星期二, 6月 17, 2008

直銷迷魂記 (四) 外傳



6月19日更新:上圖是澳門亮碧思在澳門日報的結業啟示
香港的記者朋友說沒有新消息,其實這條題也不錯「澳門政府果斷取締詐騙集團,香港警方多年無功」

************

如果無時間,可直接skip 去conclusion部份)

上文提要:話說星期四晚黑人答允明日幫襯安信好兄弟,加入空氣市場大軍後,次日突然人間蒸發,西裝友同埋西裝友的師母娘娘打左成朝電話都搵唔到黑人。

黑人星期五在公司趕工,心想係時候試下退唔退到貨,問題係香薰人已經諗好晒劇本 cover 任何一個可能出現的退會情況,甚至阿爸阿媽要脅你唔退會就懸樑自盡,佢地都有說服你的template (當警方談判專家一流)

根據香薰人的邏輯,總之你退會就是離開發達天堂,而人是不可能活在發達天堂以外的地方。

於是,黑人base on 身邊一些真實元素,當晚編左個故事打返俾西裝友:

西:嘩!黑人你咩事?我好擔心你呀,我仲以為你出左事!你宜家響邊呀?
黑:「唉...我今朝俾老細鬧左成朝,接唔到你電話。不過都係小事,中午先至大鑊呀。我其實係教徒黎既,之前有一晚俾神父撞到我地響公司附近出入,佢中午打黎問我係咪做緊直銷。」
西:咁點呀?
黑:「我唔厄得神父,我咪答佢係囉。跟住神父話,教會有規定唔俾做直銷。頭先我要告假去聖堂俾神父訓話,宜家先打得電話俾你咋!」
西:下?我地盤生意都係幫人架喎,點解唔做得呢?
黑:「神父話教會有規定唔準做呢行,佢地原本叫我唔好再搵你喇,我又唔想咁無交帶,同埋神父話我要退會,將d錢捐左佢。」
西:我諗神父可能誤解左我地盤生意,不如等我同佢傾下啦,我當初應承左大家一齊闖天下,你有難處我一定會幫你諗辦法解決。
黑:「我諗神父唔會見你架喇,佢頭先講到好絕,話以前都有弟兄姊妹做過直銷,俾教會知道後都會退出。而且我父母係教會入面的重要人士,如果俾大家知道佢地個仔做緊呢行,對教會唔好。」
西:你幫我約一約神父出黎先啦,我會同佢傾得掂,你約到立刻搵我啦 (有電話入,收線了)

隔左一兩日,西裝友就無再接黑人要求退款的電話。於是黑人打俾西裝友的師母娘娘,再一次陳述自己的處境要求退會,師母娘娘就推搪話係西裝友經手,一定要搵返佢,咁橋西裝友上左大陸,返到黎就可以傾。(另一位在亮xx工作的朋友告知,西裝友根本日日都在香港,要覆call一定得)

當時黑人知道一旦去左沖繩就會過左九折退貨的14日期限,於是出發前幾日都不斷嘗試搵西裝友,西裝友大概怕神父屈機,潛水了。

********

雖然自願上釣,都不甘被西裝友咁易賺走d錢,立刻在佢出沒的機舖放消息,爆出西裝友的真身以及自己被騙的經過。(原來有人上過去聽課堂,但心存厚道無爆響口,亦有人唔知數碼皇冠係乜)

放風後,第二晚就捕到西裝友。

機舖挑機都係街坊鄰理,大家一見西裝友,立刻向黑人匯報:「你要既人黎左喇。」

跟住的發展都十分戲劇化,原本成班機友圍埋挑機,突然散晒剩低西裝友一人,跟住佢就聽到黑人愛的呼喚:「老細,我d錢點算先?」

西裝友不愧做左三年,認真淡定:「坐低打機啦。

「講左正經野先,我想要返d錢喎。」

我唔會在機舖傾生意,一係就去第二度傾啦。

跟住二人就去左附近糖水舖講數。

「你潛水算點先?神父在崇拜向大家講左我會將d錢退返再捐出來,我宜家失晒信,你又話有14日9折退貨保証,咁有無免潛保証呀?」

嘿!你估我唔火滾呀,你又應承左話大家一齊闖,一齊搞好呢盤生意,突然閃個神父出黎就話唔做,成個團隊都好失望呀!

「一件事還一件事,係你話正規合法經營,又話有乜乜物物保証,宜家我想退錢都唔得,咁叫做正規呀?我要退會係個人選擇,你唔退錢就係違反合約精神喎!你既然月入十萬,退返二千零蚊俾我,好小意思嗟,咁都有難度?」

你估我會厄你一千幾百咩?我宜家身上都有啦 (拿兩張金牛出來揚)... 我唔明點解一個神父就阻撓你既夢想?我地係正規經營合法生意,我地係幫人,宗教都係導人向善愛人如己,點解佢會反對呢?

我應承左你,大家拍住上,你有咩困難,我一定會幫你解決。我做左三年,咩反對既聲音都聽過,曾經試過有對父母舞晒菜刀,話個仔唔退會就劈死佢,我走上去傾左九個鐘,由誓死抗拒變成接受,現在一家三口都加盟。我都有隊友信摩門教既,本身教會都唔允許,我走去同佢地個牧師傾,傾到佢地有九個教友都join過黎,我相信一定可以同你個神父傾得掂,令佢容許你追尋你既夢想,呢條路我已經行過,你信我啦。

「我唔係唔信你,不過你都要信我,我宜家真係需要退左d錢捐左佢。講真一千幾百,你估我自己無咩,我要厄個神父,我可以自己出錢扮捐左,問題我地唔係向人負責,我地係向天負責,你唔退返d錢俾我,我真係好難做,你當我係朋友既,就退返d錢俾我啦。」

退返俾你唔係問題,但係我真係想同你個神父傾下囉,無理由佢咁無人性,禁止教友發展自己的事業、禁止人追求自己既理想。我淨係想見下佢,同佢了解下,咁都唔得?你地個教會咁神秘?我以前見過d基督徒都唔係咁架?

「你做香薰生意都好難向其他人解釋係咪?我地個教會都一樣,好難三言兩語解釋得到,為免你誤解我地係邪教,我咁樣解釋啦,基督教有好多唔同教派同教會,每一派都有自己家規,我地既家規同你見過的有少少唔同,神父唔會隨便見你的,同埋我地真係有明確規定唔準做傳銷,就算合法正當都唔俾。我地有弟兄做煙酒公司marketing,返左教會之後都要辭工。」

你地教會咁無人性既?咁佢叫你守童子身你咪成世唔準打飛機?

「係架!我地有弟兄決志守獨身,佢地真係一世唔結婚做侍奉。所以退款真係唔關錢既問題,係我要向自己信仰作一個交待,咁你退唔退俾我先?」

公司政策就退唔到俾你喇 ,你可以退到幾多錢,不如我宜家同你計一計:第一晚你上來,我俾左件貨你,果度千幾銀,入會費三百幾,你唔信可以上我地網頁查,七除八扣,14日限期前本來你可以收返五百蚊。

(按:網上指有三個月5折退貨限期,只限6萬元大單。西裝友第一晚無提及價錢,突然拿左一盒貨在黑人面前拆盒點燃,故不能退貨。價目方面西裝友無講大話,不過亮xx的官網並無價目表,反亮xx的網站反而有齊銀碼以及市價對比,由於有大量前分銷商無法銷貨,就算閣下想幫襯「空氣產品」,市面有大把選擇,價錢是亮xx的二至六折不等)

如果我同你神父傾完,講唔掂佢,我私下退返五舊水俾你又如何,至少我叫做試過嘛,宜家未試過,我好唔甘心,點解神父一句話就限死左你發揮既機會呢?我最初身邊都有好多人打巢我,三年前一齊玩劍擊青年軍既隊友直頭完全疏遠晒,不過今日睇下佢地發展成點?我用事實証明左俾佢地睇。

我父母最初都擔心我架,直至我宜家搵到錢可以俾佢地安心退休,佢地先至改變對呢個行業既睇法,你諗下,連父母咁親都會誤解,何況係身邊其他朋友呀、教友之類,佢地係好心勸你,不過佢地唔了解呢個行業運作,一定會講說話阻撓你,如果唔得,我仲做到三年?

你睇下呢架車(掏出手機,顯示一架名跑車照片),我今年發展個勢一定上硬公爵,年底我就會買呢架車,呢架唔算係乜野名車,不過你都聽過課堂講過啦,窮人係用時間換取金錢,富人就用金錢換取時間,就算你不斷打工做落去都唔會發圍架...

「咁即係話,你見完我個神父,傾唔掂,我先至可以收返舊錢,否則就一蚊都無?」

你俾我見左神父試一試先,我都係想幫你咋!黑人,你唔通一世做IT咩?做唔長架,我以前都係在Ivy 讀com sci,你條路我知道行唔通。唔通你等我上晒公爵賺左千幾萬先至加盟咩?教會限死左你,我為你著緊咋。

「我講過,有d錢我地係唔會賺的,無論幾易同幾好賺都唔會做,你再講就係唔尊重我既信仰,既然你唔退錢俾我,咁都無野好講啦。」


****** Conclusion ******



  1. 跟「月入十萬」傾左兩粒幾鐘都唔肯退返五舊水,黑人傾向相信九小時談判的經歷是真事。再拗落去頂多係爭返五舊水,西裝友堅持落去,卻有機會換來黑人十幾萬的大單、神父的祝福甚至扯多幾個教友落水,大家的鬥志此消彼長,勝負立見。

  2. 黑人由始至終都無任何單據,多次要求下,西裝友亦從未提供任何合約文件副本,只會叫你上黎公司,或者問你是否信唔過佢,總之就不會俾副本你帶返屋企。

  3. 任何保証都是假的,包括基本的退貨保証,雖然表面有些條款保障,實質運作時有好多方法令條款無效,例如退貨期之前唔接你電話,甚至在缺乏單據的情況下強行吞左你d貨。當然還有甚麼x個月賺幾多的保証啦,呢類保証同預測股市一樣,成功固然係佢的功勞,衰左就係你的問題。

  4. 香薰人習慣將問題歸疚於下線:「呢度就好似一個社會縮影,有人成功有人失敗,公司個平台係中性既,成唔成功睇你自己。」呢句說話慢慢令人接受一些不合理的情況,例如你唔識飛,係因為你唔夠努力,個天係中性既。卻不準你思考到底人類的生理結構能否飛行。有不少人即使脫離亮xx,仍然會歸疚自己能力不足,而不是公司營運手法出了問題。

  5. 亮xx 或者仍是合法經營,卻絕不是誠實的生意系統。亮xx (或者歐美多數的MLM)不誠實的地方,在於純粹推銷一個「發達夢」,而不是推銷一件實在的產品。要成功sell 發達夢,首要條件是資訊封閉令其他不知情者中計,未有互聯網的時代就是MLM的黃金時期,現在太容易接觸相關資訊又有手機,要tum人接貨難度已大幅提升。

  6. 「我成功過,佢咁都成功,你一定得」:黑人首先不批判香薰人成功的真偽,姑且假設都是真的。問題係,別人行得到的路未必適合自己,以前很易賺錢的途徑可能再無錢賺。李嘉誠幾十年前靠穿膠花發達,再行佢條路,睇下變唔變到李嘉誠?變唔到,難道係因為穿膠花不夠努力?

    同樣,亮xx入面甚麼公爵候爵,或許大部份其貌不揚出身平常,但每人確實有某些看家本領,全部計算入微:例如前文提及的FAQ、身上的西裝、跟你見面時的熱情、讓你認同和羨慕的經歷 (如學歷、存摺、稅單等)、講場內令人放鬆的香薰味甚至近似NLP的心理操控技巧等,不是靠努力就學得到。

    交錢前你是整個團隊的明日之星,付錢加盟後就各自修行鬥搶單 (黑人跟西裝友反目後,另一位香薰人立刻問「得唔得閒出黎食飯」) 有少數的人會賺錢,大多數的人會付上很大代價並全盤失敗。一部份失敗者會主動發聲,但更大部份的人會視為不光彩經歷,絕口不提默默還債。

  7. 曾經有若干年輕網友來信,希望黑人教路幫人反洗腦,實在無能為力,抱歉。

  8. 黑人不加盟的理由如下,希望能讓大家參考:

    a.) 無改善生活:直銷工作令黑人的生活質素變差而非改善,欠下巨款每日都有壓力,想吃餐好的都要左計右計,但係又要在「客戶」面前扮有錢,點計都唔會開心,又要穿西裝 (所有朋友都知黑人最憎名牌打扮),每日無晒私人時間,跟外界脫節 (西裝友對上一次看電影是N年前...)

    b.) 越做越無競爭力:可能局部sales skill 會提升,但MLM近乎宗教催眠的推銷儀式放到其他行業並不適合。一個星期七日都在call 「朋友」,邊有時間學新野,如果長做又賺唔到錢,回到正行就好難重新適應

    c.) 良心過意不去:良心可以慢慢麻木,自問不想失去這樣東西

    d.) 一代單傳:MLM要求太多心理及談判技巧,並非如西裝友所講人人都可以做。向教育水平低的人埋手或能成功,但這批人缺乏同樣的技巧,教也未必識(醒目就不會中招吧?),要再搵下線是超難的,自然無法達到所謂的網絡效應

    e.) 要搵錢仲有好多其他辦法,讀得書少而成功的一樣大有人在。黑人上星期去銀行過數,隔離counter 有個乞衣打扮的阿婆,撞聾兼唔識字 ,要teller大聲讀出佢個投資組合:「3328: 4萬股, 005: 8萬股, 3988: 9千股, 002: 1萬股...」要賺錢有好多途徑,直銷係一個好大機會蝕快錢,換取一個小機會掙到中上收入的行業,不是人人都適合賺的

23 則留言:

sze 說...

哈哈~我覺得教會呢個藉口好吹水下喎!西裝友真係信?

黑人 說...

佢出來打滾咁耐,無可能信晒的
但係找不到位入我吹水就是了

Chris 說...

> 我地係向天負責,你唔退返d錢俾我,我真係好難做,你當我係朋友既,就退返d錢俾我啦

超級正!!!XD

Chris 說...

離開咗係好事,放心,好事會繼續嚟。

另外,你打嚟時唔好嗌我做老細la,個人其實唔係太受落~我係窮鬼嘅現實都係改變唔到云云..

猿人十號 說...

個人好想黑人分享下點解記到咁多o野...XD

Yun 說...

I still have hard time to believe that you actually "joined"!!

> 曾經有若干年輕網友來信,希望黑人教路幫人反洗腦,實在無能為力,抱歉。

與其學怎樣「反洗腦」﹐不如不要給機會別人洗你腦。有好奇心係好﹐但如果明知係個tum﹐就唔好踩落去囉。

唉﹐咁就唔見左幾千蚊﹐另加咁多精神同時間。好慘囉你!

不過你o個個神父既借口﹐好牽強姐。

又﹐我覺得你應該去消費委員會投訴佢地囉。

塞米一條揚陸轟炸機 說...

作為一個信主十年多的基督徒,有必要更正某些名字 :

基督教教會係無神父的,天主教才有。基督教的牧者通常是牧師。

所以,西裝友唔拆穿你,一來可能係佢未遇過黑人呢條咁妙(我都覺得,其實,好入戲下架喇,俾我都係差唔多講"我地係向天負責"之類。)既理由。二來可能係佢一聽就知你老吹,所以順道拖下時間諗定理由推果二千銀盤數。

不過話時話,蝕左果二千銀,買個咁既遊記,太貴喇。

黑人 說...

> 雲妹子

最初我心中仍然有1%的希望覺得佢不是tum
尤其西裝友的劇本跟以前遇過的sales 完全不同,所以真係想見識佢個葫蘆賣甚麼藥

第一次上到去知道原來一樣,objective就變左想了解成個scam 係點

神父係牽強架喇,佢係咁同我講理想一樣牽強
既然明知係咁,大家都係鬥bluff
只不過吹完水西裝友覺自己賺左少少$贏左
我覺得自己寫左幾篇文大踢爆又贏左
一種阿Q的雙贏 (笑)

> 塞米

我明你想講乜,但係當時開口用英文諗野先...第一個字諗到christianity而不是catholic ,一時間,譯返做中文就諗起基督教喇

呢一點我反而唔驚佢攻過黎喎

米都話唔搞咯 說...

>個人好想黑人分享下點解記到咁多o野...XD

你記憶力咁强,其實可以有好多秘技可以揾食...例如賭廿一點...

匿名 說...

你口中的劍擊西裝友係叫ken嗎?
真係好勁~記到咁多佢地所謂課堂ge野
仲有ar公司果邊話,5000蚊都有得90天內7折架
但一定要上線退,公司唔負責
因為果5000係上線收的
岩岩慘被中招的人上....

黑人 說...

> 米搞

rainman 入面既德斯汀荷夫曼?
我從來唔擅長賭博...連基本的鋤d 都學極唔識,21點...(係咪d 牌加埋唔爆煲再鬥大果隻呀?)

> 匿名

係呀,ken 候爵,我諗退唔返架喇
我再搵佢只係浪費時間,又再聽佢播錄音

我對佢黎講係一張人肉十幾萬大單
佢對我黎講只係三五百蚊,大家身價不同
我當初尋幽探秘目的已達,不用深究了

祝你追得返d錢,至少換返一兩支紅酒飲下都好丫,香薰真係無乜用

匿名 說...

唉....個賤人唔認收左我5萬
我又蠢..咩都信人...點解會蠢到咁
一開始又唔識問佢拎單拎據
到我話要退要單,佢就反面
我上左公司投訴佢,又係公司度即場報警
諗住告佢行騙都無用
其實佢分分鐘連會都無幫你入
佢D紅酒,飲完都唔知會唔會有事
不過既然你損失少,都費事晒時間係佢身上
唔值得!!!
真係好想打佢一鑊金AR!!!!!

黑人 說...

> 匿名

深表同情...
我最初純粹覺得佢頂籠係sales skill 勁嗟
宜家先至知原來連基本誠信都無,睇黎要上公上候十個有十個都係咁

又咁講,你報左警,之後警方點處理?
同埋公司又有無你的record呢?

Elvis 說...

如果好似匿名所講, 咁直頭係詐騙, 而唔係走法律 la

但我其實好想知, 如果你一上到去, 就錄定音, 將佢地所有 conversation 錄低會點。

匿名 說...

如果我當初咁醒識錄音就唔會被騙了同埋可以夠證據告佢...
間公司都有問題la,5月尾話我有入會,到我話退,6月1x日再check變左無入過會
去警局果時,我話懷疑被騙$,佢即刻問我係米dchl,即係大把人報過警la
佢叫我上公司即場報警睇下告唔告到佢詐騙,但都無用....個警察話警方都一直查緊,不過未夠料封間野
個賤人竟然同差人講,我同lee個女仔唔熟,佢只係上黎比過200蚊了解過,之後無聯絡..頂

黑人 說...

> 匿名

估唔到佢咁喎,咁佢存摺入面的十萬月薪,好可能有50%就是你張單喇

被騙了無辦法,唯有的起心肝儲返錢吧...
香港政府的恭務員團隊永遠慢幾拍才做野,SARS通關檢疫呢類生死存亡尚且如是,查封詐騙公司或者要等到阿爺出聲才後知後覺

> elvis

太多呢d 公然行騙的公司,無能為力呢
報紙傳媒只係講助理薪酬呢類雞毛蒜皮,或者將強姦案整成3D動畫(網上大把有得睇啦),真係害緊小百姓的就無人理

小弟發現呢幾篇文已經流傳開去甚至上左網典,希望幫到d人啦

Elvis 說...

我最近知道有單野, 仲易過晒你地呢d 。

有個人, 將全副身家借左比個朋友, 跟住對方失晒蹤。

世上賤人何其多呢.......

高妹 說...

>但我其實好想知, 如果你一上到去, 就錄定音, 將佢地所有 conversation 錄低會點
好似衣家私隠條例, 錄音前要預先知會對方, 唔係就唔承認架,我有朋友之前試過錄低左借錢俾朋友既對話,後來同對方反面,對方唔肯還錢,仲反咬佢,佢告上小額錢債, 但係佢律師同佢講, 佢無事先同對方講要錄音, 呢段錄音係唔成法律效用?!真係幾吹脹!

匿名 說...

想問下黑人有冇興趣試下挑戰 NLP 果 d 人力訓練公司,好似咩 lxfe dxnamics 之類?

好似話 d 說服力勁過 LB

匿名 說...

我有個朋友又係 LB
又係係咁話呢行有前途
但佢話佢果間唔係 皇室堡 又唔係sogo
係利舞臺 LV 果邊~
請問樓主知唔知果間唔係呃人居多既呢??
因為我個 FRIEND 講到呃人既剩係得
皇室堡同SOGO
佢果邊搵好多錢咁= =

黑人 說...

> 匿名

無論邊間LB都好,根本就賺唔到錢的
我有個朋友都在LB 做,宜家轉返出來做文員了

佢未轉行之前,一樣講到自己搵好多錢
又話其他組厄人,佢果組先至係正當做生意

事實擺在眼前,真係搵咁多錢,就不用出來做返文員仔,尤其我個朋友不怕壓力屋企又等佢養

真係有錢搵,佢會搵到夠全家人駛先至唔做
所以千祈咪上當

Bomb Dance 說...

先感謝作者把自己上亮碧思的經歷寫成教育娛樂並重的文章。

另外,本人覺得直銷迷魂記系列文章真的很值得參考,因此本人於網誌中設下連結連至貴網誌。

http://www.onebun.net/blog/?p=2201

匿名 說...

我有個朋友仲约我周二過铜锣湾LB乜陳列室睇嘢兼倾計!!