星期三, 3月 18, 2009

我不是假電車男

剛剛睇左星期日檔案關於港男部份,比較有感觸既係...

原來我係識Peter架!

雖然都係今日先至知佢真名,Gundam DX入面我地已經夾左好多次。佢自稱沉默寡言,實情係非常之多野講,每場輸贏都唔會靜落黎:「哈哈哈頭先二連左隻老虎,跟住再追多一set格鬥,哈哈哈贏得幾險呀!」「哈哈哈!你隻紅渣跌得太近敵人,我部高達已經盡晒力走黎救你都死左呀哈哈哈...」

唔少網友comment話Peter講野好煩,有時都幾覺,尤其贏得太順時唔想高調廿文廿武,見佢比手劃腳興高采烈,只好敷衍幾句。不過,佢算係易夾,機品頗佳。

打Gundam DX差不多七年,粗粗地可以講閱人無數。一個人機品如何,多少反映佢人品如何。

識Peter咁耐,未見佢輸到發脾氣,劣勢都會盡力打,反而有些不太電車的朋友,連輸兩三場就會怨個partner打得差、賴手掣唔得、賴對手打得狗、拍掣、唔認輸等乜都有。

Peter衰在唔識睇人眉頭眼額,少少語障加上學歷低,在香港社會可以講死左九成。

我睇返自己寫的幾篇電車男tips,幾乎無野可以幫到佢。

如果Peter要變成marketable既港男,首先要大幅改善自己的說話技巧,唔好話呢d course好貴,就算有錢都唔知去邊度搵。其次,要轉份至少高一倍薪水的工作,現在時勢是mission impossible (中五學歷),再其次,要完全改變社交圈子,改為去蒲pub落D,或者上網搵孤男寡女/social gathering。因為佢現在蒲的地方完全不會有單身女子,至少不會有單身女仔玩Gundam DX,落場打果兩三個女仔,身邊都有個男partner。

Peter哥除左進修搵好工之外,為求談吐有趣有內涵,少不免要惡補文史哲時事經濟藝術,最好去外國旅遊見識。咁改造法,等於挖晒佢心肝脾肺腎再起骨,然後塞返隻terminator機械人入去,除左層皮無變之外,其餘全部換晒唔係果回事,唔可以再叫佢做Peter了,咁易變咩?

好些不以為然,認為電車男「懶」,自以為靠拼搏上到位的成功人士,唔該認真檢討自己有幾多靠家底,有幾多靠僥倖,又有幾多靠天份,減走呢幾浸之後先好講成功係靠自己努力 (換言之,一個無乜天份、家貧,機遇平平的人單靠努力能否有相近的成就)

電車男毒男似乎是香港和日本獨有,印象中加拿大低收入人仕都不會像「港男」般被標籤歧視。確實有一班男人比較geeky/nerdy,但係衰衰地總會搵返個女仔做老婆。

加拿大讀書不成好小事,男仔high school畢業做超市收銀不怕無錢養女朋友。老來發奮三十幾歲先至再讀collage(甚至再讀high school)都無乜大問題,英文有口音無問題,唔似香港地有港音英語會被香港人歧視 (鬼佬查實唔介意的)。加國人高學歷甚少歧視低學歷,稅收雖重,大家平平穩穩夠交租夠兩餐就算,好少學香港咁十年搵一世人既錢為求買個的式豪庭單位。加國人社會和諧係做出來,唔係靠領導講既。

香港地CE / A level衰左基本上呢世人可以收皮,例如Peter個case我就唔覺佢有咩可以「進修」,隨時讀餐死都無用俾學店白賺學費。算你好彩讀得成,除非天資異稟,否則一把年紀普通成績畢業,有幾多老細會請?

再講,世上永遠某個百份比的人不適合讀書,英殖年代講fair play,盡可能令每種人都有均等晉升機會,讀書差的慢慢都有辦法賺到錢,間接令港男女求偶的機會相對公平。現時政策向金融業傾斜,適逢市場趨勢,溝通能力較佳的女性無疑佔優。遲熟又不擅辭令的港男一旦上唔到位,真係無乜機會翻身。

姑且不提Peter這類extreme case,黑人曾上過國語和日語班,男人掌握國語的捲舌、日語拗音如tsu, kyo, gyo甚至英語的children(不少港人讀成「超鈍」)等非常吃力,性別差異非常明顯,職業無分性向或者得,無分性別就難d。

社會發展單一畸型,才造成現在男女供求失衡的情況。這是人口政策和社會資源分配問題,並非指摘「男人不發奮讀書」就可以解決。換過來,假如社會以體力勞動主導,指摘女人「唔練大隻d」同樣不合理,有遠見的政府自應處理這種社會不公平現象,當然,那絕不是我們熟悉的香港政府。

以前我最討厭人地講風涼話指指點點,想不到今次港男女成了幫凶之一,慚愧。
(Peter哥,下次機舖見!)

14 則留言:

麻辣七舊飯 說...

其實peter仔都幾慘...
佢都冇做d乜野衰野,(佢只係似隻鵪鶉姐...)
但係比好多人鬧...囧!!

Alex 說...

When you talked about Canada, it makes me think of a very fundamental difference of values between Hong Kong and Canada/U.s.

In the U.s., people in general don't look down on people who's satisfied with their current lives and look for no improvement financially. If you tell a Hong Kong girl about this, she'll say that you're 垃圾.

Statistically speaking, there's only a small number of people who has the talent and luck to get rich. So, it's perfectly normal for some guys to stay, eh, normal. If that's true, it's just unreasonable to look down on normal people with a normal salary like Peter.

After all, he's a job that brings value to society. How does that compared to the wealthy bankers who're admired by Hong Kong girls and also brought us this nice financial crisis?

Probably should write a post about it.. :)

說...

但係响加拿大,無論你另成點,你既人工都只係可能同冇咩讀過書,又唔算好努力工作既體力勞動人仕差唔多(甚至差過...)咁某程度上係鼓勵緊啲人唔去讀書...

講到尾,又係資源分配問題...如果香港既住屋成本唔係咁貴,人人可得既空間比較人性化,對「錢」既追求可能冇去到咁極端...你諗吓兩個人住三百呎,以整體世界標準而言,都係一個好難接受既情況

Betty 說...

逼到甘...好容易拿刀互劈.

Transquility 說...

我都係灣仔機舖同peter打過DX機..

睇了電視...才知佢個名...
估唔到....

匿名 說...

根本無話咩『電車男 Tips』,咩『港女指南』。 Peter 仔我睇到嘅問題只有下列幾項:


1. 佢可以當打機係玩樂嗜好,但也要抽身返去現實生活。

2. 佢應該睇多啲嘢,唔好偏重只去討論區,睇多啲其他文章 ( 恕我直言,睇高質果啲唔該 )。

3. 聽番多啲時事評論節目,對說話技巧有幫助,信不信由你 ( 唔係哈哈笑森美小儀果隻 )。

4. 佢唔係衰樣衰,而係衰『無自信』,其實好多人都係搵幾千銀,Peter仔無問題,只係佢太無自信,於是在神態上表露出來。


如果你下次同 peter 仔夾機,你俾以上呢個 message 俾佢,叫佢認真諗下,佢無乜點,只係有以上嘅問題嗟,當佢接觸多啲嘢,睇多啲書( 無人唔俾你睇漫畫,但唔係漫畫 only ),聽多啲睇多啲,個人睇嘢眼光會唔同晒,佢信就恭喜佢,佢當狗噏就由佢啦,繼續去 MAID Cafe 啦,係咁。

唔該晒。

匿名 說...

電車男毒男似乎是香港和日本獨有...

唔好乜嘢都賴日本日本,有咩古靈精怪嘢就話日本傳過嚟之嘛,日本《電車男》根本就唔係香港果種,香港只係亂咁 Stereotype 人地嘅名詞。


而且日本都無香港咁衰格,咁多毒男,香港毒男自己人玩自己人,香港男人想安寧咁改進自己,都要先頂住班毒男妖言惑眾先啦。( 日本女仔都無港女咁極端,人地日劇都健康過你珠光寶氣呱!? )


諗下專登叫果個 Peter 仔搭電車,知唔知咩意思?咪就係名符其實叫佢『電車男』囉,咁係咪亂咁 Stereotype呢?

塞米一條揚陸轟炸機 說...

一:"香港地CE / A level衰左基本上呢世人可以收皮"...

真的嗎?掉返轉頭試下叫個高學歷的女士走去茶餐廳應徵做洗碗?就算你出價平過一個阿嬸,老闆見你生手又未做過三唔識七做乜要請你?

各行各業都有不同的入行方式同要求。用paper certificate呢種偽客觀標準黎評鑑一個人的職場價值本來就是本末倒置。之所以外國同香港做阿四的待遇會有如斯大的差異,係因為所謂的"低學歷/低技術工作"的定義太清晰,歧視心態太廣為根深締固。

今時今日做打雜,人工勉強夠過生活左手入右手出,老實說,單純以一個活在勞動社會裡的人來說,算是成功人士了。正如黑人直指要害地說,如今社會發展不平衡,平民思想缺乏多元教育,所以成功人士的定義,已經變得非常狹隘(甚至已經不是(做任何一件事)成功與否的一回事了,只要你有錢有品味懂消費就行──而不是"能賺錢"阿──如果一個人的價值非得以錢來計算不可的話。)

至於知識,為甚麼一定要廣博(即所謂的向橫面發展)才算是"有知識"?對一個專業人士來說,在自己的工作行業上窮大半生心無旁敖地鑽研,不是一個人處事應有的態度麼?我不認識Peter,不知道他是從事哪一行,但與其要他去學這學那,不如叫他集中一點向他夢想的事業專注作準備吧。坐這山望那山一事無成誰也懂吧。

對的,我們從中學就從長輩那聽著要"睇多d野",但你可有聽過他們跟你說要"做多d野"?...如今資訊知識都變成了消費品,我們有必要教一個九歲的小朋友如何分辨紅白酒嗎?資訊的自由,其中一樣要素就是不可以歧視(所謂)次文化。要鼓勵人多點反思多點訓練獨立思考好點溝通技巧,不一定要靠"主流"媒體的。正如做樓面時你該先遞水還是先問對方要吃甚麼,電視劇的橋段不也是從日常市井中找答案嗎?

回應頗長沒經整理,請諒。

塞米一條揚陸轟炸機 說...

二,我都覺得今時今日男仔最忌係無自信。好多人選擇"自動摺埋",對自己的XX(可以係任何野)沒有被接納的信心一定是其中很大的原因(唔,我承認這句是廢話XD)。

我認同Peter有必要擴充一下自己的生活圈子,但更重要的是step out from his comfort zone and make the new place comfort囉。勉強無幸福呀。

塞米一條揚陸轟炸機 說...

最近發現身邊多左d宅男宅女,這一群被描繪得如斯不堪其實很無辜的。之所以肯主動同佢地做朋友,係因為有d處事原則或者待人態度,佢地相比比所謂的成功人士或知識分子還是上進青年,都好得太多太多。

爆炸頭 說...

睇完你呢篇先發現,自己無資格對Peter仔指指點點,因為我地根本連佢真人都未見過,單靠一條片係唔夠去了解一個人。慚愧。

匿名 說...

其實你認為他為什麼會接受訪問呢?
真的是為求蛻變的第一步嗎?

B.Y. 說...

我覺得英殖年代的TI/TC(後稱為IVE)是十分好的平台.讀唔到書咩?學返門野囉(我都係TC出身),老闆知你可以即食,好些廠商(我讀MANU.)寧請IVE都唔請大學生添呀!

老實講,我覺得香港口音反而容易聽得明播(印度,甚至星加玻口音都係)反而英國的Yorkshire, Highland 口音,我係極辛苦先聽得明(不幸地,我老闆就係Yorkshire,GM係Highland!!)

至於Peter,好老實咁講,cool下棚牙係會有幫助的......

匿名 說...

邏輯錯亂,但情理搭夠,唔錯。