近況兩則

週末跟失眠作戰中，日頭逼自己唔準訓，夜晚唔到十一點都唔準上床。

好自然，日頭一定烏烏下，又好彩工作都係比較機械性唔多駛用腦，初步叫做有小成，終於訓到三兩晚，不過都係唔夠5粒鐘就醒。

過埋呢個星期，要搵一兩日睇中醫調理下，有出無入，做幾多運動都無用，甚至越做越短命。

***********

某次在機舖留連，居然撞返Peter仔。一如所料，佢俾大小傳媒stylist image consultant抽完水之後，無幾耐就打回原形，新一期剪左個椰青頭，食指指甲瘀左一片紫色，牛記笠記，成身有陣裝修佬/地盤佬獨有的灰塵。

Peter個case，一如現在的股市：基本因素唔變，你班契弟炒到佢幾high都好，最終必定跌返落黎。

問佢傳媒採訪大小事，則笑而不答。

當晚可能桃花旺，同場打高達有兩個美女機師，其中一個樣子甜美嗲姣兼有之，五呎八，平底涼鞋，嬌嚶連連，刀法狠狠：「耶，佢地蝦我呦！」(同時在空中施出兩段格鬥，斬到人地無左6成血先準人訓低)，黑人望得太入神，隔一排先至發覺佢地身邊條仔回敬的眼神，更凶狠。

***********

(呢篇野四點幾post，即係點呢？半夜醒左訓唔返囉！請呀~)