星期一, 9月 08, 2008

算係交到貨

報紙話泛民失利講到好似慘敗咁

但係睇返wiki 當選名單,泛民成績算唔差喎,尤其港島甘乃威無乃撻,余若薇又無事,何秀蘭一吐烏氣當選,初熟女第一陣就擔正當選,6席佔4席,掂晒,唔係諗住射埋大細眼同藐嘴落馬呀?難d喎。

唯一比較失望係陶君行又落選,不過睇佢果區的對手全部大將級人馬,無計。小弟不黯會計人思路,方卓如跑尾二又真係幾慘,下屆唔知仲有無心機玩呢?

其他地區泛民都算交到卷,反而落場直選的老闆黨全數被叮走。

另外民建聯終於有個比較順眼的人物,若干年前見到李慧琼選區議員都覺得佢有得發圍,今次入立會,遲下佢應該會接棒做菜菜子二世。睇返佢d歷史,原來25歲已經做過區議員,25歲果陣黑人做緊乜呢?

成日覺得論壇多餘,純粹係screen走比較騎呢既候選人。至於競選宣傳品亦都無乜參考價值,好多候選人都有做過野,即使係第一次參選都可以話自己參加過饑饉30,問題係無法知道所謂「政績」含金量如何。

政黨如果有資源時間,真係應該搞下政策研究,因為單靠互插抹黑唔玩得幾多屆。黑人估計新一批主力選民會希望見到比較簡單易明又實在的東西,以黑人自己及身邊較年長的朋輩參考,估計唔少3x歲或以下的選民其實唔多留意香港政情,頂籠以「親建制=衰人」作黑白二分。

跟少量網民傾談過,好些不喜歡「搞事」和「為鬧而鬧」的政黨,相反另一邊親泛民的年輕選民就討厭舉手機器橡皮圖章,但係無論建制還是非建制派,背後到底有甚麼政策主張、有甚麼議題就不甚了了。到底候選人相信甚麼,完全不知道,個個都係為基層發聲,發咩聲呢?發完又點呢?感覺就好似封面華麗但內頁馬虎的同人誌漫畫,每年擺完comic world 散左貨就算數。

希望下一屆選舉邊個係人邊個係鬼,可以靠事實客觀判斷啦。

1 則留言:

米都話唔搞咯 說...

我今朝聽到新聞都覺得有啲意外,飯文既成績都唔太差,反而老闆黨就輸得都幾慘烈...而就如你所講,我同身邊既朋友講開,都有乜邊個真係有留意啲候選人既政綱,多數都共係靠印像投;但以香港人既精明,我又覺得大家咁做既原因係「慳時間」,因為明白到無論立會議員政綱寫到天花龍鳯都好,始終都係要到入左立會,見佢地點投票先係見真章...

另外,老闆黨大敗,未嘗不是好事,因為他們其實在真正管治香港的權力核心範圍(即西環以及政府高層──而呢個亦係商界一直不是太熱衷選舉遊戲的原因)已有很大影响力,在議會中將他們的影响減少,有助平衡社會(雖然我成日都覺得其實立法會做唔到啲咩)。

响呢次選舉中,我反而更關心自己工能界別既選情;而結果係有啲出乎我意料既,因為我一向都以為測量師人多勢眾,理應會嬴(上一屆輸掉,很多人都說是因為有三位測量界候選人,所以分薄了票源),怎知卻由建築師劉秀城連任...老實說,我對劉秀城是有一點保留的,皆因他上一次就皇后碼頭的表現實在令人失望;不過他倒是真的與各方都是有良好的關係與人脈的。唯有期望他真能平衡各方意見,不致只向政府及商家傾斜吧。