每人心中都有一位徐步高

今天六點幾左右碰上地鐵爆胎，所有中環站港島線服務停頓。見到電車的人肉堆，還是衝上山搶的士算數。

一路朝藝穗會的斜路走，已見到一兩個人開始搶截的士，小弟有幸在雙黃線區截到一部。

甫上車，司機連連笑說我十分幸運，因為他剛在電台聽到地鐵癱瘓的消息，差點就想截旗不載。

原來的士司機經常拒載，因為有些地方接的旗，做完隨時倒蝕，例如藝穗會斜路(雲咸道)至皇后大道中一帶，在那兒接到的客，多半是上半山的，承惠二十大洋，但回程通常沒客，前後一小時，扣除車租油錢，分分鐘倒蝕十多元，而5-8 pm，正是司機大佬的抓金時段，所以有經驗的司機，會儘量迴避這類無肉食的車客。

我常常以為的士司機截得一單多一單，多勞多得，今天上了一課。

東拉西扯，司機很自然講到自己有幾慘，例如付三千大洋整廁所都要思前想後，地板破爛翻起就用膠紙頂住等等，一般穩定的打工仔未必明白的。又很自然的，下一步就會講到香港富商為富不仁，他講李嘉誠點衰，我就講李澤楷點樣蒸發好多人(包括我老豆)的退休金，犧牲一間公司的長遠根基，賺短期快錢落自己袋。

突然司機大佬爆左一句：「商家賺錢都無可厚非，但搾到咁盡，放條生路黎行下都唔得，鬧人厄綜援講削錢就大大聲，一家四口領綜援，分分鐘仲搵得多過我呀！大佬，多數人唔係行到呢一步，都唔想靠綜援架！轉過頭，西九就益晒d 地產商，d 地產商賣縮水樓政府又唔出聲，你又唔怪得有徐步高呢d人出現。」

「個社會搞成咁，其實個個人都有d 似徐步高咁有反社會傾向架！你睇徐步高target 既d 人，好多都係埋沒良心既走狗，明明自己發左達，仲要官商勾結壓榨香港人，徐步高就係想做蝙蝠俠。不過蝙蝠俠就唔應該打差人啦！話晒我以前都係當差的，你打d 兄弟無辜既，要打就打烏維鄘董建華果類蛋散，你睇下遲早又有多幾個徐步高出黎。」

我不期然望一望身後的中環，一堆高光害建築群中，唔知第時會唔會有人裝棧batman 射燈呢？先唔計batman 睇唔睇得到個signal，中環咁多光污染，batman班蝙蝠應該飛唔到入來咯。