星期四, 5月 29, 2008

戀戰

周期五會跟兩位紅顏知己外旅遊數天。
事忙,一直以來都沒有參與planning,亦醒目不加任何意見。
唯一不能接受的地方,就是N年雪藏牌的溫小姐自告奮勇,要租車做柴可夫,並指定大家一定要坐她的車。

相信任何曾經在美加留過學的朋友,對於鑑別柴可夫都有一定的心得:某甲手車夠定、某乙考車當日大家不要出門、某丙受到挑釁會變成藤原拓海等等,一概都心裡有數。經過一輪磋商後,演變成以下對話:

「租車方便又平喎,一晚先至x元,同搭車差唔多。」
「我明。」
「咁點解唔坐我架車,你信唔信我手車先?」
「唔信。」
「我呢幾日都有搵朋友架私家車去練返,無事架,你信我啦。」
「我諗下點搭車啦。」
「妖,你係咪咁煩呀!」
「係。」

開郁一架車,不難,任何人稍為學下就ok。

黑人的風險評估算式如下:
缺乏路面經驗 + 陌生城市(交通指示不同) + 個性急燥火爆 + 體質虛弱 - 5次練習 = 危險

就算宜家減到得返一日,都唔敢坐,尤其果日都算係中長途車,計埋蕩失路,隨時兩個零鐘車程。是否小弟無膽呢?Better safe than sorry. 至截稿為止,溫小姐依然堅定不移:「無論點我都一定會渣車!」黑人腦海中已想像得到佢事後會講乜:「拿!當初我都話左無事架啦,係你自己麻麻煩煩驚東驚西。」

我寧願俾你咁講,也不希望自己是對的。

十分強烈地感覺到,未來幾日應該會幾無癮 (自証預言),下次都係自己旅遊算喇。

星期二, 5月 27, 2008

直銷迷魂記(三) ---附FAQ

最厲害的大話,係9分真話夾1分似是而非。第一堂「創業之路」的課堂精華,黑人且為大家筆錄,頗長,先感謝大家的耐心。

上半部係一個上左岸的新移民上線分享自己的得救見証,當然少不了show自己的神跡:早兩日以數萬元買下的一款名錶。下半場由一位前稅務局公務員主講(現為星級公爵),此人頭腦清楚,說話淺白動人,稍有學歷的不會覺得白痴,沒有學歷的也能懂,而且懂得向聽眾問問題搞互動,絕對值得學習。

****** 講課內容分隔線 ******

MLM (multi level marketing) 多層推銷是甚麼?

傳統銷售模式裡,一件貨物要從廠家去到用戶手中,須經過以下的途徑:
廠家 > 運輸/物流 > 批發 > 代理商 > 廣告商 > 零售商 > 用家

MLM 屬於第四代的銷售模式,將過程大幅簡化
廠家 > 運輸/物流 > x領 > 用家(網狀擴散)

由上表可見,MLM節省了大量金錢成本,而節省了的錢去左邊?大家知道嗎?
就係每一位加盟的分銷商手入面喇。

MLM 入面,每一位分銷商都可以向其他用戶發牌經營,其實呢個發牌分銷系統(黑人按: franchise)大家都唔會陌生,例如麥當奴、7-11、小肥羊、KFC等等。

不過佢地的發牌系統就十分唔著數喇,例如某甲加盟開左間麥記賺到錢,就算佢叫某乙買牌開一間麥記又賺大錢,收益都去歸返母公司,某甲根本無著數。開麥當奴大家知唔知要幾多錢呀?唔好話麥當奴,就算係開一間茶餐廳,閒閒地都講幾二百幾萬,又要舖租、請伙記,搞九個月都唔知有無得回本,你估開茶餐廳容易架?開麥記、7仔就仲大鑊,未開舖先要俾一大舊錢買牌照。

MLM就唔同喇!每人發牌可以跟公司拆賬獲利,仲要係你7成公司3成喎,邊度搵呀?我地無舖租無其他雜費,銅鑼灣三間公司既租唔駛你地俾錢,輕裝上路,成本係咪無佢地咁貴?(眾曰:係!)

接下來,就要為大家解答一些做亮xx常遇到的難題:

1. 無朋友
我地有好多公爵候爵,初初移民黎香港時有無朋友呀?朋友點黎呀?都係識嗟係咪?我地個團隊會教你點樣去識人,點樣見多d人,根本唔成問題。


2. 無時間
好多人話無時間做,但係洗錢又有時間喎!唱k、打機、睇戲、沖涼dup骨乜都齊,偏偏無時間賺錢?好多人都嫌份工佔左好多時間又無前途,宜家我地呢度有錢搵有前景佢又縮沙喎,你話d人咩心態呢下?(眾笑)

3. 無錢
拿!我講清楚先,如果我有個內地朋友,今日打電話俾佢,佢三個月後先上門加盟,話係行路黎香港既,我會叫佢先搞掂兩餐先(眾笑)。一個成年人,五千蚊俾唔俾得起呀?呢度有無做生意既朋友?(有人舉手) 如果你見到有商機,想創業但係唔夠錢,你會唔會想辦法周轉呀?做生意有邊個未借過錢?你諗下一般傳統創業,你借果d錢有幾多俾左包租公?你係咪幫緊佢打工呀?我地呢度有一個良好制度,有一班人走過呢條創業之路,証實係可行,有錢賺既,先至會叫你投資,擺明蝕既邊個做呀?

4. 無興趣
大家打工係為錢定係為興趣?有邊個係為興趣請舉手?(無人舉手)你地都算好呀,之前一堂有個司機大佬,八千蚊一個月,包頂頸話係為興趣喎。咁我問佢:「你一日渣幾耐車?8小時?好,既然你為興趣嘛,咁我俾你渣到16小時,人工減到4千蚊,雙倍時間喎,夠興趣未?佢立刻啞左。」各位,打工梗係為左錢啦,我地呢度就係俾一個平台俾大家,幾年賺十幾年的錢,辛唔辛苦?梗係辛苦啦!興趣留返搵夠錢退左休先至慢慢黎啦 (眾呼采)

5. 無口才 & 6 無信心
有邊個一出世識講野?如果生個BB出來佢突然同你講:「喂你好放低我喇喎」嘩下,識講野既BB,怪物黎既,整死佢都黎唔切啦!無人一出世就有口才識sell野架,大家睇下x姐、y姐(一位做酒樓樓面,另一位洗廁所的新移民) 連廣東話都講唔正,仲有呀z姐,字都唔識睇,佢地都可以上公上候,你地點解唔得呀?「朋友你叫乜名?」(指向黑人身邊巴基斯坦地盤佬) 「大家俾d掌聲佢好唔好呀?巴基斯坦黎既都唔驚,你地驚咩呀?」

信心點黎呀?係咪好似口才咁,係後天培養出黎呀?就算你無信心,無口才都好,我地呢度既團隊會點呀?會幫忙培訓你成材為止,我地MLM最大優勢就係咁,有一個不斷增大既團隊在後面支持你發展,係咪呀?(係!)

7. 產品貴
有人話我地d產品賣得貴,大家知唔知咩叫品牌效應呀?同一罐可樂,百佳賣3蚊,7仔賣6蚊,茶餐廳賣10蚊,半島酒店賣50蚊,係咪同一罐可樂呀?(係!) 有無人走去半島酒店話佢賣d可樂厄錢呀?點解會咁呢?就係有個品牌幫佢增值囉,我地公司成立左9年,正規經營,宜家永久代理LB亞洲銷售線,係咪有個品牌響度呀?價錢貴就係貴左呢度係咪呀?(係!)

8. 不是必須品
大家除左衫褲鞋襪同埋兩餐之外,有咩野唔係必須品呢?銀包係咪必須品呀?你可以袋晒落個袋度喎,有無朋友食煙?煙係咪必須品呀?係?你問下身邊唔食煙的朋友煙係咪必須品?呢個社會每日都有好多人買緊一d唔係必須品既野,大家都係想改善自己生活質素係咪?有邊個唔需要健康呀?如果我地呢隻空氣產品,可以為你同你家人帶來健康,係咪好大市場呀?

9. 市場飽和
好多人都會講,喂你地個網絡咁擴展法,好快就會飽和喎!首先我想講,每年有幾多人移民黎香港?每年都有好多人畢業投身就業市場係咪?我地既人口係咪不斷流動呀?大家係咪每人都有一部手機?有幾多個人用緊我地既產品呀?唔多,係咪?咁手機同香薰邊個先至係飽和呀?仲有,你部手機會唔會換?會唔會壞呀?所以除左開新單之外,我地仲會有翻單既生意,係咪?另外,我地宜家開拓緊大陸市場,上面個市場有幾大,係咪有排都未開拓完呀?

10. 賺朋友錢
如果你開一間餐廳,會唔會在招牌寫住「不準朋友光顧」?唔會咁傻的,係咪?朋友來幫襯,你都係均真做生意,一樣咁計數。唔通佢食完飯,你收佢錢就係厄錢?有邊間餐廳唔收朋友錢既你話我知,等我去做佢朋友,帶埋成村兄弟去幫襯 (眾笑) 咁我地做呢盤生意,正規經營,同朋友傾生意,係咪要在商言商,傾得清楚呀?咁先至係專業既表現,係咪?

11. 國內不合法
點解國內會將傳銷當作不合法呢?因為國內之前傳銷業發展得很太篷勃,乜都有人拿去sell,甚至有人在牆上刮d粉落黎又sell,情況開始失控,於是政府唯有一刀切,禁止傳銷或多層推銷活動,只可以由sales直銷賣貨俾客,係咪無左個網絡效應呀?

宜家中國政府立場係點呢?之前有篇報導(黑人分左神聽唔到):國家宜家會「摸著石頭過河」,一步一步慢慢來。最終中國會開放佢地個市場俾我地,不過係一步步咁黎ok?佢地見到MLM在歐美日本都行得通,宜家我地都開拓緊國內市場,以香港為基地,最終大陸都會同國際接軌的。

12. 朋友做過唔掂 & 13. 100個人有幾多個得
你身邊有無朋友俾老細炒魷呀?例如呀x姐個洗碗同事被老細炒魷,大家會唔會話飲食業厄人呀?每個人在呢個平台,有幾多成果係咪要睇自己呀?返工唔努力失敗係咪好正常呀? (第13點佢含糊其辭,黑人亦不太記得了)

14. 問下朋友/屋企人先
大家剛剛加盟時,我地係咪叫大家唔好同身邊d人講呀?就係因為大家未夠了解,未清楚盤生意運作,俾家人問到口啞啞,係咪令佢地擔心呀?「車,厄人既,你咁都信佢?」而且初期身邊總會有朋友親人俾說話你聽,佢地可能出於好心架喎,不過就係打巢緊你,對業務發展唔好的。而且佢地未親身了解、未做過,居然可以話返俾你聽盤生意係點,係咪好搞笑呀:「拿呀仔,我就唔清楚佢地搞乜喇,不過係厄人既。」(眾笑)

15. 返去諗下先
我成日聽到呢一點都覺得好奇怪,有咩係公司度了解唔到,但係返左屋企反而了解得到呢?通常咪又係返左去問屋企人。結果會點?我之前都講左,就係俾一d 唔清楚、一知半解既人影響你的諗法?


******* 下課分隔線 *******


即使受過邏輯訓練,擅於語理分析的朋友,一時三刻都未必拆得晒咁多招,仲要當時係播緊強勁節拍的dance music、大家附和拍掌情緒亢奮。講者習慣透過一些positive 的反問,令大家下意識習慣左去認同佢的說話,記得有一次佢講左句反話,大家都反射性地答「係」,搞到佢自己要補返鑊。

另外,唔好忘記,當晚的聽眾教育水平並不是十分高。

課堂足足三小時,下課後仲未完,羊牯們立刻被押戒返公司舉行屠宰大會。首先新移民酒樓大姐候爵對住同學們講自己的發跡故事,然後拿自己本銀行存摺俾人睇佢近兩年的收入 (每月平均8至12萬),經大姐中央處理後,羊牯們再回到自己的上線小組接受屠宰。

第一日上門時,上線會叫你平平地五千零蚊加盟,不過到左今日就會改口風,叫你加大注碼投資六萬幾至十四萬不等,如果閣下透露過自己的經濟條件不俗,更會鼓勵「套架」,一次過買四十幾萬的貨。

突然要拿十幾萬,大多數月薪幾千蚊的人當然做不到。呢個時候每個小組的「大頭」就會教你向財務公司借錢投資:「頭先講師都講過,創業搞生意邊個未借過錢?借去fing、去賭就唔好,周轉黎做生意就值鼓勵喇!

上線仲帶黑人四圍問其他「伙伴」,原來每人至少都六萬幾起步,癲果d甚至二十幾歲借屋企人四五十萬來較飛,當晚巴基斯坦朋友不幸地都同意用六萬幾銀開始。

玩到呢一步已經過左comfort zone,想再聽多一晚課堂已不可能。西裝友搵左佢的上線「大頭」向黑人落嘴頭。黑人話自己有些少股票可以放,但係要隔幾日先有$,跟住個「大頭」就言重深長地講:「你買的係好股票既話,梗係由得佢長線升啦,唔好隨便放左佢。借錢俾果少少息,反而仲好,我有個安信好兄弟,你聽朝請半日假辦埋佢得唔得?

跟住黑人講左幾個理由拖佢,睇下佢會點答。佢十分concern 地講:「因為呢,個agent要入一樣叫TU既野,要中午十二點前入既,聽朝佢會得閒,之後兩日weekend 佢未必得,無咁好。」(頂你,我都係咁樣hea 走我d客,我點會唔知你做緊乜?)

西裝友招殺著反而make sense喎:「拿,你聽日搞掂呢,第日你可以同人講,我第二堂都未上就已經投資落黎,說服力強好多,到時仲叻過我啦,我都要上晒兩堂先決志。你信我,我最初都係投放左六萬幾,第一個月已經搵返,呢條路我行過,我做左三年,我知道條路點行。如果我還唔到,仲點可能做幾年,做到上候挑公呢?就算我地保守d做,三個月一定搵得返,三個月發三個牌喎,點會做唔到?

查實當時最簡單的脫身方法就是play ball:「好,我聽朝儘量問下老細果邊請唔請得假,請到的話我十一點call 你再約地方好嗎?

當然呢個假,點問都請唔到。


******* 感想分割線 *******

1. 查實MLM搵唔搵到錢呢?有一撮人係搵到錢既。朋友A的母親以前經營另一間公司的層壓式傳銷,最高收入都試過七萬幾銀。不過呢d錢好多時只係公司割左你成隻腳,再分返件小腿俾你。以38伯爵為例(38即38%拆賬率,其實是誤導,見最底伸延閱讀),黑人要投資6萬3,然後再厄多5個人投資6萬3,先至可以回本兼賺返幾千銀水腳,呢盤生意係咪好難做呀?(係!)

DCxL經營左9年,公爵候爵的數量應該遠遠不止此數 ,証明有相當大部份的人退出或者無法晉升 (既然無底薪,應該都係quit左架喇)。

2. 黑人相信如果夠黑心的話,身邊有些人會中計的,如果唔搞身邊人就要向一些教育程度較低的人埋手先至得。不過呢班人中左計之後,以佢地的能力能否搵到下線羊牯呢?機會不是太大囉,換言之又係做得幾個月一兩代,之後欠落一身債 (因為未翻晒本),個朵臭晒,風險太大。

各位blog友網友太醒目,好難埋手,十居其九都可以輕易在網上搵到唔少數碼皇冠的黑材料。

頭一日有位講師都試過向黑人派一些頗lame的定心丸:「黑人你都有上網架可?」「少少咁啦。」「網上都有d唔好既流言,大部份都係其他非法既公司用來中傷我地既,你諗下,我地做左9年,合法經營賺到錢,佢地又點會唔眼紅?最簡單打擊你的方法就係搵人寫衰你,係咪?早排咪請左幾個大陸人落黎示威囉,不過你唔駛理會呢d聲音,做好盤生意就夠。

3. 點解無差人取締呢間公司?因為每個羊牯都要成立一間有限公司去接貨,亦即係講師提及的franchising,閣下與亮xx之間的金錢往來都只係公司與公司之間交易,並不犯法。甚至佢地的年報上每年得獎的公爵候爵,都係用返自己公司名義獲獎。

西裝友不斷同我講:「香港地,打個電話15分鐘差人一定到啦,如果我地厄人犯法既,開咁大個office搏拉呀?」黑人絕對同意,如果唔係諗過度過有灰色位可以走,又點會做得咁揚呢?

4. 亮xx的產品是否流野?坦白講個product 本身無問題,市場亦如佢地所講,係可以好大。不過問題出在佢地的經營模式並不健康。可口可樂要增大銷量,會透過不同的宣傳營銷策略令人養成飲可樂的習慣和意欲,而不是tum人買十幾萬罐,半年後再收佢存倉費囉。

5. 西裝友是否壞人?黑人不信佢係壞人,反而覺得佢either 信左一套扭曲的價值觀,或者佢已經睇到好化,當係遊戲咁玩,純粹係從遊戲中獲取最大利潤。換言之,測謊機未必測到佢講大話,因為佢講緊佢相信的真話,或者佢講緊真相的某些部份。

6. 洗腦威力有幾大?如果留多兩個星期,黑人應該信左佢地套野。人性總有些弱點,無論閣下意志和識見有幾強,總有失守的一日。尤其喊口號及大量集體活動,再加上長時間浸淫在一個無乜時間感的環境,確實會wear down一個人的獨立意志,情況跟奧姆真理教差唔多,佢地當年都有科學家同專業人士加入喎!

好,無聊完,講完故仔,又要繼續搏殺 (証明我都係工字不出頭,跟十萬月薪無緣)

(全文完)


******* 伸延閱讀分割線 *******

LB 的晉級及拆賬方法,所謂38, 41等等的稱號都是錯的,實質拆賬率並無咁高,講師提及的7/3分賬,更加只有幾個人可以享受得到


某網民6個月在LB的收入

星期一, 5月 26, 2008

直銷迷魂記(二)

首先多謝各位朋友的關心,其實黑人係俾左少少錢,參加左一個「亮xx洗腦三天團」增廣見聞,有點似Michael Moore wannabe 尋幽探秘。

隔了兩日才能動筆,固然上魔窟探險實在太勞神,另外這幾天確實被逼擱下一些工作未完成,要在周末補回。

先放心。黑人只係上左去幾晚以及上過一堂入門,並無sell過任何人,亦無借財仔,錢就一定俾左少少 (洗腦療程每次要數百大洋),不過另外買貨果千零蚊就唔知退唔退得返喇...雖則佢標榜有14日9折退貨保証,明天儘管試埋佢。

******* 講故事分隔線 *******

數碼皇冠在銅鑼灣有三個屠房,黑人上左皇室堡果個。

上去之前,黑人有些目標和底線,即使証實佢盤生意正當兼且有得做,都一樣會保持不變:

1. 點都唔會sell 身邊認識的朋友,直至自己確認賺到錢為止
2. 唔會借錢,亦不會投放影響自己生活的金額
3. 就算真係想做,都不會放下手上搞緊的幾單project,頂多part time
4. 主要的任務是查探數碼皇冠有無可持續發展的實質業務,例如西裝友所講的sell 香薰給樓上cafe、賣酒給大陸酒店舞廳等...sell 下線接貨並非實業。

現在諗返都有些多餘,真係洗到腦,仲會理甚麼底線呢?肯定立刻借十幾萬財仔把握創業機會吧?!

幾年前上世貿分舵時,黑人覺得亮xx尚算係一個普通傳銷集團。今次重遊,感覺有如返左一間二百幾人的教會,沿途不時見到有十數人圍成一圈圈,聽公爵候爵講道,時而傳出陣陣歡呼喝啋甚至獨門口令,整齊劃一,明顯日子有功。

決志後,西裝友帶黑人四處認識猛料人馬:「x候爵你好,呢位係黑人,佢今日決定加盟我地,你可唔可以分享下你既經驗教下佢咁呢?」

跟住,果位乜乜物物候爵,就會同黑人分享佢的得救見証:「黑人弟兄你好,我當時係洗廁所咋...(下略),宜家月入十萬。」

西裝友立刻唱雙簧:「咁有無簿仔睇下咁呢?」

有些候爵會拿自己的簿仔給黑人睇,有些拿自己的銀行月結單、公司的commission statement甚至報稅表副本。總括而言,收入數字應該不是假的 (睇晒全文先,不要立刻衝去決志)

西裝友不愧為講師,人面廣 (其他上線無法學佢咁搵咁多人做見証),而且成功例子涵蓋的範圍都幾全面:有廁所洗地、新移民、18歲Ivy 生、月入數萬的專業人士、83歲的婆婆、兩兄妹、夫婦甚至一家大細,跟黑人同期加入的還有一個巴基斯坦地盤佬(懂粵語),如果佢成功,cover到的成功範圍又大進一步。總之多少都可以搵到一個跟你relate 到的shining example。

近年亮xx / 億x / 數碼皇冠集團致力開拓內地市場。今次上去多左好多內地人(每日數十計),專門辦証由內地來港做羊牯。因為內地法例嚴禁層壓式傳銷,帶d羊牯來港開戶就變成境外投資了,而且有人講過,xx思有14日退貨保証,但內地人做完羊牯,返到屋企立刻後悔都好,再辦証來港前後需要15天,所以無可能退到貨 (未經查証)。

基本上,頭兩晚西裝友都係帶黑人四圍識人聽見証,甚至第二晚無野好做,西裝友派左個下線陪黑人揭相簿 (佢地成team人旅遊相)、睇貨品catalogue,就算無實務工作都要搞到一兩點才收工 (佢地每日返工時間係11am-2am)。返工時上線會鼓勵你不斷call人儘量接單,雖則號稱時間自由,實際每個人都活在一個相對與世隔絕的環境裡,唯一最親的人就是身邊的同事,凝聚力可以媲美一個宗教組織。

第三和第四晚兩堂「創業之路」才是戲玉,頭一晚係motivation 及派定心丸,第二晚就係講operational大綱+決志,西裝友聲稱上完第一堂通任督二脈,上埋第二堂直頭識飛,黑人上左第一堂,其言果然不虛...

(2/3)

星期五, 5月 23, 2008

直銷迷魂記 (一)

如果閣下是黑人朋友,近幾日會發現黑人成日都好唔得閒。

實情是:黑人「加盟」左銅鑼灣某直銷集團。

Long story short,寫得呢篇野,大家可以放心,小弟不會call 閣下「一齊發展一盤生意」,揚得出來就代表不玩了。

***** 講故事分割線 *****

話說黑人工餘習慣留連機舖,遇上一位頗合拍的西裝友,大家玩高達打法相似,打多幾次,自然談得投契。


談到大家的工作,西裝友居然直認在xx思做直銷,正規經營,候爵。帶著一team 人混得不錯,而且講到自己月入甚豐,2x歲已經可以在港島買一棟中價樓盤置業。因為黑人之前有若干負面經驗,對比下,此君的身家不似裝出來,也表示從不強迫加盟。西裝友再講到自己在國內實貨的生意不俗(數碼皇冠一直強調吸納下線,跟賣貨無關)

又再隔一排,西裝友約黑人打機,事忙推卻,西裝友隨口問:「我大陸盤生意搞到幾大了,你有興趣幫手嗎?有的話我問問上司,問準之後大家約出來傾下啦。」

黑人對於數碼皇冠的手法和臭史其實都有一定的認識,基本上係擺明上去自願受騙,看看佢地有乜新花款...

(未完待續)

星期三, 5月 21, 2008

封面唔跟內容

黑人對娛樂新聞的認識永遠只限於七仔雜誌架的封面群
雜誌封面永遠都係「失控」「喪x」(x可以是任何一個動詞)、情變、婚變之類
好似入左娛樂圈就永遠無法維持心智正常

直至有一次,身邊有朋友真係識得一位女藝人
黑人見過佢同埋佢的鬼仔男友一兩次
早排有一次娛記作故仔,話個女藝人戴孝期間,拿左二十幾萬俾鬼仔買名牌花里花碌
鬼仔男友睇到個故事之後好開心(有人譯俾佢聽),仲keep左份news clipping 落facebook

因為...





















佢係半個深玔通,經常十分自豪地同朋友講,果日佢周身名牌,全部都係A貨!A貨俾娛記估值變成二十幾萬,點會唔開心?天下間零公信力都依然可以運作無憂的行業,娛記肯定是其一吧?

PS: 最近鬼仔又俾人影到去溝鬼妹,更加唔係果回事。個鬼妹黑人都算熟,大家真係成日約出來飲飲食食的普通朋友,算吧啦!

PS2: 朋友A 同Y都驚同鬼仔出入會俾娛記影埋,變成3P新聞的其中一個主角,到時咪話唔大鑊!

星期二, 5月 20, 2008

原來我曾經...

同方卓如傾過一晚計而不自知。
話說黑人有一次向家人提及最近買了「分拆方卓如」一書,家人問方卓如係乜水,聽完答曰:「哦!龔耀輝呀...你三叔以前同佢係同學黎架,一齊讀過會計,佢好鍾意講d炒乜炒物丫嘛,好耐咯!」

當時都不為意,以上對話隔左幾個星期後,黑人整理客戶名片簿,偶然見到龔生的舊卡片(當時佢在登龍街一間公司做經理),頂!原來係佢!

遠古時代黑人剛剛出來做freelancer,有些報稅會計事務不明,當時三叔由加拿大回港暫住,就「搵左一個舊朋友」為黑人指點迷津,在某starbucks 講左一晚,查實當年黑人傻下傻下,連公司戶口係乜都未知,就算動用如此猛料之人教路,都幫唔到幾多。

遇到猛人都不懂珍惜,又無keep contact,罪過!

******

多9餘地幻想...如果當年一直keep住contact
咁分拆方卓如本書,會唔會變成由小弟design 呢?
若果由小弟design,會唔會好過宜家呢本呢?

諗諗下,查實當年無繼續contact,可能對不少讀者都是一件好事

星期一, 5月 19, 2008

周日打書釘

刨書速度有點過快,存貨只餘下tipping point 和Bill Bryson 那本英國小品Notes from a small island。現正在煲Troy第二部曲,鏡頭一轉,主角由羅馬開國君Helikaon變成講故佬Odysseus,Odysseus有點像大家身邊搞氣氛哈哈笑的開心果大叔,面懞心精,有需要時可以變得十分勢利冷血,有時卻會正義上身做蝕本事。

Odysseus年輕時是個燒搶擄掠的奴隸販子,別名Sacker of cities,中年卻變成一個「四海之內皆朋友」的中立商人,可是世局如棋,米基尼皇積極拉攏各國部署侵略特洛伊城,要完全不得失任何一方,恐怕越來越難。

刨了兩晚k掉百多頁,追連續劇最怕要等,連忙到星加坡連鎖書店集團找Troy 的第三部曲,不果,卻買了Edward de Bono 的Lateral Thinking,朋友稱之為十大life changing 著作之一,姑且一看。

另外想買些投資相關的書,上年已讀過股聖Peter Lynch 的one up on wallstreet,不過是二十幾年前的舊版,很多資料已過時。本來想另添一本惡補理財常識,但頗貴,而且美國的股市暫時不太看得懂。

留意到一本叫「愛投資。愛自己,你的第一本股市筆記」,譚美利著。看封面和排版,擺明寫給沒有投資常識的OL看的,黑人自問理財常識不及格,也不怕放下面子將子買了一本,初步印象頗佳,由股市操作以至一些基礎投資原理都有,精簡淺白而且貼近07年香港股市。作者偶爾幾句討好OL有點煩,但整體上還是適合新手一讀的。

另外心急買了一本「巴菲物給青年9個忠告」郭硯靈著,呻笨。

本來還以為是巴菲特著作的中譯本,原來是這位郭先生借巴菲特發表自己的投資偉論,scan了幾句見到甚麼中國佛家名言、儒家哲理之類,火都黎埋。年輕人理財的第一步,就是先把購買這本書的七十塊錢,用在其他更有意義的地方上,例如賬災。

另外有一本講Steve Jobs的書,還有在網上見到一本叫Perfect Pitch: The art of selling ideas and winning new business,Jon Steel著,之前大家講pitching 講到火紅火綠,不如看看鬼佬點處理?

想看的書太多,錢和時間太少,無計。而且讀得書多也不代表個人叻左,見得太多讀書少但十分成功的叻仔,知識改變命運,古人誠不我欺,知得越多,懂得越少,命運變得越霉,書呆子溝女又無運行,唯有認命。

星期四, 5月 15, 2008

同志及特洛伊雜談

見到工程師與方文正的文章,幾有趣。抱歉不夠能力發表關於性向的論文,只能分享小見解一二。
黑人成長時有被集體排擠欺凌的經歷,加上興趣和性趣跟身邊朋友都不同,所以對邊緣人有些偏心。

性趣跟常人有異,所受的歧視和排擠跟同志其實有點相似,最基本通常是出於不了解的恐懼。例如男同志就是鼓吹肛交(女同志又鼓吹甚麼呢?)、戀物癖敗壞道德、SM 狂徒會把人綁架折磨然後勒死,心理變態云云。

事實上,大多數 violent sex crime 主角都是正常的異性戀者,同志或特殊性癖的人反而有種要保持低調的自覺,喜歡性虐的人,安全意識其實比很多人都要高,因為大意的後果可以很嚴重。

Freakonomics提過,人通常會忽視常見的危機(死於心臟病),卻把火力集中在十年唔逢一潤的問題上面(被恐怖份子劫機)。同樣,本地社會習慣將同志及各種特殊性癖的人標籤成怪物,例如古時候 Fetish fashion的合法私人聚會被警方高調掃場、記者放蛇「揭發戀足狂徒真面目」、同志戀人所受的輿論壓力等。

但係無人以質和量地比較過,另類性向 vs 正常人,誰對於社會的道德倫常有更大的破壞呢?如果turn out 正常異性戀原來是罪魁,大家又會不會施以制裁?

***

對於同志,黑人是「理解,但不明白」。

子非魚,即使當了同志,還有半數的同志閣下永遠都不會明白。唯有透過理解,慢慢學懂如何去尊重。基本步就是剔除對異性同志的色心,以及對同性同志先天的偏見。

平權運動雖然搞了很多年,原來香港還有超大量的人,連這一步都還未做到。仍然有不少人覺得同志缺少了一些甚麼。

所以有些女仔對男同志特別好,亦有不少男生希望將女同志追到手,就是希望透過自己,將同志「缺少」了的地方補足,補足了,自然就拗返直醫返好啦?

有些同志是個人選擇,亦有些是先天發展。就正如有人不能接受牛肉,我們不會認為他一生缺乏了牛肉,於是不斷帶他到和幸開餐想改變他。認為不吃牛肉是種殘障或違反自然,更是反智。

我們身邊總會有一兩個不吃牛肉的朋友,但有幾多人懂得與不愛異性的人做朋友呢?

(對,我將很多道德倫理問題都淡化了,因為輪不到我去批判同志的道德倫理。)

***

又,Troy 三部曲睇完第一部。六百幾頁,篇幅充裕了,每個人的性格有更多描寫,也就更立體。David Gemmell勁在咁長篇節奏都keep到好好。

以前覺得奇幻小說必定要有魔法怪物才好看,讀了咁多本,証明完全相反。

怪物除了獵奇之外,對於劇情並無多大作用。有人性的怪物基本上就要當成一個人般寫,除了少數跟人類相近的怪物如吸血鬼和人狼,其他的跟人類相距太大,難以代入。以前有一系列滿天神佛的奇幻小說Planescape,作者光是解釋每一款怪物的文化就花上大量篇幅,來不及照顧劇情。不寫,怪物又變成一個空洞的名字,劇力褪色得更嚴重。

魔法越強,英雄味越低,尤其仿照遊戲機或戰棋設定的作品:劍客被砍傷了轉頭就有僧侶施法治療,刀傷止痕蚊咬止血,根本無危機。David Gemmell 將現實世界的難關呈現在讀者眼前:胸口中劍,不單止有機會誘發傷寒破傷風等絕症,而且刺穿了肺,往往要攤抖幾個月,絕世英雄變成氣喘病壞,手無縛雞力。

最heroic 的地方,就是危難當前,英雄傷重未癒,為了身邊人依然挺身,作者沒有心軟施展甚麼奇跡,英雄力戰還是被cut down,甚至連感人肺腑的時間都沒有,就被敵人一劍刺斷喉管。

這樣的英雄,在David Gemmell的故事中俯拾皆是。

Troy 完全沒有諸神搞搞震的情節,沒有魔法、怪物,連人物都來個大執位:Trojan war 的禍首 Paris變成一個書呆子,絕色美人Helen變成一個鄰家斯巴達女孩。主角變成羅馬的創始人Aeneas (別名Helikaon),其父Anchises 更大幅改寫變成Helikaon 年輕時的童年陰影。

書中古人對自然現象的理解也頗有趣,海上遇到暴風稱作Posidon Swims。月經是Hera's Curse。

第一部的感覺頗佳,很怕第三部會出事。

星期三, 5月 14, 2008

給人妻的歌



近日太沉重,輕鬆一下
結左婚,都不要咁老定!

Wives and Lovers

Hey, little girl,
Comb your hair, fix your make-up.
Soon he will open the door.
Don't think because
There's a ring on your finger,
You needn't try any more

For wives should always be lovers, too.
Run to his arms the moment he comes home to you.
I'm warning you.

Day after day,
There are girls at the office,
And men will always be men.
Don't send him off
With your hair still in curlers.
You may not see him again.

For wives should always be lovers, too.
Run to his arms the moment he comes home to you.
He's almost here.

Hey, little girl
Better wear something pretty,
something you'd wear to go to the city.
And dim all the lights,
Pour the wine, start the music.
Time to get ready for love.

Oh, time to get ready,
Time to get ready,
Time to get ready
For love.

俊男版Jack Jones

星期日, 5月 11, 2008

RIP

讀Troy 的時候,偶然發現原來作者David Gemmell 06年心臟病去世了。

Troy 的第三部曲,就由妻子Stella Gemmell 合力完成。

Thank you Mr. Gemmell, for bringing us the fantastic works, may you enjoy eternal sunshine in the fields of Elysium.

廁所裡的肯尼基

前晚看去Kenny G 國際掠水之旅音樂會。黑人在中古時代已離棄這種雲尼那味的爵士樂。Kenny G(及其他相近的樂手如Dave Koz)就像古代的意粉屋,是十幾二十年前新晉中產用來快速建立品味的捷徑:乜你聽張學友郭富城?哈哈,你聽過Kenny G未?未?算啦,我對香港音樂已經徹底失望喇。

黑人至今仍然認為,佢最好火氣就係82-89 幾年的作品,最初接觸係1989年的作品Kenny G live,當時讀初中,家父走去音響發燒友舖頭買的(大概是老闆sell佢買來試機吧?),始終家父鍾情古典音樂多d (可能因為管弦樂較響可以試到多d層次),於是當時的Kenny G live, Nat King Cole 以及一隻contem jazz 雜錦就成為黑人第一批音樂收藏,當時還未懂live咩意思,仲以為佢生完癌病死唔去,出返隻新碟沖沖喜。

再後來自己有d 零用錢,放學走去信和逛,古時候唱片舖又真係乜貨都會翻,所以當時買到幾隻肯尼基最早期的作品如同名大碟Kenny G, G force, Gravity (古人覺得連續食字好型)以及佢的成名大碟 Duotones。

對比佢live 以及studio 版本,嘩!原來首歌可以撚到完全唔同左樣都得,當時真係俾十個勁俾佢。幾年後的Breathless呢,可以算係顛峰之作,火氣稍減活力仍在,Forever in love 幾乎係黑人唯一知道的instrumental MTV派台歌,至於佢首Jasmine flower 就擺明針對中國市場,乳豬醬點麥樂雞,就連黑人祖母一聽都覺得親切。

當年,一班好無品味的電視製作人將一個北宋文官的故事翻炒成二萬幾集重播又重播,直至所有人都作嘔為止。無幾耐,同一班人開始留意到Kenny G的音樂,又再一次將之重覆又重覆濫用到任何現代電視劇或節目jingle 之中,黑人知道係時候跳船喇。

偏偏越放棄就越popular,幾乎開著電視機的地方都可以隱約聽到佢的音樂,甚至去商場廁所解手,播緊的都係going home,幾乎令人going mad。

再後來,見到佢跟劉德華留住你一吻、翻奏titanic、開始出現kenny G collection、Miracles: The Holiday Album,借用某奇幻英雄一句話:you are past redemption!

今次音樂會黑人十分先入為主地覺得肯尼哥哥太刻意要討好亞洲觀眾:每一首歌都有中英文歌名對照,附上少量英漢辭典式的注解 (eg. Havana: 夏灣拿,一個充滿浪漫風情的小城市),對黑人來說不單是個turn off,而且有點受到正向歧視的感覺。

「十分高興能夠再一次來到香港這個美妙的城市 (有幾美妙?),很美味的點心(不是吧?),很多購物(你平日好少行連鎖店?),很好的天氣 (同意,對左半年魚肚白,難得有太陽咯...)」

然後,肯尼基用廣東話,逐一介紹樂團其他成員:「gong kum(其實係keyboard)...die yom git tar...搞gig... 搞gag?...(聽眾:敲擊!)...yeah, percussion, you guys got it.」

表演的一部份固然唔少得佢耍家絕技circular breathing,hold 住一個note 6,7 分鐘,佢亦都創左健力士紀錄hold 到差唔多九個字,其實就係一路吹一路換氣,第一次當雜技睇就好正,放入音樂會的context 其實好悶。

跟下當佢炫耀自己見到Sing Lone Dai Gor,而dai gor 又吩咐佢一晚內學會一首自己的作品然後向大家演奏,黑人聽到就更加反感,腦海中閃到醉酒大鬧李宗盛演唱會、支持23條、包二奶叫雞仲有得代表香港之類的負面回憶。

唔少港產流行曲有種公式melody,又悶又無誠意,尤其係為左配合成龍歌喉度身訂造的k房歌,見到台上班鬼佬好enjoy地表演,突然覺得佢地降grade變左一隊扒房band。

及後,成龍又真係突然現身送花,肯尼哥哥當然又驚又喜,立刻又將成龍首歌奏多一次,就好似奴才見到主子,急不及待來個三跪九叩。

講返句公道說話,當kenny G 演奏返佢Live 年代的作品時,水準仲keep得住。不過除此以外就無突破喇,就連bass solo 都走唔出89年live 的版本,真慘。

肯尼哥哥近年轉營南美音樂 / Bossa Nova 水準麻麻,始終佢份人不慍不火,缺乏演繹此類作品應有的激情,而且市面上有正牌的 Buena Vista Social Club或者小野麗沙,不用幫襯麥當奴版本。

臨到尾聲,香港觀眾例牌頓地encore,肯尼哥哥亦從善如流,一分鐘唔到就標返出黎繼續,第一首song bird 係幾感動的,不過黑人懷疑個keyboard 急尿,彈得勁快想早d 收工,第二首直頭係鬼佬所講的show stopper: my heart will go on,唔係黑人偏見,當時真係無人鼓掌,呢首歌一出,大家面有難色,等佢奏完收工算了。

肯尼哥哥,希望你早日賺夠退休算啦。

星期五, 5月 09, 2008

感冒

唔重又唔輕,抖左兩日,依然周身酸痛鼻水長流,血唔上腦腳跟浮浮。小時候買Ghost Buster 玩具,貴一貴買一細包青bb的鬼口水玩得好過癮,宜家大力一咳就大把。

諗諗下,都幾佩服各位打工男女,通常感冒都係請一日病假,第二日查實未好返都披甲上陣,認真唔話得。

freelancer 好似抖幾多日都得,好自由?如果手頭上有兩單job因為你病左而脫期,找卡數又要等呢兩單job的時候就不會咁諗。黑人甚至夠膽講,天下間最無incentives 告病假的就是freelancer,病左無benefit 月尾無糧出,神啊...求你將疾病改賜給更有需要的人吧!(合什)

星期四, 5月 08, 2008

陰氣重

一直以來作息正常,飲食均衡,無不良嗜好(看AV都少了),勤做運動,體能節節向上,應該好健康,點知就病了。

有同事曾經托高人望氣,說辦公室陰氣重,旺女不旺男。講都無咁邪,公司兩位男同事都先後重感冒,黑人在感冒潮中撐左個幾月先至病發,算係咁。

病左,成個schedule以至全世界,都在等緊黑人好返。

咁大壓力,當然訓唔著。

所以先至有呢篇野。

再試下訓先,早安。

星期二, 5月 06, 2008

面冊男女

偶爾登入自己的面冊掃掃灰塵,塵不多,連孤魂野鬼都不來了。
其中一位「朋友」剛參加了另一個孤男寡女小組,以前在輸得甘見過太多這類孤男寡女支援團體,也就不安好心的走入去八卦八卦,原來只是有個人照片、功能較齊全的輸得甘罷!骨子裡還是同樣的東西。

第一個問題:入面的人是否甩皮甩骨呢?

扣除疑似PS合成或超級刻意配合鏡頭角度那些,大多數的外觀都是正常貨色,二十來歲,間或有年紀稍大或稍細的。觀乎某些男女的面相,在老蘭CWB,MK等殺戮戰場應該頗吃得開,咁都單身,如不是扮豬食老虎,就是個性上有點問題了 (ok, 黑人明白有些人工作上較難找到配偶,但性格跟職業互為因果,納入性格類處理)

第二個問題:到底搵唔搵到食?

千幾個會員,都唔知有幾多個熱心,搞活動名額通常以三五十為限,小惠未偏也。將之當成香港classified for singles倒還可以,如果閣下刊登的照片夠吸引 (85分俊男或70分美女),相信都有機會吸引到人send message 或者add as friend...卦?但係齋睇相都有六七十版,能夠眾裡尋他千百度,太多選擇,個個都係一張相加一個名,反而唔知點樣識「朋友」。

第三個問題:孤男寡女小組能否成功?

首先當然要介定「成功」的定義是甚麼,黑人覺得一個小組要成功,要有兩件事:幫人搵到食、唔好摺埋。幫人搵到食並不難,只要夠熱心參與每日討論,逢活動必到,打兩三次邊爐、出去BBQ、踩單車、chok墨魚,實會識到人,之後能否行得埋係另一回事。有活動攪,自然有人慕名而至,keep住有新貨源circulate。呢一點,輸得甘以前好多小組都做得到。

唔好摺埋就較難,呢類小組通常係一兩個人發起,存亡當然亦落在果一兩個人身上。當佢地升職加人工結婚生仔,或者升唔到職凍薪守長寡,自然就會無心機打理,如果有熱心人接捧做搞手固然好,但通常都會因為搞手潛水而煙消雲散。理論上一個組織要持久運作,必須有機制程序去培育及篩選接棒人,一時三刻寂寞難耐的孤男寡女會又點會有呢d野呢?

聽聞一個人的朋友圈上限約為50人,即係話一個搞手最多可以跟50人維持友誼,再多就開始疏離,疏離d會員就自然會流失,繼而變成小圈子新人免進。面冊孤男寡女團差不多有千二人,即係話至少要有24個group leader 先至可以維持較緊密的關係,點樣協調呢24個group leader 已經係一門管理學的課題。

所以,黑人對這個面冊小組不太樂觀咯。


***************

PS: 正片推介:加拿大溫情喪屍喜劇:喪屍人Fido。不會上映,得閒去VCD舖搵搵。

星期日, 5月 04, 2008

五月

1. 法國五月到了,有音樂會、舞蹈表演、電影、美食美酒 etc 不容錯過!(剛發現Karen Ann 門票售罄了, Hi & bye Karen!)

2. 最近不斷在聽Paul Oakenfold 的Urban Sound Track,成人童話集。Kylie Minogue 負責說書,口技一流(笑),Oakenfold 在背後打碟,整個畫面變得後現代:潮爆愛麗絲夢遊仙境。(潮極都就黎10年了)

3. 同碟仲有另一首說書soundtrack Oliver Twist(霧都孤兒),經Oakenfold用電子音樂一襯底,去人性化,更加慘。

4. 查實,華文經典說書都可以重新remix 出碟喎,向政府伸請個偽術發毛基金都不錯 (吹水終了)

星期六, 5月 03, 2008

巫苟寮

子貓物語的網主 Chris 在blog中聲言支持陳xx,立刻招惹16x個回應,當然大多數都是指摘Chris不愛國。

移了民,就可以安心講真話,真好。

上了年紀的世界觀已根深蒂固,不必多提,維園阿伯不會突然大徹大悟變成民主阿伯。黑人較感興趣的是年輕一輩的想法。

留意某些論壇一段日子,新一代的網民,意識大概是這樣的:

1. 國家正在興起,世界各國(尤其是美國)想阻止中國變強大
2. 支持陳xx、泛聞、臟毒、抬讀,就是不愛國。
3. 示威破壞和諧,也是不愛國 (即使平日示威,也是博出位、搏傳媒注意,不務正業阻住地球轉)
4. 不愛國,就有如一個家庭不和諧,將父母和兒女拆開。想拆散和諧家庭的人,都是別有用心。
5. 奧運是一個象徵和平團結的體育運動,為甚麼外國人要分化和破壞它呢?
6. 共鏟擋是不好,但xxx就很好嗎?(xxx可以是任何已發展國家)
7. 你對中國xx知多少?不知就不要咁多爹。(xx可以是歷史、地理及任何國情相關項目)

以上好些想法,比內地甚或更保守盲目,30年後香港會如何,就看現在這班年輕人。而黑人這一代嗎?老實講,如果小弟是曾特首的政治化妝師,大概都不會花太多心力討好我們這一群,因為先天八字唔夾,太難討好了。而我們之後,有一群被洗腦的好學生,聽教聽話。

美國人可以支持民主黨或共和黨而仍然是愛國的。
中國人卻沒有這種選擇,於是,我們的愛國無可避免地跟愛黨掛勾在一起。
(別字,是為了避免被和諧掉)

btw, 立會選舉,大家憑衫認邊個係衰仔