星期三, 4月 21, 2010

鬱到病

上星期有位學弟走了,可能因為不太體面,追思會沒解釋緣由,朋友私下解釋,學弟患抑鬱症已久,病發自殺。
今個星期,又有一位朋友抑鬱症發作,除了勉強msn之外,甚麼都不想做。

我是半個過來人,數年前也曾經有三數個月的時間非常沉淪。現下想來,越覺得抑鬱症不是「有事想不通」,或者「EQ不足」,反而更像腦袋內的化學物分泌失衡,令腦袋不受控地維持在沉鬱的情緒。當年入行不久,剛剛熬夜趕工三數星期,完成一單頗大的案子,接下來還有新的案子要做,前途一片向好,完全沒理由消沉。

偏偏某一天,就不受控地,甚麼都不想做。

當時心想,就放懶一天半天吧,不打緊。誰知日復日,不單止無心工作,連玩樂的意欲也沒有。每天盯著電腦,不斷refresh看看有無新的討論串,又或者不斷refresh色情網站,看看有無更新(但完全沒有色心,純粹想見到有更新而已),除了上網就是打Gundam和MGS3,將畫面內的敵人殺光,好像在頹廢中有點成就。

當時都不知自己有抑鬱症,只覺得這樣下去不行。翻看朋友清單,剛好當年有個新相識,同樣是freelancer的朋友G。 非常感謝G騰出時間,讓當時的我有機會跟人多點開口說話,就這樣他陪我每晚hea足三數星期,每晚開電腦做些少工作(其實當時已被客炒了魷自己不知而已),主要的時間是吹水瞎扯,慢慢才走出低谷。

我是幸運例子,大多數患抑鬱人單靠自己,頗難走出困局。即使提起勁向外求助,也不是人人懂得幫忙扶持,多數的朋友不知底醞,用理性邏輯去分析當事人的問題,覺得是懶惰、不長進,繼而有各種批評,雖然出於善意,往往是壓垮駱駝的最後一根稻草。家人距離近,加多幾錢肉緊,壓力更大,我那位抑鬱朋友就有同樣的問題,家人在身邊,非但幫不上忙,反令當事人壓力更大、更孤立。

我推斷腦袋有某個部份負責分泌維持正面情緒的化學物,一旦該區域搞垮了,人就會沉鬱到想自殺。之前香港有個工作壓力太大,最後跳坡自殺的設計師,或者日本有個長期通頂某天上吊的廣告人,大概就是腦袋這部份壞掉了。而且一旦損壞,要修復是極難,吃藥只能治標,甚至這方面都不是太有保証(否則學弟應該早已康復吧?)

只可惜我們對於腦袋極限所知極微,依然維持全球最長的工時,政府仍在鼓勵我們唱獅子山下。

14 則留言:

說...

讚。但求助醫生始終都係正途...而且都有用。

近排我其中一樣苦惱就係米太產後都有情緒問題,睇左好多醫生都冇用...跟住而家睇精神科,叫做有好轉...

醫生話佢情況其實唔嚴重,亦未到「產後抑鬱」既地步...但作為佢身邊人,已經覺得連我都壓力好大...

Betty 說...

相信写BLOG也是发泄的一个途径.

Hana 說...

因應病症某種情況下醫生會建議病人書寫來舒緩精神壓力,書寫的前題是內心感受,如果寫博不能盡訴心中情,只係寫八卦野、流水帳...咁寫博對病情就唔會有幫助。

方潤 說...

其實朋友跟自己多玩一點,或者找些事情做分散注意力,甚至只是吹水(總之不涉及他的問題,吹得越遠越好)已經可以幫助他走出牛角尖。

我抑鬱果陣都係自己不停寫野,將自己D唔開心寫晒出黎。

黑人 說...

> 米

產後抑鬱我聽過係有進學化上既因由,一時醒唔起詳細係點

你地有無睇過電影「傻豹遇著烏sir sir」?未睇過的話睇下,得啖笑,或者有d 幫助

> 小瓶

渣老闆都講過寫blog係洩洪,睇黎佢最近在鬧旱。

> hana

就算寫blog,都不是人人可以盡訴心中情,米搞個樹窿得來不易呀...

> 方潤

同意,當時G就是陪我天花龍鳳傾無聊野,分分神。阻到佢夜晚加班,真係辛苦晒佢。

小星 說...

腦袋內的化學物分泌失衡 <--是的,所以醫生會開藥給患者。

小星 說...

腦袋這部份壞掉了。而且一旦損壞,要修復是極難 <-- 這個論調很新鮮,待查。

吃藥只能治標<-- 所以一般都有其他跟進,多是進行認知行為治療。

這方面都不是太有保証(否則學弟應該早已康復吧?) <-- 係呀!邊有咁神奇食兩粒藥,傾幾句計就無事。逢親「心病」都需要時間去醫架喇。

另外,抑鬱症病人成功自殺通常唔係佢最谷底嘅時候。如果嚴重抑鬱,病人反而連死嘅energy同動機都無。「死亡危機」通常是病人由谷底慢慢爬升時出現。由於病人呈改善狀況,可能藥量會調整,可能身邊人關注情度減輕,可能病人的狀態會反覆。又當病人的情緒向上升一陣子又再下跌,感到特別洩氣,覺得自己無辦法好轉,因而計劃自殺。

selina 說...

i think depression runs in the family to a certain extent.

How parents behave/teach their children is important.

life is just full of imperfections.

when the average HK worker walks out of the office bldg beyond 7 pm and barely see the daylight (for me neither in the morning, as sometimes i need to reach office by 7am), it is hard not to grow depressing. That's why i tell myself, enough is enough, i don't necessarily desire promotion.

C.M. 說...

「腦袋有某個部份負責分泌維持正面情緒的化學物,一旦該區域搞垮了,人就會沉鬱到想自殺。」...

食葯,固然可以。不過,修復這個區域的工作,其實也是很有可能的。無論是有人協助,還是自己苦苦支撐,最重要,還是一點一滴的「主動」在損傷了的區域動工,假以時日,身體就自然會好的了。

我,當年是這樣熬過來的。

C.M. 說...

selina's words on family and parents x2

黑人 說...

> 小星
謝謝補充,

我又諗,點解咁多藝人吸毒?越紅越吸得厲害,我懷疑係佢地休息得極少,壓力又極大,抑鬱度會比正常人多10倍,唔靠毒品,係好難撐得起自己繼續落去 (有人吸煙,有人飲酒,有人食大麻,有人索K仔,其實都是做同樣的事)

> selina

無錯,我就係覺得香港人咁長工時,其實係損害緊長遠經濟利益,可惜中環價值就係最短時間cap最多的錢,話知你cap完之後陸沉。

家族遺傳固然有,我見唔少fd的父母EQ好低,幫唔到忙事小,不斷加劇問題事大,朋友們不時都會間歇depress,想幫都唔知點幫

> CM

原來CM都是過來人!(致敬)

小星 說...

可是吸毒會令腦袋內的化學物分泌失衡,有機會引致不同精神問題。

C.M. 說...

過來人我梗認,仲呃左幾篇post添喇。

無名 說...

其實我女朋友之前都係咁,精神壓力大,令到腦入面既多巴胺分泌唔正常,個人會經常 depress ,而且係無乜原因就會情緒大起大落,我會覺得似糖尿病人自己身體控制唔到血糖一樣 。

吸毒,食煙,飲酒都可以一時之間補充到多巴胺,但係長時間咁去依賴呢 d 野會有不良反應,甚至要越黎越多先有反應,因為會慢慢麻木左,睇醫生開既藥係可以適當咁補充返多巴胺,之後睇精神科醫生可以幫你搵返壓力源頭去減壓,咁可以慢慢過返正常生活,所以唔好怕,有咩事最緊要睇醫生,醫生可以搵唔同方法幫你。放開自己就咩事都可以解決,千其唔好諗埋一邊

多巴胺-维基百科
http://zh.wikipedia.org/zh/%E5%A4%9A%E5%B7%B4%E8%83%BA