星期四, 8月 19, 2010

踩場

前排走去聽一個「把妹達人」的節目,相信有follow 小弟twitter的朋友應該都有聽過

聽完,真係把幾火,幾位主持將溝女咁原始既野,用術語包到鬼五馬六,不斷d 咩AMOG, NEG, SARGE之類的術語飛來飛去,越講越沉醉自己個世界,有位嘉賓的藝名又過長(四個音節),結果主持們又甩嘴,一時爆其真名,一時又講返藝名,甩皮與甩骨是也。

當然身為聽眾的小弟就越聽越frustrate,例如「昨晚我去左搭訕撩兩個女仔,佢地兩個對我都有d興趣,傾左幾句,帶佢地遊花園,指到佢地聽晒我支笛,成功拿到電話,有條女仲肯同我扑野添,掂!」

用佢地的術語,就會變成「昨晚開左兩set SARGE,兩條女都有IOI,傾左幾句,做左compliance test,成功phone close,有條女應該過左LMR,good game!」雖然唔係100%準確,但大致如此。

整個節目九成對話都滿佈上述的da Vinci Code,用好繁瑣的術語傳達好簡單意思,而各種術語,就係源自佢地的聖經「把妹達人」(The Game),基本上你無睇過本書,茂茂然走去聽,係完全唔知發生緊乜事。

心想,你做得節目講把妹,無理由用咁大量的術語去趕客,於是就去佢地的留言版講左個建議。假如你同我一樣,鍾意同人嘈交,或者鍾意睇人嘈交,不妨去望下,否則無謂浪費時間。

聽完個節目,第一個感覺係成班主持好似另類的電車男,題目不是動漫模,而係溝女理論而已。當時我心中最大的疑問係:節目講的內容都是助人入門,但係用的手法就假設對方已經相當熟悉「把妹」lingo。有經驗的人固然不會聽已經識的東西,零經驗聽眾就完全被趕離場,到底節目的定位是甚麼?雖然留言的時候都想到,可能這個節目跟動漫電玩的電車男節目一樣,屬於少數insider趣味,儘管看對方如何回應。

結果版主及主持們的反應遠比預期中充滿敵意,大意是指小弟咁q懶,沒有做好功課就上來聽抵L死,講得咁深就是要screen走d毒男之類,換言之,有小小挑戰佢地想法的意見,都會被視為敵意行為予以反擊。

遊一輪花園,結論是論壇大多數的fans甚至某些疑似主持,心智其實都很稚嫩,尤其辱罵得最凶的一兩位,其實是attention seeking的小朋友,故意不理他,他就想會盡辦法刺激你回應為止。

話說黑人早前都試過很稚嫩地質問某某創作人的作品,語氣不甚客氣,對方很得體地回答:「你的意見很好,我會考慮的,可是我亦有自己的風格和路線需要維持,未必能全部滿足你的建議,請見諒。」

在整場「把妹罵戰」中,我就是想看看到底去到甚麼時候,才會有人很得體地「送客」,尤其當版主第一個扯火同「客人」打成一團的時候,情況就更有趣。

以前或無心,或有意地對好些前輩高人提出挑戰性的質疑,反應不一,有些(自以為)名氣大的前輩,反應大得令人非常驚訝,會用上中學生的方式回應(eg. 咁多野講你又好叻咩?),遇過修養極好的高人,他們根本全沒動氣的需要,因為大家的眼界和心境相差太遠,正如一個剛剛學懂寫123的小朋友嘲笑一個成年人的字寫得不似copybook,你只會淡然一笑,不會因此勃然大怒吧?(我不會講自己挑戰別人的言行是很正當很有禮貌,純粹用來舉例)

把妹達人有一個術語叫shit test,意思是刺探對方的負面性格,從而判斷對手是否不值得追求的廢柴男女,這次上他們論壇來個shit test,同樣大開眼界 XD

是次撩交嘈的另一感想,是確確實實地感到自己mellow with age(前後都在網絡聊天室及論壇泡了十多年),以前上網嘈交,是寸土不讓,你媽我一句,我必定還拖。現在心態比較傾向「是但啦」,「唔明就算」,想再嘈都提不起勁!

21 則留言:

C.M. 說...

我鍾意睇人嘈交。

如果得閑隨時會嘈埋一份。

黑人 說...

呵呵,年紀大左,不能嘈太多
因為好易激上心影響日常生活
應該話,激上心之後,不能好似15,6歲咁,訓響張床度訓一日去回復,要繼續開工做野

kenkachemhazard 說...

呢排推特上都遇到罵戰王,我只好笑他求罵如求愛一樣。呵呵,愛罵人的,越來越發覺有相可睇。

黑人 說...

>kenka

係?
死啦,我第日出街要戴口罩了
否則俾人點相

C.M. 說...

Kenka,唔見人,近排忙乜?

kenkachemhazard 說...

忙面書。

推特應付罵戰王辱罵。

Terence Yun 說...

溝女都要普及化先得,用術語,只能說是兩個字「扮勁」。

黑人 說...

> 鹿米

有些場合,用術語係必須
聽動漫ACG,大家預左係小圈子
講股票,大家都有心理準備
所以上述兩樣有術語係ok既

問題係講溝女,大家會覺得係一樣好普通既野
除非社會接受左溝女都係一種專門技術
否則我expect生活娛樂的心態入去,聽到佢地blah blah blah,就會好無癮甚至火滾

佢地的立場是:我收幾皮野教一個學生,宜家免費同你分享,你居然上黎柴我台,多謝都無聲?

問題係佢付出左努力唔等於我一定要grateful,呢個係佢地個節目方針同聽眾期望錯配的問題

Ebenezer 說...

佢地講到天花龍鳳又點?work 唔 work 先?

hkeric 說...

小弟懷疑佢地閱讀能力有問題,總是答非所問.小朋友嘈交:p

Derek 說...

一個咁普通嘅COMMENT,可以上綱上線到「敵對勢力派來」,呢D節目唔聽到罷啦。

hkeric 說...

If you can't explain something to a first year student, then you haven't really understood it.

http://www.winwisdom.com/quotes/author/richard-p-feynman.aspx

hkeric 說...

開左個A/C但係要8hr之後先之有得玩,借個地方玩一玩

//袁震揮?
邊春個來?
袁震俠個老母?

如非文盲,請用Google :)

黑人 說...

> ebenezer

work,不過未必因為把妹心法的功勞
班人信左套野,自信心增強左,肯試
自然就大d 機會成功
呢d 把妹training同睇運程一樣,掂左就係師傅教得好,衰左就係自己做錯step

> hkeric, derek

8小時個設定幾好,可以減低痰上頸式的怒火,少好多罵戰

我睇佢地跟「對家」同行相輕的態度,其實都幾可憐,把妹已經是小圈子,還要喊打喊殺搞乜鬼

不過又咁,留意左好幾個「把妹師傅」,通常d ego都十分龐大,唔容許有人disagree自己,即使自己講錯野都一定要撐到底

可能要有果套ego先至有果種能力都未定

Elvis 說...

聽落佢地年紀都唔係大, 我估二十五之前。

果d 年紀, 理論上都係一個男人把妹最成功既日子。所謂年少輕狂, 有d 做過既事, 你過左30歲, 諗返轉頭, 都會覺得好荒唐。

我二十歲果時做過d 野, 依家真係做唔出, 人老心老, 無左果種火, 亦無左果種不計後果

黑人 說...

> elvis

我都估年紀最大的都不超過28 (唔知點解諗到28呢個數字)
正如你以前所講,荷爾蒙分泌變左,就自然無左團火啦,俾返20歲的體能你,就會做返20歲的事

唔知邊位網友上左去講左d明報式的意見
(有些少point各打50大板,大家唔好打喇之類)

跟住個版主回應都依然好defensive
我見到就想起以前在同好會時的日子,少少野都當係人地黎搞事,趕走左個「搞事者」好似好叻咁,宜家諗起,以前少d時間嘈交,多d時間做野,個會可以搞得好好多

imak 說...

沒有做好功課就上來聽抵L死,講得咁深就是要screen走d毒男之類>>>> 你真係mellow 左喇, 比我都會同佢死過! 玩過那個宅男game 就不是毒男了嗎? 你.... (下刪一千字)

黑人 說...

> imak

無聊諗諗下,查實落街買菜都可以講到好pro
街市檔老板娘 (WMFOO): Wet Market Female Outlet Owner
厄枰 (DW): Dishonest Weighing
講價 (PH): Price Haggling
街市 (WM): Wet Market
落街買菜: deploy

嘩!昨日我落左WM deploy, 跟個WMFOO PH左好耐,頂丫,返到屋企先至發現被DW

*******

真係mellow晒,係時候開set sarge下d WMFOO

hahaha

匿名 說...

佢地以為你係行家,想爭飯食掛?

黑人 說...

呢d 飯唔輪到我爭食啦
我係無聊聽節目同撩交嘈嗟
講開術語又有d野講既,下次再寫

Betty 說...

要争食要沟多D女先得哦.