實戰

友人說有新job需要面談，相約晚間飯局，可是她因為schedule conflict，將傾job和慶祝生日勉強安插在一起。

在銅鑼灣El Cid吃飯，見到鄰桌左右衣著打扮如嘉亨灣樓盤廣告中的型男索女，開紅酒呷口凍湯再來點goat cheese 頭盤。同桌三位女生一身名牌，捧著menu有講有笑，心中大呼不妙。

誤墜求職陷阱，脫身無門，唯有慷慨就義。

同桌兩位女生看樣子均屬「硬淨」格，在大公司當中層，黑人甚少跟這類人應酬，相信她們也很少面對電車男，所以初時她們三人談工作和圍內私事，不太理會黑人的存在。

假如在其他場合，大概會以四個字總結：「屌！死港女！」草草吃完拂袖而去。

這樣做，實在對不起快將大舉陣亡的鈔票。

唯有想辦法鑽位，例如三女談到某間fine dining餐廳時，忙不迭插口：「哦！是不是諾士佛台那間？」(其實我除了知道名字就不知其餘)

女生A:「前排去agnes b xxxx 食 tea，好開心丫，d cake 好正丫！」

黑：「哦？咁你有無去agnes b藝廊果個徐克25週年展覽呀？」(其實我都未去過，只是看了點圖片)

女生B:「妖，好想換電話，又唔多想轉iphone喎，好out咁。」

黑：「不如考慮下國貨啦，唔買iphone，有iOrgane，國產零零漆鬚刨手機同埋N()KIA N97i...」(又其實，我最憎留意奢侈品資訊，人窮，憎人富貴。)

搭訕幾句後，女生們開始接受黑人的存在，可是接受也不等於跟你傾計。

為免再度被冷落，唯有找些話題。

黑：「咦？你地估食到幾點呢？」

女A：「咩事？你要早走咩？」

黑：「約左fd 練跑(事實)，唔想太遲同埋太飽。」

女B：「哦？跑咩呀？馬拉松？」

黑：「(得米)係呀，10k囉。」

女生A原來是運動健將，話閘子一開，X game(eg.笨豬跳)...contact sports(eg.格鬥)源源不絕一湧而上。其餘兩個女生接不上嘴，開始switch回名牌，再講名牌黑人又要坐冷板凳，機不可失，唯有補鑊：「其實呢，我都只係練左一年半左右，做運動既動機呢...嘿嘿嘿。」

女A：「嘖，為左識女仔丫嘛，去California啦，入面既女仔索d。」

黑：「其實係想持久力好d咁囉。」(頂，除非出$叫KFC，否則呢一年的性伴侶應該是右手)

眾女爆笑，於是飯局的其餘環節就變成Sex and the City(一集都未睇過)。

黑：「唔好咩？體能好d，爆房都開心d啦，你知唔知好多女仔原來都無高潮？男伴體能差是一個死穴，女仔體弱都會影響高潮架(隨口9 up的)」

黑人估計眾女公務繁忙，放工肯定拿拿林走去消費享受人生，肯定不會再呆在電腦前面 (所以話題不斷講時裝、美容產品和fine dining餐廳)

既然如此，一週內的youtube無聊短片她們九成未看過。

黑：「有無聽過最近有幾個鬼佬搞左個project，搵左世界各地不同的黑人合唱Stand by me。佢地唔係一齊唱，係透過混音整到好似大合唱咁，好感動架！」

黑：「呢，有個爵士樂手，將麥凱恩佩林既講話，按照佢地既抑揚頓挫key返d 配音落去，整到好似唱緊歌咁，好厲害的。」

好彩，節目時間到，不用將Susan Boyle, David Cook同埋Paul Potts都搬出來講。

******

之前寫了好幾篇關於電車男社交的理論，上面就是實戰情況了。

真正的把妹達人不會隨便將心得分享，而黑人的心得也絕對不是甚麼把妹秘笈，只是如何在社交場合比較正常地過關而已，或者正確點說，是「如何令電車男不太討人厭」比較貼切。

******

寫這麼多，本來是約了跑友早操，跑友們約了周公全數失拖，唯有自己上，請呀！

又，俾我揀，我寧願揀跑步，唔需要扮野，喘晒氣就黎死都唔需要扮無事，就係咁。