星期四, 4月 28, 2011

宜家d年輕人無希望...

這是報業大亨黎智英的direct quote。

我已不能算作年輕人了,只是見到抽水年輕人的標籤文字,總有股無名火。

早前,蘋果有篇報導讚揚幾個靠地產炒買發跡的年輕人,知名博客尹思哲予以轉載,並且訓斥「八十後」應該怎樣怎樣,我看不過眼回應說就是這種標籤害死年輕人,他在留言回應說:年輕人心理質素好,不用擔心別人怎樣想。

這是屁話,我心理質素好,但是in我的HR和老闆們心理質素沒保証呀!多得黎老闆(以及一眾瀆職傳媒)長年累月抽水,八十後已成了一個負面標籤,深深烙在市民心裡。

「八十後」掏出一部iPhone、遲到五分鐘、早退五分鐘、工作上有甚麼閃失,托賴多年來的煽色腥,全部都被放大了N倍,玩iPhone就是自閉不擅溝通,遲到早退無交帶是一定了,不看時事,是政治冷感,參加社運,是搞搞震,最好是看完報紙媽兩聲,然後乖乖工作,但這也不行,這是「活在上一代設立的遊戲規則,應該反抗」,無論他們向左走向右走,都是錯撚晒。

舉個簡單例子,公司請了個「八十後」,返了兩日工no show,你會說現在的八十後真係差劣,難怪碩士生200次見工也不成,年輕人應該珍惜機會呀etc etc

可是在飲食業,好多洗碗、樓面的工作,聘請的阿嬸大叔們(當中不少是新移民),經常返三兩日就no show,電話也不給一個,為甚麼不標籤5,60後是地底泥呢?大把做了十多年的6,70後老鬼,一樣卸膊無交帶,報紙不報導,不代表沒發生,只是不夠煽情而已

我不是要求傳媒又label 這群人才算公平,事實上一個「八十後」label已坑害了不少年輕人,再來一個嫌死不夠多人?

其實黎老闆要鼓勵年輕人很簡單,收口就行了,客氣而直接點說:柒少陣當幫忙丫,唔該。

年紀越大經驗越多,「一蟹不如一蟹論」是很誘人的,無論是出於好心、私心抑或黑心亦然。大家愛拾甘迺迪的牙慧,高呼「不要問國家可為你做甚麼」,我想回應,「不是問年輕人應該做甚麼,先撫心自問你遺下怎樣的世界給年輕人」

試想全世界都在透支子孫的福祉,都在指望下一代清還自己碌的卡數,你還好意思講「不要問國家為你做甚麼」?(看美國的國債、歐洲的福利制度、香港的地產金融經濟生態等等就是了)

JFK的名句,本是用來鼓舞人心,激勵大家振奮向前。可是香港太多福佳杏加橙,偷換語境,為自己的不負責任開脫,令這句本來是金石良言的演辭,變成「獅子山精神」一樣的非物質有毒文明。

12 則留言:

說...

讚。

上一代已經「碌爆左卡」係一個事實

所以我諗極都諗唔到呢一代(唔係我呢一代,我都仲可以有少少甜頭...)仲可以做啲咩;個大環境根本就係時不與我。

或者係我悲觀掛!?

篤篤篤撐 說...

80後有好多唔同人, e+傳媒壟斷在一班50/60後, 自然咬死80後, 一如我們的長輩當年鬧我地冇x用一樣~~

Baoyu 說...

嘩~師傅~好少見你咁好火播~

其實每度地方,每個年齡階層都有好人有壞人,好人多定壞人多冇統計,非常主觀,視乎你將個焦點放0係邊度啦

John 說...

Bravo!

ken.yong 說...

我同意班人咁樣講啲八十後實在唔公道。

無錯,上一代已經定下咗規矩。但要勝過呢班所謂上咗岸嘅人亦非無可能,睇谷歌、面書就知道。

我亦唔相信香港嘅年輕人無上一代咁叻,但係要創造谷歌、面書等機構,需要嘅唔只係才能,仲有環境同文化,同埋香港父母們、教育機構點樣培養子女。如果教育制度只係留意個A,父母們做每一樣嘢只係以穩陣行先,都幾難會出到谷歌面書。

上一代唔記得咗,種什麼得什麼呀!

黑人 說...

> 米

都係果句,柒少陣當幫忙啦。
在前線挨緊槍彈那班年輕人,自己知自己事
大家都在拼命為生活周謀
大環境是內地熱錢要找出口,外圍熱錢要搵窿入,香港夾在中間,不是甚麼創意呀、膽色呀可以彌補得到

偶然有人掌握浪頭賺大錢,是少數,不值得用來做例子。九把刀都講過,他自己以及朱學恆的成功,是異數,多數年輕人走他們的路是會死的。

> 篤

假如一代不如一代,咁直立智人、北京原人一定是地上最強啦,快d去請佢地

> Baoyu

因為我年輕時,就遇過好幾個滿口道理,但實質是厄9人的前輩。

> John
thx!

> ken wong

你講的大環境是另一個很闊的議題了
環境和文化,香港實在沒太多客觀條件做得到
香港是炒人民幣未流通前最後一層虛火
跟97前其實沒變過

Hoito 說...

嗰班老油條,真係想見一個殺一個。每次喺餐廳度見到班老屎佛,對班後生待應呼呼喝喝,真係想同佢講,人哋都有老豆老母架。
君子報仇,十年未晚。他朝呢班後生真係上到最高位,睇怕會取消生果金同所有老人福利。就好似當年既曾蔭權搞生果金資產審查咁,佢好明顯係以前俾老油條蝦得多。

Anduril 說...

Haha..非常同意。先旨聲明,我自己是七十後,伸報利益在先... 個人認為,每個年齡組別也有蠢人柒人不思進取者,年輕人經驗少,容易中招踫壁,好正常。成日故意踐踏年輕人的所謂前輩,我認為只係一班想昆人幫他們打免費工的仆街啫。........ 再者,現今好多所謂有成就的上一輩,都係日日食老本,明顯係六、七十年代時勢造英雄,你叫個d依家仲未發達個d五、六十後,又係冇得發圍等被淘汰?........哈哈,仲未多謝黑人兄你咁欣賞我個blog.得閒黎坐。

黑人 說...

> Hoito

本著敬老的心情,早已對指指點點的老前輩有多少體諒,我遲早都會有一天,思考力退化到無法理解年輕一代的想法。只不過霸著媒體,透過指責年輕人來精神自瀆,那就太過份,唔屌對唔住自己

> Anduril

咱們是同一輩出廠的,看過女皇的blog公私兩全
就算我們上一兩輩也不是很多人做到
所以我才佩服啦

匿名 說...

我好老土,我覺得攪傳媒嘅,唔應該咁負面地一竹篙打一船人,當你日日都同仔女講:「妳生得好醜樣呀!妳唔死無用㗎喇!」佢地遲早都會自殘一鑊滿足你嘅批評。
呢類型社會問題,並非只得香港有,但日韓美加澳紐,唔會咁樣負面化劣吠自己嘅下一代!而係建議政府做好鷹架結構,搞好經濟民生,叫年青人積極點自愛點,為將來起飛。

黑人 說...

>匿名

對啊!我從來認為leadership是鼓舞大家向更佳的方向出發

現在批評年輕人的文字太多了,所謂鼓勵,也只是搬出一些特例(例如三個發達的地產仔女),有時成功不須驚天地泣鬼神,可以實在些少介紹看甚麼書、怎樣用科技如RSS吸收更多新資訊、如何改善健康等等

這些東西放在報紙確實不夠sensational,但這才有用

仰子 說...

講得太好!我都試過反抗,結果衰左,而家霉緊。惟有等機會再黎,不過我同同年的人一樣,俾老母、女友迫婚、迫生仔。我X,邊有錢呀!