些straight couples 調劑下?是否身為les就對男人特別抗拒?似乎也較少接觸到homo 和hetero 融和共處的片子,記憶中The Devil Wears Prada 入面不斷幫女主角那位Nigel 已經是最近磅的角色,但由於戲份太少,他比較像Metrosexual 多過似 gay。

The L word 涉及大量極富爭議性的東西,頭一集已經講Bette 和Tina 為了成家立室,不斷找男人捐精的麻煩事,固然有由直變攣的情節,也有長年不敢出櫃的例子。甚至後幾季講到變性、由攣又變返直等等,在香港都是提也不能提的禁忌領域。事實上這套劇也不太可能在香港放映吧?兩個女人床上戲,一露就是四至六點,每集通常有兩對couple搞野,條數為起都有十點,高過亞視大部份節目的收視率了。根據林嬸署盲光社機械式的評級方法,八級都黎緊頭。

記得好些教徒在論壇上會說同性戀是違反天理倫常。黑人想反問一句:用機器幫病人洗腎算不算違反天理呢?用呼吸器幫人呼吸又算不算違反天理?那些人不應該活那麼久,是我們大膽逆天而行延續他們的性命罷!至於「倫常」就更好笑,除非那些教友現在還相信君君臣臣父父子子和君主社會,否則就不要隨便祭出倫常這兩個字吧?

頂,講到慶起。男人真係要有火先得,尤其對住果d 約左人出黎食飯跟住唔得閒改為飲野然後又大支野要人食住等到十二點幾都唔知幾時得閒仲要熄電話最後被逼取消既異見人士,真係火都黎,差落d 飛機帳,好還喇喎。

講返套劇,始終The L word 不是小弟杯中茶,咁多靚女,無一件可以做性幻想對像,戲情又代入唔到,幽默情節唔算多,水準是好的,但越睇越無癮是也,睇過第一季,應該不會再睇落去了。

星期一, 3月 17, 2008

教壞細路系列

食食下車仔麵,見到菜單有一欄叫「雲南米線」,而其他種類的麵就無咁好彩,全部都變成無國籍難民:粗麵、河粉...就連原產自日本的公仔麵,都無得叫做日本公仔麵 (咁叫即刻高級好多)。

諗起雲南米線,又好自然會諗到過橋米線。

小朋友:「黑人叔叔,點解叫過橋米線既?」

黑:「拿...其實就有個故仔既,好耐以前,一條橋旁邊開左間麵店,佢整d 麵好幼,好多人都鍾意叫外賣黎食。不過呢,佢地請左個好蠢既伙記,每一次送外賣過橋既時候,就會唔小心跣低,整跌晒d野。所以老板娘每次都會叮囑個伙記『過橋咪跣呀!』,咁其他客人聽到,就以為果d 幼麵個名叫做過橋咪跣,叫下叫下就變成宜家咁囉。」

(通常人去到某個年紀,就會覺得自己醒到可以係咁厄細路)

另外好些網友可能要開始煩點樣教小朋友講野,上網搵到d 片,唔知有無幫助



星期五, 3月 14, 2008

不如上我公司丫?

繼續上次講的桃花運

女性朋友又約黑人出來請食飯。有人請,當然義不容辭赴約。但係背後有附帶的線 (strings attached),就係好神秘地叫黑人飯後上佢公司,而且唔好有其他節目。

古時候好傻好天真的年紀,黑人會幻想上到公司後,二人發生香艷的前戲,再來連場三級場面。然後問個女仔「我地即係算點」,甚至真係會蠢到去七仔準備安全器材。

只不過,黑人已經長大喇。

個女仔最初話自己做紅酒生意,但係黑人在一個場合中,偶爾聽到佢係做傳銷的 (公候伯子男爵果類),做酒的傳銷都無乜問題,只要唔係sell 我就得。

當晚,黑人面帶笑容,一直等緊佢開口講呢句話:「我陣間想介紹一個創業機會俾你...」

「機會我就遇過唔少,不過呢d錢,唔易賺喎。我上一次去過某字母品牌香薰公司既寫字樓,果位『朋友』都好想俾d 機會我,但係我差d打人,佢地先肯放我走囉。」

跟住佢行開左講電話,未幾,就有兩位美女同事咁橋收工落黎一齊食飯。同事A與B一位係親切大姐feel,另一位係可愛美少女。

又果然,佢地的策略都係十分類似:「係呢,阿黑人,你宜家做咩工呀?」

B:「哦...咁前境好唔好?每個月賺幾多?」

黑人為左交戲,將實況稍為潤飾,就已經present 到一個十分潦倒的形象。

A:「咁慘呀?我有個親戚呢,又係做你果行...佢地真係好辛苦架,又搵唔係多...二十幾歲,都係得果三萬幾,封左頂喇。」(當然啦,比起你段script所寫的月入十萬,係差好遠)

黑:「三萬幾已經唔錯,只要稍為識得理財投資,每月儲二萬,揀幾隻穩陣的藍籌,做到四十歲應該夠錢退休,身家仲可能每三五七年翻一倍添,六叔果個二百萬投資組合,即使近排跌到趴街,零四年到宜家都翻左一倍啦。」

A:(自知領野)「呀,又唔係既,佢要養家,阿爸走左,阿媽又無做野,所以都幾辛苦咁...」

黑:「哦,又真係幾慘。」

跟住不著邊際講左一輪,A拿出佢的道具:八卦雜誌,「隨手」翻到一頁講貝沙灣某富豪樓盤的專欄。

A:「呢位仁兄,係我地一個同事黎架,佢三十幾歲,做傳銷出身,白手興家,宜家買左呢個單位,好犀利呀佢。」

B:「黑人哥哥,你係咪唔鍾意傳銷架?」

黑:「(終於接近正題) 查實我又唔反感既,不過投資出去既錢,都要睇下有幾大風險同埋回報係點嘛。我有朋友寫program既,佢做過一個MLM member tracking system,接觸到呢類公司點樣賺錢。條formula 入面,頭幾個generation 係好大機會賺到錢,假設順利搵到下線,理論上係有十幾倍回報,問題係去到後期的generation 就慘喇,去到某個位,基本上要全香港九成人口都買佢地的貨,先至可以有足夠下線令佢地有利潤。小弟唔係數字人,唔記得實質條算式係點,不過呢d幾何級數的東西應該唔難計得到,因為咁擴展法,實有一個爆煲位,睇下邊個接炸彈嗟。」

黑:「你有無問過雜誌入面呢位師兄,佢係第幾個generation 既人呢?」

A:「errrr... 咁做人既野,又唔可以完全數字化去睇既...」

黑:「當時我都諗過,若果可以加入頭一兩代generation,查實都無妨擺一萬幾千玩下,問題係呢d公司又好容易摺埋,老字號果幾間又輪唔到我玩。回報係吸引,但係風險過高,我認為玩唔過囉。」

(再一輪不著邊際的閒聊)

B:「不如第日多d出黎同我地玩啦,我地遲d搞BBQ,你都黎啦!」

黑:「夾到有空檔一定黎!」

結果,上公司大戰連場的情節完全沒有發生,黑人就繼續好悶地過電車男生活。

星期四, 3月 13, 2008

電車男夜蒲日記

一直有今生無來世地在公司通頂趕工,當大部份的工作完成後,雖然實際上沒有通頂的需要,短時間還是改不了這種習慣。

因為香港法律禁止機舖通宵營業(網吧卻可以),凌晨2時以後,黑人的活動範圍一下子大跌90%。於是,創下兩次在漫畫茶坊待到天光的紀錄。

第一次是看軍雞後,好孩子歸家時間(12時)散場,大家都想找門路x這部電影,找到一家面積如貨倉、飲品用花瓶盛載的cafe繼續吹水 (連飲管都有兩呎長)。cafe 在壞孩子回家時間(3時)打烊,有點意猶未盡,機舖已關門,唱k或飲酒都嫌無聊,終於在一家白粉檔格局的漫畫館子看到差不多天亮。

為甚麼是白粉檔格局呢?先不講裝修和顧客,漫畫庫存量令你懷疑自己是否吸了白粉,黑人最想看的當然是軍雞原著,遍尋不果,求助老闆娘 (很親切客氣的慈母feel,有點像不斷付錢給癮君子孩兒吸毒那款慈母),找來了1-6,然後就是很surreal的 8-9, 18, 21, 23和24。

看得不過癮,唯有重溫中學時代的至愛--淚眼煞星,一部集合畫功、暴力和色情的高水平作品,最適合扮成年人士觀看。臨走前勉強看多一期以血腥暴力見稱的漫畫--力皇,翻了幾頁就禁不住「咭」一聲笑出來,天下間腦袋被轟掉還可以行動自如的生物,黑人只想到一種:蟑螂。

黑人就是那種做事不做齊全套就混身不自在的人,軍雞沒看全,一定要想法子解決。十大書坊太早關門(晚上12點),不合近期的作息時間表,終於有一晚很幸運地找到另一家24/7的漫畫館子。這次看完全套軍雞 (1-24) + 常務島耕作 (1-6) + 桂正和的 Zetman (1-5) + 新暗行御使最終回,然後在吸血鬼都會死的時間(早上7時)回家。

軍雞漫畫最好看的地方就是多個鮮明的對立面,正對邪、傳統vs現代、燥狂vs閑靜、掙扎 vs 頹廢...電影幾乎一樣也表達不到。例如電影中的泰拳高手蘭卡,在漫畫裡一雙大眼,樣子善良,是個靠打拳掙錢養活一家大細的正派人物,主角才是邪牌奸險之徒。然後劇情發展卻不斷顛覆讀者的正邪觀,當你看到underdog的主角那種頑強掙扎的生命力時,又有點想他打贏蘭卡。

最教黑人拜服的,是作者偶然露一兩手毛筆畫...連中國山水畫都學到,好勁。也不知畫家們是否互相影響?總覺得軍雞的毛筆畫有點鄭問的影子,而井上雄彥(Slam Dunk)後期的人物造形又頗似軍雞畫風。

Zetman ... 第一次看到桂正和比較暴力的作品,以前看DNA無疑很黃很暴力,但從來沒死過人,主調還是嘻嘻哈哈灑鹽花。Zetman暫時的劇情還是比較「估得到」,黑人對主角的左手較感興趣,為甚麼他的胎記十足一個未開封的避孕套?女主角說那是「天使的光環」,有甚麼特別含意嗎?(kerokerokero)

新暗行御使勉強收場,還好,在變得失控或太悶之前煞科都是明智之舉。一個看破天命+威力無邊+可以隨意更改世界法則的混世魔皇被可愛美少女幾刀斬瓜切菜,errrrr... well... 算啦,無謂留難作者,開了這麼大的頭,根本無可能合理地埋尾。

常務島耕作終於大幅減少性愛場面了,這跟作者步入暮年不無關係罷?也因為主角已升至executive managing director,較少涉及日常運作,多從宏觀角度分析一個國家的市場。例如故事中就提及日本企業已逐漸放棄使用中國作為生產工場,因為中國的各種國情令生產成本太高,風險大,社會不穩,知產未受保障。日企眼光已轉向高科技和具國際視野的印度 (但依然比韓企台企慢了一步)。

可惜島耕作大概不會再升為社長了,如果還有社長島耕作,估計很可能會探討全球人口老化和環境問題,畢竟baby boomer退下火線,也是一個很大的退休人口,要靠少數派的x generation 和羽翼未豐的gen Y,還是不行。漫畫中輕輕帶過的一幕令人感受頗深:各種護老科技的發展可能都是逆天而行,讓應該死掉的人活下去,令地球資源更見緊絀。可是誰願意一到60歲,整個人生就要「退休」,步入攪拌機回收成為食物給後人享用呢?

另,島耕作五十幾歲人除了法令紋加深,樣子和健康好像沒甚麼變過?

星期日, 3月 09, 2008

軍雞:一個高分低能的悲劇

***** 含劇情 *****

我個名叫成島亮,16歲,係資優青年。
某日早上,長期被父親性侵犯既細妹終於精神病發,拿刀殺死雙親。當時,我唔知發咩神經,居然拿起凶器,搞到自己滿身血污為妹妹頂包。

我成為舉國震驚既少年犯,被判入少年感化所,丟下有殺人傾向精神病既阿妹一個人獨自生活,當然無人知道佢發起神經時會殺人啦,我一直都無同任何人講。

在獄中我受盡百般凌辱,大家眼紅我係高材生,更不齒我喪盡天良殺害雙親,其實我既天良係入冊之後先至喪盡的,之前我只係一個鵪春高中生罷!

阿妹來過一次探監,原來佢唔知發生過咩事,為左生計走去做雞,又話憎死我唔想再見到我。傻妹,如果唔係我幫你頂包,宜家你著住神經衫訓緊軟墊房啦!仲要咁唔生性走去做雞,本來我想爆你d衰野出來,點知探監時間夠,黎唔切,哼!算你好彩!

我在監房的日子苦不堪言,差d俾獄長同一眾囚犯逼害至死,幸好有位十分有型的空手道教練,又係唔知痴左邊條線,覺得我同空手道好襯,係咁教我練拳。我諗我家族條DNA line 都係有暴力傾向架喇,我越打越開心,實力亦都越來越勁,甚至勁到臨出冊之前痛K 獄警同埋獄長,都可以無任何後果照樣出冊。

個市又不斷話要輸入優材,我咪優材囉!一樣搵唔到野做,無計,唯有學阿妹咁,走去做性工業的優材。反正練得一身鋼條身形,打得又睇得,仲有款入冊人士獨有既眼神,仲唔瘟爆d女?

唉,第一個客就出事喇,本來做到悶悶地,開個pay per view 台睇下人地打擂台解悶啦,點知呢...個死肥婆無啦啦話我唔好妄想打擂台,仲要每講一句野都要加個「嘿嘿嘿嘿嘿」加強語氣,好鬼old school囉,業餘臨記都唔會咁講野啦,下話?搞到我有衝動想打7佢,事實亦証明我係一個十分衝動的優材。

返到公司,老細梗係吊鬼啦,又再一次証明我係一個十分衝動的優材。我一路打7公司既舊同事,一路諗下一份工應該點算...有喇!一路同佢地打到去擂台賽個會場,入面大把武館老細,佢地見到我即場表演一身好武功,肯定爭住in我啦!

個plan 好順利,半粒鐘車程一路由街頭打到去搏擊會場,不過我數人頭時計漏左幾個舊同事,雙拳難敵N手,俾佢地圍住黎dup,我又失算估唔到有d觀眾會無啦啦落井下石打埋我一份囉。雖然show唔到我有幾好打,不過咁打我都唔死,証明我甲厚血多,之後都有個靚仔小生老闆睇中我,話我地係咩同一類人喎。

剛剛諗住返新工,點知佢個舊老細走來踢館挖角,仲話若果我打7呢個靚仔老細,跳糟會有bonus,人為財死鳥為食亡,靚仔兄台,對唔住都要做一次喇。

上任無耐,諗住有得出賽啦,點知老細又扭扭拎拎,好辛苦至安排一場show,係對泰國乜叉拳皇喎,打贏佢有車有樓有番狗乜都得。我軍雞入過冊都算心水清喇,咁荀既野無端端益我?原來係老細set既局黎既,本來佢諗住我奶野,然後佢派個皇馬誇褂補鑊領功,自己就做外圍通吃!嘿嘿!點知我又過到骨喎,仲順手叉盲泰仔半邊高清視力添!

呢個老細咁死賤,一定要跣返佢一鑊先得,諗諗下,不如詐帝姦左黃馬褂條女,等佢同我打返一場好喎。黃馬褂個名叫咩姦完直人,擺明係專搞直人既基佬啦,女朋友肯定係煙幕。果然,我要脅佢條女之後,佢第一樣野唔係諗到報警或者採取法律行動,甚至連tum返條女的意欲都冇,反而係撻著晒想同我決一生死,一早都話條女係煙幕啦!

到真係上擂台果日,得我一個上陣喎,漫畫原著我都仲有幾個fd 架,唔知係咪電影唔夠budget又想懶係營造我孤獨feel,cut鬼晒!

算,照樣去馬。

呢個姦完直人果然厲害,講招數完全唔係佢果皮,不過...嘿嘿嘿...我真正既殺著就係...用我鋼條形的身體,擋爆對手既拳頭,結果我用個頭頂爆佢隻手,型呀哩?骨質疏鬆就唔好學人打拳啦!

之但係時間唔夠,欲知後事如何,等下集啦。

又,我諗諗下,若果當初我向警方招認阿妹有精神病,佢入院接受治療,我繼續讀書,好似又唔會發生咁多不必要既慘劇喎。而且放個會殺人既潛伏精神病者四圍走,又好似唔多負責任,不過算啦,導演想改到我係正人君子搏同情,咁唔好彩個編劇又精神上響應荷里活編劇大罷工,所以個劇本咪改成咁囉!

下集見啦我地!

***** 完 *****

星期六, 3月 08, 2008

spec work

流年又準多一鑊 (抑或我不斷將身邊發生的事對號入座?),工作上碰到幾黑仔的情況,俾客剷完之後仲要愁點收科,黑人不相信個天有心害自己,流年不利只是將一向潛在的chronic problems 一次過爆出來。

搏左咁耐得個吉,突然有種生命中不能承受的頹,加上個市仲有排跌,連望住金魚缸果劑精神鴉片都冇埋。

自己的問題自己煩,先講其他。

*********

早排招職登左一篇香港設計師協會的報導,指HKDA終於企出來,向free pitching 發表強硬 (但無約束力的)聲明,反對客戶要求設計師在無$的情況下「試稿」。

可能體諒到大部份設計行家良於行拙於辭,HKDA寫左一個template letter供各會員使用,日後有客戶要求免費試稿時,就揚出此信齊齊say no。

相信不用發明時光機,大家都可以預測到此舉的結果。

黑人覺得,要設計師和客戶一致向免費試稿say no,效果就等於叫愛國同胞一起抵制日貨,volume可以無限大,但畫面依然係一片雪花。試稿,跟日貨或國貨一樣,你一日唔用都極難,同埋只有極少數的人能夠完全抵制都依然過到日子。

黑人在撰文之前略為做過資料搜集,首先北美多個設計相關的組織都曾發表聲明反對試稿,第二,無一個組織能夠提供有約束力或實質的解決方案。

免費試稿無疑是飲鳩止渴,可是總會有人做。HKDA 不應繼續站在情緒層面呼籲人抵制這個那個,那才是雙輸的做法。他們既然自稱設計師,就應發揮其problem solving 精神,想想為甚麼這麼多年還有人在做free pitching? 誰人不用做又生存得到?為甚麼?誰又一定要繼續玩?客戶方面又怎樣想?多數客戶的marketing 都希望以最低的成本獲得最優良的創意服務,無論HKDA 說試稿的質素是怎樣的差,我相信絕大多數的marketing officer 都不會同意,尤其是名氣大的品牌,大把人願意唔收錢或平一平地做,搏一個credential。

HKDA欠缺一些冷靜的人,花時間搜集資料正本清源地解決問題。如果能夠將free pitching 導致的損失用一個更實在的方法present出來,響應的人會更多。例如根據AC Nelson 的統計報告,free pitching 導致香港經濟每年損失x億元,若果有條咁實在的數,叫社會各界關注都易d。

另外也應該分析不同市場的人對免費試稿的incentives 和barrier,例如300 蚊一個job的design,就肯定吸引不到專業行家參與試稿,30萬的retainer contract,卻已經足夠吸引不少設計公司爭崩頭 (何況是千幾萬包埋media package 的大型廣告campaign)。每 一瓣都有不同級數的創意行家,為著不同的理由參與free pitching,又豈可以簡單一封信、一個感性號召,就擺得平?

HKDA還未仔細分析每一個水域,就忙不迭丟下僅有的深水炸彈,命中率可想而知。

黑人也不敢怪他們,過往HKDA除了展覽和頒獎還搞過甚麼?現在踏出第一步遲來的baby step,也不應太苛求了。

星期四, 3月 06, 2008

流年 (二)

流年說:

1. 小弟今年會忙到飛起 --- 中
2. 有$賺,不過散財亦快 --- 中
3. 有桃花,但無枝好 --- 中

且講講第三點。
話說,早前有些不明來歷的網民 add 了小弟,都是開羅的十五六歲妹妹仔(汗),當時黑人通頂趕緊貨,反正一個人在公司淒淒慘慘冷冷戚戚,不妨邊做邊吹水。講到小弟是中國人,例牌問你識唔識李小龍?識唔識成龍?(真係幾奇,住美國咪識埋一大票明星?)
可惜黑人對埃及名人的認識只限於Imhotep 同埋Narmer,無得懶熟咁問佢又識唔識呢兩位人兄。

講完名人,下一句就係:「你幾時黎開羅?」
「得閒就會考慮下。」(講真的,反正小弟也喜歡熱的地方。)
「係呢,你咁大個,點解未結婚生仔?」
「.....」(真係唔知點答你)
「我地埃及人三十歲就一定結婚架喇。」
為了岔開話題,就明知故問回教徒係咪可以娶四個老婆?女人又可唔可以有四個老公?
限於英文水平,妹妹仔講左三幅被,都講不出一個所以然。

賞味期限已過,之後就無乜往來了。

******

之後,又有一個識左幾年但無乜往來的女性朋友突然不斷約黑人出街。
唔知佢係咪為左搵野來講,講埋d 無聊又令人無癮的東西:
「點解你咁肥架,唔操fit d?」
「點解你d 衫咁無taste 架,成個阿叔咁。」
「點解你咁多野做架,無晒人生樂趣。」
「點解你甩晒d頭髮既?咁後生就甩晒喇?未老先衰喎。」
「點解咁耐都無拖拍呀你,唔得架喎。」

查實呢,我唔係特別大方或者小氣,若果批評係有point或者好笑既,都無乜所謂。有時我都會笑自己光頭或者肥到出「男乳」用來破冰,不過全場都用呢d 做開場白,悶唔悶d呀?

咁即係話俾我聽,除左挑剔小弟的缺點之外,你就無任何話題可以講。無論係做朋友還是拍拖,都會好悶囉!而且由朝到晚俾人嫌東嫌西呢,我又真係好反感既,或者係我唔擅長同呢類人相處啦。

賞味期限已過,之後就無乜往來了 x 2

星期二, 3月 04, 2008

蒲頭

最近忙的程度是平均兩天才回家洗澡睡覺一次,不是用來炫耀或扮可憐,工作量真的很多,有時是放心不下,不敢休息,結果在公司有一下沒一下的工作,若果睡足了才工作效率應會更好,但工作積壓,又如何睡得安穩?

一位同行的前輩急病入院,病情不輕且餘下的日子可能不長,前輩一向不煙不酒,奈何上有殘年高堂,下顧黃口小兒,終年奔波,勞碌成疾。在院見到他有如渣古般插住兩條喉,心中一寒。如果黑人自知大限將至又會如何?再一次想起耶教的謝飯儀式,原意就是提醒自己每一頓飯以及人生的各種理所當然並非必然。

明知必死而行,是為死士。那麼職場上,到底有幾多死士?

工作上偶爾遇上了初出道時的自己:血氣躁動、口沒遮攔、眼高手低,終於明白為何當年前輩們只是微笑不語 (十年後這句話可能繼續適用),誰也不知今日的黃毛小子明日會如何,微笑讓路,也許是明智之舉。

又,前輩入院一事,令黑人想起投資要保值,最好還是不要買樓,舊樓只會不斷跌價,有急事要放盤也不易。

上年聽從家父忠告買的基金(匯豐紅籌+越南),手續行政費用千餘大洋,擺了一整年結算卻倒跌幾十元,今年還要依約加注,真不划算,到底應否cut單?要進取,自己買股票手續費更平也更靈活,要長線要穩陣買2800 不是更好嗎?再穩陣d開人民幣戶口也不錯吧,自問完全不懂外國market,買甚麼印度越南星馬泰阿富汗,真的任得個agent 9 up。

比較期待agent 有甚麼創意解釋「er... 就咁既,因為今年拉尼娜,流年屬大水年,香港庫房水浸,中國雪災...所以er...你俾d耐性...下年旺火,個市應該撻返著架喇。」

終於有單project 告一段落,相片大部份是自己跟家父一起郊遊時影的。整個design主要是實驗全畫面layout,現在看來又不滿意,每一頁的細位本來應該可以做得更好。