七月四日十五點

1. 個市大跌，之前係咁話入中壽，身邊好多朋友都話好彩無跟黑人入市，其實宜家入市的錢我真係作五至十年的打算，正如東尼所講，一時的升跌十年後只是零錢，又如標基所講，我們高估一兩年後的變化，卻經常低估十年後的轉變。到時39歲，是食老本的年紀，我相信(自己)今年應該儘可能大手入市，能睇準低位固然好，睇不準都無問題，長線而言整年都是低位。傻子網有篇文說 this year is a fantastic year for value investors. 頗認同，亦有人講過，死過返生的人有較大機會從市場獲巨利，連死都唔驚，克服恐懼的能力自然比一般人好。

當然都會有朋友問：十年？你下年都搞唔掂啦！fine...you have a point.

2. 美市崩壞の序章，剝緊花生等睇戲，如果真的發生當然又有平貨掃，唔發生都會照入市。

3. 看完Hulk，又諗起Marvel Entertainment (MVL)，幾年前買落升幅是600%，復仇者小隊的前景好嗎？黑人唔熟美國漫畫的玩具精品市場，真係唔知。Stan Lee 伯伯一旦過身會否對公司有破壞性的影響呢？例如史提芬。工作先生駕崩，蘋果應該會插水一段長時間，因為大部份都靠佢的魅力撐住。

4. 在七仔看報紙標題，向政府抽水最大力的居然係太陽及東方，乜7都問責，好似全世界的官員都瀆職，人人都要推出午門斬首。唱衰香港個concept 本身已經有問題，就算成立，最落力的不是甚麼反對派或反對派報章，而係暖暖眛眛右邊jj無屋住民粹高漲的傳媒喎！

5. 雖然不看蘋果，每日都會翻翻頭板，偶爾見到朋友的名字知道佢仲未死得，稍稍安心。朋友，你做頭版記者好了，不要變成頭版新聞呀！

6. 殺神特工的編劇該殺。

7. 殺神特工應改稱為殺神美工，art direction 一流。

8. 為了安排父vs子的情節，夾硬改到個老豆白白痴痴，做了好多常人不會做的傻事。故事中四個勢力的互動其實有好多發揮的地方，背景設定完善，拍多一兩集都仲得。捉到鹿懶脫角，可惜。

9. 幾位老死飯局吹水時想到十一月遊日本。日本自由行大計講了差不多10年，其實今年去唔到都算啦...

10. 耳濡目染是真的，香港是個不開心的城市。報紙每天儘量令我們憤怒，廣告及各種刊物都是行貨 (黑人不能免罪)，香港甚麼都要快快快，由快生急，急不離燥，燥底的人脾氣不會好得去邊。香港人見到昆蟲要打死，日本人愛獨角仙，因為前者活在一個消毒高級帝皇板間傳奇豪庭，後者跟大自然有接觸的機會。

11. 最近有case要跟神父合作，極之敬佩這種捨身為人的工作。感覺就有如跟一個純樸的農夫談論他最自豪的菜田一樣，但他栽培的是年輕人。

12. 神父是外國人，全程英文，爽。好久沒操練了。

13. 路經某田雞粥老店，記起以前一個故事：黑人約一班老外吃炒田雞，老外吃得津津有味問這是甚麼肉？答曰 Field chicken。老外大啖幾口，見黑人笑容詭異，再問這是field chicken 的甚麼部份，為何不似雞？黑人為了顧全大局，建議老外覺得好吃就不要問那麼多。最終洋鬼子們敗在好奇心下，捧腹扣喉，慘不堪言。

14. 每天都要跟客戶的programming dept 角力，煩。每日寫schedule 溝通的時間比真正做事的時間還多。Programmer 想件事正正方方易於自動化，designer 想天馬行空不要沉悶，先天八字相沖，無計。不過designer 比較容易受靶，programmer 唔識砌你個layout 係你錯，個design改十幾轉搞到脫期固然係designer錯，急就章交行貨，沉悶，唔靚，錯。

15. 所謂positive thinking 就是努力想辦法解決，不想做有十萬個理由，否則只會全力想如何做好它。