星期三, 8月 29, 2007

男人無用


每逢見到寫港男港女的文章,心裡有點鬱悶。無論踩港女,還是數港男,最常見拋一大串文化人物、著作經典充撐場面,令作者看上去很有內涵,從而矮化對方。

這種「內涵指標」是很無謂的事情,大家興趣不同罷,我沒讀過托爾斯泰,你有玩過MGS嗎?

同樣,為了別人膚淺的標準而看經典著作(那位「別人」可以是實質一個人或虛構的概念),在黑人眼中也是很膚淺的行為,不喜歡,又何苦勉強?

喜歡文字戲劇的人愛莎劇,滿足感源於作品的美而非一種身份的認同。他更不會歧視喜歡Twins 或梁望峰的朋友,大家興趣不同罷。

古典音樂和莎劇只是古代的流行娛樂而已,並不是特別高的品味,Jan van Eyck 的Arnolfini Portrait,講得衰d,係古代的婚紗相服務。

大樂必易,藝術文化跟市井草根向來無法分割,黃霑有斬料斬大舊叉燒,Jack London隱於水手老粗之間取靈感,杜甫作詩務求老嫗能解。事事抱著中環價值觀看不起中環以外的人,世界頓時變得很狹小。

(弔詭的是,黑人為了解釋自己的見解,未能免俗,同樣拋出一堆人名出來撐場)

看到黃迪詩的blog,感覺不爽。

這類文字主題大概都是講現在的男人太不像樣。男人要怎樣,才算像樣?

母系部落社會雪姑七友七枝棍配一個窿,回教國家一夫多妻,古希臘男人除了老婆還有一個男朋友,中國人三妻四妾,菲律賓的女人養男人,近代西方耶教文化才搞男外女內的一夫一妻文化。

男和女向來都沒有「像樣」過,一直隨著社會不斷在變。

黃在文末講玩樂人間穿戴名牌叫雞叫鴨,那是有兩個錢就做得到的本事。說男人不像樣的,只是不像她心中二十年前那套樣子而已,用那一套鏡頭望現在的社會,自然甚麼都會變得像哈哈鏡。

16 則留言:

VC 說...

Bravo!

cheryl 說...

我看完有同感,雖然佢講有d嘢係冇錯,自己都好有條件(似乎)。不過我比較唔同意人將自己build up on其他label上(簡介可見一二)... 這樣子好有壓力。

點都好啦,唏,大家了解多d就唔會咁啦...最終其實咪又係喺同一個pool度尋找...

Chris 說...

唔知你有無睇過偷天陷阱(Entrapment)?我很喜愛這部戲。
故事講述辛康納利是個神偷,喜愛盜竊藝術品。本來他總是獨自行事的,但一次,他需要找一個拍擋合作,於是找上catherine zeta-jones。Catherine在他自成一國的家裡,看到放滿了珍貴的藝術品,驚嘆地問:沒人看到你的收藏品,不覺得可惜嗎? 辛不屑地說,他不是為了別人看所以才收藏藝術品。
我覺得這句挺有意思。


每看到寫港男港女的文章,都覺得似在談一個不盡不實的stereotype,相比起現實生活,好似有點失真。

黃的blog由web2.0無啦啦downgrade去番做1.0 wor,係咪你個留言KO咗佢呀?
另,你末段那句好眼熟,好鬼似喺陶傑度睇過~ haha

TK 說...

> VC
thx!

> chryl
每次望到呢d 文章,男人行歪少少都會俾佢批鬥,咁樣並不是嘻笑時弊,只是向男人發洩罷!發洩完了,不會有甚麼得著
雖然,可能係某一類讀者的解慰酒

條件太好都係慘的
恆生代言人果個女model wylien 人又靚,又斯文家底又好,不過一直無男仔敢追

都算係見過佢真人幾次,感覺係只要有男仔條件尚可,大膽d叩門,就會給你開門

> chris

我收晒火啦,果個留言都係講desperate housewives 入面果位Lynette 的故事,證明女人不一定需要揀過強過自己的男人,大家恩愛就可以,似乎佢都接受唔到

哦?可能真係響邊度睇過哈哈鏡果句,不過唔記得囉。

你講果套戲我仲未睇呢...話時話辛康納利唔知仲會唔會有新作(傳聞佢在寫歷史書),原本Gandulf 係搵佢做架,不過佢推左

TK 說...

> chryl

呀....打漏了

你會唔會覺得身邊d 男仔都係咁?
若果你有興趣同佢地做fd,你又會點做?

cheryl 說...

大部份男仔都係唔敢o架其實
不過我唔mind自己去approach人
因為比較討厭俾人食住
如果係咁,調channel囉
通常如果佢見你唔係吊高嚟賣都會睬你o架(即係講吓有味嘢爆吓粗,必要時又扮下鵪鶉)

黑人 說...

好奇一問
主動approach會唔會變左兄弟而無得進一步發展呢?還是會易d 入手?

例如小弟自己都有不少紅顏知己,十居其九都係覺得黑人無殺傷力所以先做朋友,換言之係不會consider 黑人作為佢地男朋友的選擇

若果大家都無呢個心就ok的,否則封死晒d進路都幾慘

cheryl 說...

咁其實我諗女人要lure一個男人,冇話唔得(除非佢個人有d好嚴重嘅turn-offs啦)。女追男,隔層紗,其實都唔係唔啱o架。

你都識講係人哋consider啦,你冇咩choice o架其實=( 不過好多嘢人夾人嘅,有d人一埋身就係唔係朋友啦,都無謂嘥時間去扮做朋友囉...哈哈

做咩你有問題咩? 做咩成個問題少年咁...暗戀人哩?? =p

Chris 說...

(竊笑)XD

黑人 說...

> chryl

照你咁講,最大問題應該係女仔自己心障啦
不過我聽返來的例子通常都係女仔太主動嚇走左個男仔

都係想多d了解女仔心態處境嗟

因為宜家似乎女仔真係要主動d,但又似乎無乜人明確講得出應該主動成點,男仔變被動了,又沒有接受女仔主動的心理準備

小弟暫無對象啦,主要都係事業搖擺的問題

同埋好少玩暗戀,真係鍾意的話會好快講出來,接受到就一齊,接受唔到無fd做既就由佢,反正性格不合長遠做fd都無謂啦

塞米一條揚陸轟炸機 說...

(筆記)黑人原來有做好人的特質:p

cheryl 說...

哦咁有d人主動到好飢渴咁你都驚啦,ons仲話啫

其實,我近來嘅自身經驗,都可以話好被動,哈哈。不過其實我都係個主動嘅人,以前成日約人去街睇戲咁囉,約約吓就唔約,等人約囉。以退為進係好頂癮o架~

人哋有冇障唔知喎。可能真係未有遇到一個可以令自己出擊嘅人呢。我被動,都係因為shut down咗啫,當時完全冇獵食之心,so...哈哈

過內人 說...

黑人

我認為那強調品味(品牌),再以未深入思巧及理解的文章,莫理該筆者是真是假,但這個現象的背後,潛藏一份速食的文化。

要成為上等人不容易,不是有錢便可,還要有內涵。不過,在城市生活,有錢不太難,有內涵卻是日積月累的事。

我所指的內涵不是單單每天看FT, HK Tatler,或者莎士比亞等便可。我思故我在,看過,還要思巧、反覆思巧、不斷思巧、領悟等。

但為了快速成為「上等人」,那便求其,求其地用上品牌來抬高自己,引用名著名人的文字來提升自己的內涵。

那分別其實顯然易見,就是內涵,思想的質素。

食麥當勞的人就是無品味的人?飲水要飲法國水?要戴PP才是有貴氣?李嘉誠想用LV定係LV想李嘉誠用LV??你不聽流行曲但林夕卻常看名著,然而你卻不能填一首詞。霍英東這名親中人士無法成為黃小姐心目中的好男,但死後受親中,在野各路政治人物致敬,蓋國旗別世。

我想大家是都明白我在說什麼的。

只做一次善事便要人敬重;看FT,Bloomberg便是財經專家;開瑪莎拉蒂便是舒密加;不去麥當勞大家樂才是對食物有要求有品味,做人多容易呢!!

世界是沒有捷徑的,建樓建得高,但卻沒有好地基,便受不到天災人禍的考驗。

黑人 說...

>過內人

歡迎你!

品牌文章所以令人納悶,在於將「品味」縮窄成為一個template,不買Gucci就是沒品味,不看沙翁就是沒水平之類

你說得一點沒錯,內涵的確不能用錢砌出來,內涵也不是只屬於high society的某一種口味

上次跟一班鬼佬藝術人傾計,大家用紙杯膠杯裝廉價紅酒飲,戲肉是吹水內容,傾scanner darkly, 講Mr. Bean的sillywalk,講一下大家最新的油畫作品,小弟跟鬼佬鬼妹們講解「天下太平」是怎麼玩的...紅酒只是放鬆神經的點綴。二十來歲的年輕人一本正經地說這個酒的body 不夠full,不是太老成就是造作了

最開心的交流,在於每人都有一套自己的品味專長,大家在桌子上擺一道自己的菜互相襯托,拜托,不要祭出沙翁巴伐洛提就唯我獨尊,又不是model answer 答試題

*****

另,見到如閣下般年輕理性的建制派支持者是好事。

希望有朝一日會變得好像共和黨民主黨般有較健康的政黨政治,也希望是20年內發生的事啦!

七十樓危危下望 說...

> 最開心的交流,在於每人都有一套自己的品味專長,大家在桌子上擺一道自己的菜互相襯托,拜托,不要祭出沙翁巴伐洛提就唯我獨尊,又不是model answer 答試題

說得好!

黑人 說...

>70

謝!
歡迎你!
得閒多d來吹水!