星期三, 1月 06, 2010

世代問題

假如某幾個人的人生失敗,是他們自身責任。
假如一整個世代的人失敗,是大家的責任。成日叫八十後檢討的人,得閒唔該照照鏡。

******

同理,雜誌採訪d乜乜柒柒成功人士,一兩個,係佢地好彩。整個行業普遍做好,才是真正有得撈。周不時就會見到報紙求職版訪問邊個3D artist, 某某designer,然後穿鑿附會講到某行業好掂。將兩個標題拼埋睇會幾有趣:「3D創意前途好,意馬解僱二百人」。

吹水昆人入局的,又何止財經演員?

******

近來有數個blog都在批評80後無料到、搞屎棍、阻人發達(下刪二三十字),然後透過這些批評,暗示自己因為努力上進,成功上位。

例如cityscape這篇,或者魔術師呢篇。

兩位博客才學雙茂,讀其文字可推斷早已廁身上流中產之列,固然是要佩服的。

可是請兩位撫心自問,你們現在的職業,行頭是闊是窄?你們的才學技能,在現今社會是否普遍呢?你們今日的成功,香港有多少人可以做得到?

一個generation不會無緣無故地失敗,有得揀,無乜人鍾意遊行上街抗爭。日本人的lost decade都有一群上岸者隔岸指點,說年輕人不濟所以大量失業,近幾年才發現自己的體制出事。

找代罪羔羊易,怪上一代,怪下一輩,找出系統上的缺陷難。

******

好些前輩蔑笑八十後不敢造反,其實造反比想像中容易。例如,某個不知死的年輕人決定遊行當日,當個調酒師,掟返兩支 molotov cocktail,警方射催淚彈清場,然後在網上以言入罪,拉facebook group、拉blogger「協助調查」。

只要基本經濟環境沒變好,之後就會出現更激烈、更地下的抗爭破壞行動。警方和抗爭人士都有著這種笨人,只消雙方的笨人踏出第一步,破壞潛規則,事情就很難再回頭了。

******

最近讀「中東現場」,巴勒斯坦人的石頭革命也是源於小孩向以色列軍佬掟石頭,石頭如何演變成今日的人肉炸彈?當初無人估得到。

人肉炸彈其實是以色列人逼出來的,因為以軍持續有系統地扼殺巴人的基本生活條件,沒有生存支點,巴人無論多努力,生和死也是相差無幾,正是nothing to lose。

以色列為何如此強硬?粗略地說,在美國支持下,以國想成為中東第一強國(現時是全球第四大軍事強國)。佔領巴人的資源國土是擴充必然的一步,甚至有以國學者明言巴勒斯坦是以色列擴張的第一個犧牲者。

美國為何要支持以色列呢?因為以色列是中東境內唯一非伊斯蘭國家,只有以色列在中東成為龍頭一哥,美國才能確保自己在區內的資源(石油)利益。再講,美國佬的飛彈火箭都需要買家。

換言之,巴勒斯坦人所以生不如死,是因為美國人需要維持自己的American Dream。以色列人屠殺巴人難民,是和平行動,巴人絕地還擊,是恐怖活動。以色列人先出手逼害巴人,國際傳媒就像香港警察一樣,別過頭望向另一邊。可是巴人炸彈襲擊幾乎必定會出現在國際頭條。

******

深層次矛盾有好些解決方法,改善經濟民生,就有如叫以色列放手讓巴人立國,涉及太多團體的既得利益,非常難。

坦克車和AK47比較容易,反正殺一批,捉一批,二十年後又會有另一群年輕人說那是當年學生屠殺差人,差人被逼自保。

28 則留言:

浪子m: 說...

一萬個同意, 尤其對應blogger那段, 上個月睇魔術師睇到唔順眼, 心內彈左句 "妖, 又黎" 跟住unsubscribe。

Kenka 說...

浪子m,我不會unsubscribe,沒有這些意見我都沒動力寫blog。

匿名 說...

「二十年後又會有另一群年輕人說那是當年學生屠殺差人,差人被逼自保。」

宜家搵食艱難,可能唔使二十年咁耐就有人咁講喇!向西環投誠好上位~


-小星

Olivia 說...

魔術師的立場令人無法理解。瀏覽此人幾篇entries,一方面好鄙視「柒頭」年青人的抗爭;另一方面承認權力的蠻不講理。佢想點呢?

為甚麼仍然有人迷信勤力就是上位的原因,忽略一人得道,背後其實犧牲淘汰許多人。這些「失敗者」不一定都比人蠢比人懶。譬如讀書,並非個個有幸遇上使自己開竅的良師。

作為現存制度下的既得利益者,拒絕承認自身的幸運,反指其他人是咎由自取,抵死,真是狂妄自大得令人反感。

Kenka 說...

Olivia,一詞曰:老屎忽,足矣。

黑人 說...

當我地有返咁上下年紀,有某個金額的錢
可能心態都會同果兩位blogger差不多

文藝少少咁講
當我們身心都失去青春時,大概會如此。

John 說...

其實我以外人身份睇,一d都唔覺第四代(或80後)人失敗,身為第三代水尾的(但再係香港)人,我覺得80後是一種社會醒覺,是一個新的開始.

篤篤篤撐 說...

其實用80後去理解, 並不有助我呢種老鬼去了解他們, 我信, 每個人都有自己獨立不同的想法和原因。

如果要generalized 呢班人係80後, 那就要搵佢地可以generalized既common background。 e+有d反80後既人一方面generalized佢地係80後, 一方面又把問題individulized成佢地個人既失敗, 從方法論來看, 是illogical。

我基本上同意黑人既睇法, 但對中東問題就有不同意見,因為o甘講係過於強調現實利益的因素而忽略歷史淵源, 不過唔好拗呢個問題, 免得defocusing

C.M. 說...

我同篤撐有類似睇法。

淨係呢個80後既問題,真係唔想多講,原因唔係怕點起火頭燒親自己,而係怕失卻焦點。

(抄自save起的draft post)好簡單咁講,「世代話題」我分三類:研究、評論、娛樂。

唔會否認年輕人會感覺香港少左機會,少左流動力,但呢個真切體會並不能解決問題。係,寄望政府可以,批評過失也可以,但要解決問題,必須要冷靜做好研究。

不過研究好多時就比人做左評論。

老實講,我唔鍾意果本書《四代香港人》,亦一早就唔鍾意。原因係,我唔鍾意「製造標籤」。我唔係怪呂大樂,佢做研究既就一定分門別類先可以比人明白個大圖畫係點,然後對症下藥。

但係,若果出左書,人既睇法就會改變,認為係「評論」多過研究。好勒,現眼報喇。對號入座者比目皆是,攞住標籤黎品評又多不勝數。

趁如今抵制和諧,一切標籤就施盡渾身解數。

真正做研究既,就算得出一條血路比某某某殺出去,最終將被視作「評論」看待。

問題又回到起點。

嘿。

*********

唔係point to 任何人講呢番說話,我想話做人老豆做小職員你估真係體會唔到黑人同班社運年輕一輩既感受咩。

個個老餅都試過做後生,我肯定個個老餅都體會到,不過都係果句,假如呢一代,就算一整代係失敗,用番同樣既定義,老餅如我果一代都一樣係失敗。老餅果代無得上網,咩叫創意,咩叫globalization,真係木宰羊。果代得廠廠廠,好彩既買到樓供完,八九移民潮,立立亂兼人心惶惶。但查實,同呢代對比,只係蘋果同橙對比。

唔認真坐低,搵問題,「找出系統上的缺陷」也好,認真自我檢討也好,付諸實行對抗建制也好...自亂陣腳,下策也。

passinby 說...

肉緊高呼"成功必屬僥倖"的,通常都是失敗者,這現象真有趣

原來成功的人不多,就代表成功者沒甚麼過人之處,這邏輯比cityscape的奇文更耐人尋味

黑人 說...

> john

希望真係覺醒,因為亦都有不少80後係瘟瘟登登好似剛剛飲完孟婆湯

> 篤撐

你的方法論角度幾好,我都無咁樣想過
中東問題,我都未睇完本書,我亦都無提入面的歷史問題,正如你所講,為免扯得太遠。

> CM

我又咁睇,有時望到d後生designer 十下十下無交帶,好自然會覺得一代不如一代,鐘擺的另一極端,就係過份地同情年輕人

年紀越大,係越難分d後生仔到底只係後生還是堅唔掂

> passinby

查實唔多明你講乜,照估你係串緊人?

我講的成功和失敗,係整體而言

舉個例子,香港有一個大導演吳宇森,係佢叻,但只屬於佢個人的成功
吳宇森之後,香港已再無同樣的人才接棒,港產電影業整體上就是失敗了

荷里活有千百個吳宇森,代代人材輩出,而且可以吸納全世界的吳宇森為己用,咁樣先至係整體上的成功

篤篤篤撐 說...

今日睇now新聞清談節目, 先知道搞反高鐵苦行的叫"80後反高鐵xxx"(唔係叫80後), 呢班人同遊行果班又係唔同人(唔排除中間有d人一腳踏兩船),
所以話, "80後"既叫法, 好容易side track。

btw, 講起呂大樂本書, 我一早講左係一個分析hk既重要framework, 只係估唔到o甘快影響o甘大。呢本書, 亦突出左social science既一個限制: 理論的出現是可以改變被觀察對象的進程, 唔會有純理論的情況出現

魔術師 說...

黑人:

多謝指教,我嗰邊亦有回應。

Olivia:

先打個比喻。在職場上,有些擦鞋仔專做Yes Man,上司講乜都係啱嘅,就算明知會揩鑊,都一定鼎力支持老細的決定,永遠不會說不。萬一真係出咗事,擦鞋仔自然卸責。俾着看官各位,你會好似擦鞋仔咁做,老細要你點就點;抑或會本着良心話老細啲嘢有問題?你怕唔怕花紅分少份,寫差你評核,等你無得升?轉工?唔通第二間公司又會「公平」啲?

多數的情況是,假如你係等錢開飯,你多數都會揸頸就命,就算唔做擦鞋仔,都會順老細意,佢話點就點。但係魔術師唔會咁做,一定唔會出賣自己良心,有碗話碗,有碟話碟。為咗唔怕出糧比擦鞋仔少咁截,唔想為五斗米折腰,所以就要識投資,做到財務自由,咁就唔使昧著良心猛咁讚老細好了。

還不明白?看看魔術師兩枝金筆的故事就知分曉。

所以,魔術師不反對青年人抗爭,但反對「柒頭」青年抗爭。「柒頭」者,未well prepared也。

至於「作為現存制度下的既得利益者,拒絕承認自身的幸運,反指其他人是咎由自取,抵死,真是狂妄自大得令人反感。」魔術師不敢苟同。所謂「一命二運三風水,四積陰德五讀書」,呢句話唔係導人迷信,而係話並唔係可以有咁多嘢可以靠自己的努力去改變自己的人生,但努力卻並非不重要,因為人生在世,就只有努力,才可以對得住自己。而在人生中,努力帶來的成果,跟「運」帶來的成果,是分拆不開的,所謂「拒絕承認自身的幸運」,未免有點強詞奪理了。沒有良師,就要靠自己,而且圖書館有咁多書,總有一兩本睇得明吧。

二世祖有個有錢老豆並唔係唔公平;你有手有腳,有些人卻天生有遺傳病,這也不是不公平;只是每人的人生起跑線不同而已。人生也不是真正的運動比賽,無需要跟人比較。既然無需要比較,則更不需要計較「公平」與否?你說魔術師生在70年代是「幸運」,抑或是入到跨國公司是「幸運」,所以批評後輩就是不公平?但有可能做到「公平」嗎?每人的人生都不同,硬要在「公平」的情況下才可以作比較,做批評,是無理和可笑的。

而魔術師自己,考得入跨國公司,起碼都要自己努力讀書,在「比較公平」的考試制度下考得入大學,入職面試時又要sell到自己,又捱得過前老細們多年的無理要求,才可以在此指指點點吧。

passinby 說...

如果唔明我講乜,可以用腦,可以虛心去問,唔駛次次都即刻串番人

你講嘅本來係"啲乜乜柒柒成功人士成功係佢地好彩",現在又改口話"吳宇森成功係因為佢叻",似乎你連自己想講乜都唔知

不如咁問,你是否相信香港存在很多"懷才不遇"的例子?又,你覺得自己算成功嗎?如果不算,那你覺得自己有才華嗎?你覺得自己算是"懷才不遇"嗎?

全部YES/NO QUESTION,非常簡單,唔敢答可以講好多嘢扮答咗亦無妨,不過過唔過得人唔重要,最重要係過得自己.成日酸溜溜話人地成功不過係好彩,實在好核突,而且好唔尊重人,不過同你講品格都係對牛彈琴

到底做FREELANCER係因為想自由啲定還是根本冇人賞識你,你又有冇嘢值得人賞識,你自己反省.再唔長大,就注定做一世FREELOSER,自己唸唸

黑人 說...

> 篤撐

八十後的稱呼,擺明係有些人想你sidetrack,將抗爭人士代表的階層縮窄
奈何不用呢個字又溝通唔到

> 魔術師

感謝回應,如時間許可會另文覆

> passinby

我寫這篇blog時完全沒有酸溜溜的想法,假如我唔抵得人成功,或者踩d年輕人無用,我就跟lost decade那些日本人陷入同樣的迷陣,我不認同用少數成功例子去証明社會經濟無問題,係d人懶、搞屎棍、無料。

其次覆你的問題,我覺得香港大把人懷材不遇。而我談不上成功,才華只屬普通,你想說我是freeloser也不打緊,因為充其量只是我個人問題。

現時出來抗爭又不得志的,明顯不是一小撮人,是兩三個世代的人成了generational loser又無法解決,否則溫總就不會形容這是「深層次矛盾」。

Olivia 說...

誰說努力不重要?請不要誤解。

人要盡人事而後聽天命。在大多數情況下,不努力的人便不會成功。但即使結果不成功,也不代表那人不努力無準備。

讀書勤力當然重要,但並非唯一因素,遇上良師或在芸芸書海中覓得助人打通任督二脈的經書,都講時機:有人眾裡尋她千百度而求之不得,也有人一擊即中省心省力。早點開竅早著先機,這沒甚麼好自豪的,也沒甚麼好埋怨的,畢竟並非人力可控制。怨天怨地沒有意思。

但人為制度卻是可改變的。何謂「well prepared」?很大程度取決於結果的好壞。我認識好幾個聰慧敏銳的同學,日常表現極佳,偏偏考試分數隻屬中游,能歸咎於他們的不夠努力嗎?考試制度也許是相對公平,是現存制度中最好的,但並非完美。結果不好可以有很多原因,不努力只是其一。看見年青人潦倒,不必馬上判定「此人懶惰無用」,更不用視之為年青人的典型。有份抗爭的年青人中,也不缺考試贏家,大家心中的「精英」。(當然,沒有最好,只有更好,人外總是有人。)但把抗爭的年青人想像成輸打贏要的「失敗者」,是武斷,也忽略了社會制度不公的現實。社會學家C.W. Mills寫過一本書叫《The Sociological Imagination》,愚以為其想指出的觀點是,「個人問題」反映「社會問題」,兩者不可分割處理。也許能對這個「個人-制度」的討論帶來一點新思維。

也沒有人要求所謂的「絕對公平」。命運安排各人起點不同是其一,我並無異議。同時,我並沒有說過魔術師生於70年代才是其成功的原因。敬請留意。現存制度不公是事實。有人選擇在制度內膨脹勢力攀上權力階梯,有人選擇表達意見嘗試改善制度--憑甚麼前者可以理直氣壯地發財不立品,對他人「指指點點」?在一個畸形的制度中得益,有時我會忍不住覺得自己也開始變形。

小瓶子 說...

报纸讲话20-24岁的失业率达11.5%, 而15-19岁的更达到21.6%.

这是我们担心的问题.

C.M. 說...

小瓶子:

我會認為好大程度係因為經濟問題。

原因係,全港最大能夠吸納年輕人的行業,是Merchandising,亦係最大勞動力市場(睇以前大半版Recruit 都係merchandising posts就知)。但由於出口受到嚴重打擊,好多export company, merchandising, logistics, trading firms 唔係轉番大陸就係被沖走,好多職位裁左仲未請得番,而裁左又有經驗既會比年輕較少經驗既可以有更大機會入番去做。

家陣我仲有好多朋友裁左出黎仲未搵到,佢地成為年輕人入職既最大競爭。

C.M. 說...

補充:咁當然,我好同意唔應該集中曬成個方向落某一兩個所謂產業上面。講真,我自己講過好多次,自己真係好想入番廠做,好想,好想。

Hana 說...

可惜我間廠依加請咗大陸人做廠長平靚正,帶埋老婆仔女住係廠,唔使心掛掛。

Hana 說...

>报纸讲话20-24岁的失业率达11.5%, 而15-19岁的更达到21.6%.

相熟魚檔老闆話佢果行好需要後生仔入行,初入行已經有7、8仟人I工,但份工起得早又辛苦,廿來歲嗰啲冇人肯做,就算有幾個來試做,做唔到一個禮拜就礔炮唔撈了。(做魚檔早午兩次要係運魚車度抬啲魚落來,後生仔體力好啲),豬肉檔亦係咁,但有眼見賣魚、賣肉有幾多個係後生仔吖?唔係人哋唔請,係有啲工冇人做啫。

黑人 說...

> hana

唔止賣魚,就算做手打麵都係咁
灣仔果間永華麵家想搵傳人,無人肯做

因為香港職場同學園一樣,衰左一次就好難翻身, despite有請人經驗的blog友好開明,大多數HR都是萌塞的

「點解你份CV有兩年時間賣魚?」
「咁潦倒走去賣豬肉?梗係有問題啦你」

日後想轉工就邊度都唔駛去
呢個問題再叉出去就可以叉到好遠


> CM

你講果個label問題,統戰的一方當然想你繼續用label,方便佢打壓敵人

而一般市民都係靠label迅速掌握事件,除非有辦法令大眾有個paradigm shift,改變認識時事的習慣。

> 小瓶

有唔少失業既年輕人,上街抗爭同佢打份爛工的分別唔大,假如經濟好左,佢地見到大幅改善生活的機會,應該有至少一半會由上街變成上班

B.Y. 說...

引述朋友Kendrew Chan的blog:

今日係壹零年第一個試練。一早就衝入心戰室。心戰室內真係勁多怪獸。不過多數都係後生仔女。應該都係80後,未見到有90後。
到場時間可算係準時,心戰室來信要求參戰者早到一小時。於是照辦。點知,參戰者全都遲到......80後,你地係得既。麻煩心戰室姐姐要一一解釋。

騎呢人A本來排頭位0935,呢個老友冇睇到來信要求早一小時報到。呢位仁兄0925才到。門口呀接待姐姐本來想殺佢,最後都係比佢入。點知呀騎呢人A仲惡人先告狀。我都未見過人咁樣去心戰室。邊個係庒,邊個係閒,邊個求邊個都未攪得清。心諗,你得﹖真係死得人多......

騎呢人B係一位小姐,估計都係沒有依信早到一小時。不過呢樣唔騎呢。騎呢既係呢位小姐既衣著。好有80年代feel。著左一對很殘的絲襪,很長的長褸,最重要係土土土土土的樣子......小姐,呢度係心戰室,唔該你執正少少,最起碼你都換過對好少少既絲襪啦,幾廿蚊一對......你唔著套裝你都咪著長褸丫,去開P咩......最後喵一喵呢係騎呢B小姐個file,乜......有張cert有個紅色大粒星印章......噢......明晒......

其餘都係咁上下,越後生就越似做保險。越老既就越似去行街。
不過都有共同現像,就係呢班人都似係30樓下的80後。共同點就係去到接待姐姐個位,梗係有野漏,或者同姐姐拗。拗咩丫,根本就係冇睇清楚封信,根本就係冇做好準備。比一個月時間你地班友去準備都做唔好。點解咁多人要臨場考BLT,阻住晒個流程。如果唔係大學畢業生就冇得好講,但係大學畢業又唔去考CRE,又唔考BLT,咁你來做咩,點叫做有為自已將來打算。

唔係話人地做得差而話自已好,只不過自已並不是要去爭戰,只是磨利刀而矣。亦解釋了點解今時今日仲未比人炒。因為不是自已好,只是對手太遜

-------------------------------
如果80/90後認為社會比唔到機會佢地的話,咁整體來說,佢地又比到乜野社會?

守時,守諾,準備,勤勞,雙語能力,應變能力等.你真係認為普遍上佢地真係比得起上一代人,甚至更優勝?

我覺得80/90後的人好多都比上一代的人寵慣.做事漫不經心,冇交帶,唔滿意就走.最重要係,將一切失敗的理由都推向社會.自己冇錯,錯的只係社會.

你睇牛奶雜誌介紹d衫,有幾多真係佢地憑自己份糧係買得起的?一係借錢,一係問屋企囉錢.講真,邊有得怨?

又,而家係有大學生冇學徒的社會.你問十個後生仔,七個都話想做設計,淨返三個想做金融.同佢話做廠車囉刨鑽?邊個理你?問題係,你估個個80/90後都係設計人材,金融才俊?但馬死的,又不願落地行,唔願努力,又眼高手低.

利益申報,我也是失敗的80後,不過我知我的失敗係因為我懶.我認,亦知道好難改.

黑人 說...

BY

我都遇過一些令人眼火爆的年輕人
雖然佢地既traits係好難頂
但係邊個train到佢地咁先?

身為前輩的我們,做過d乜去幫佢地呢?
人係好容易忘記當初前輩的包容提攜
對後輩格外挑剔

我不是特別想defend年輕人
但是我想提醒自己不要律己以寬,待人以嚴

魔術師 說...

Olivia:

「讀書勤力當然重要,但並非唯一因素,遇上良師或在芸芸書海中覓得助人打通任督二脈的經書,都講時機:有人眾裡尋她千百度而求之不得,也有人一擊即中省心省力。早點開竅早著先機,這沒甚麼好自豪的,也沒甚麼好埋怨的,畢竟並非人力可控制。」

此言差矣。有人早著先鞭,可能因為佢努力又可能因為佢聰明,也可能是一時的運氣。但運氣唔可能時時有,如果長時間來說某人是「成功」的,那麼他很可能就是有真正的實力,而不是靠符碌。

姑勿論是經努力或是因為天份高而達到的成功,我想不到有什麼原因要壓抑自己「感到自豪」。自豪,是認為自己的成功是應得的。

Aurora 說...

魔術師:

你而家可能係中產,甚至係上流人士,以你而家既情況同八十後剛入社會既後生仔比,當然可以笑佢地係廢物。但希望你係笑人既同時,試諗下當呢班八十後去到你而家既年紀,比你成功既人會有幾多? 我諗無一萬都有幾千。而且你都唔好忘記,你果個generation既人,有幾多係做緊草根階層既工作?
我諗你而家既情況同一個小學生係度恥笑緊班幼稚園小朋友無分別。

再者,反高鐵等等既示威,同將來成功與否完全無關係,將兩者連繫起黎我覺得好無邏輯。

匿名 說...

Olivia

> 我認識好幾個聰慧敏銳的同學,日常表現極佳,偏偏考試分數隻屬中游,能歸咎於他們的不夠努力嗎?考試制度也許是相對公平,是現存制度中最好的,但並非完美。

考試考得好的學生都不代表真係有能力,因為香港考試制度存在好多評審問題。我A-Level經濟考得好,不過我自問係唔識經濟科,即係書本不能同現實接軌,根本就不能靈活運用該科目。

讀書要讀得充實,讀得有價值,就要慢慢來,需要時間消化;不過香港教育制度係要鬥快、鬥「努力」、鬥弱點攻擊(精讀補習)。就算你唔知讀來為乜,你走精面就會有好成績。我敢說九成九香港學生都係好似我呢類仆街一樣,因為佢知道,alevel成續只要有ABC就好易入到大學,入到精算、LLB、QFIN、medic的學系,就算買唔到豪宅都可以開間診所仔,人工衰極都有幾萬蚊,已經好過好多人。如果你對自己誠實,按自己意願及程度讀書,考試成績很可能差過呢班仆街,仲分分鐘比人話懶散。

GEM

魔術師 說...

Aurora:

呢句我無講過:

「反高鐵等等既示威,同將來成功與否完全無關係,將兩者連繫起黎我覺得好無邏輯。」

只不過係討論中有人話我係「既得利益者」,「成功人士」(不是exact wording的有呢個意思), 講講下就講左去「成功」果邊姐。