開會筆記

今日開的會，很累，無收穫，但有些教訓。

客戶是某廠家公司，準備大張旗鼓擴充，因為嫌內地的設計土味太重，特意找G和小弟上門洽談，事前只是約略看過舊網站以及心中有個粗略的報價預算，其餘都不清楚。

過程起頭已不順，明明甚麼也沒碰，我們二人前往途中雙手接連沾上不明來歷的污垢，G進門時大意一頭撞在客戶的玻璃幕，十分狼狽。

坐下開會，客戶沒有自我介紹，G也沒有互相介紹的打算，全場2對4，氣氛十分奇怪，大家都沒有議題，小弟為打破dead air，向客戶展示一個日本網站參考。

只見客戶A露出一副八婆嘴臉，皺眉頭說這不是她想要的東西。好吧，我反問他們心中有無甚麼參考對象或者競爭對手之類？客戶A說不知道，你們應該帶些東西來impress我們呀！然後客戶A,B和C就當我們二人透明，自顧自開內部會議：「怎辦呀？現在都不知要甚麼(放在網站)，他們兩位又沒有帶好東西上來，我們怎知道他們水準好過大陸的設計？不如找阿X問問吧！我看網站這裡咁咁咁...」

G急忙補鑊：「設計可以參考參考，不如我們先砌一個樣版供各位看看，再另行商議如何？」

客戶聞罷才回過頭記起我們的存在。假如平日只有我上陣，大概早已起身走人，見到G急於割地賠款，猜想這可能是他的重要客戶，也就忍隱不發，做個微笑的點頭公仔。

客戶A滔滔不絕地列舉同業的網站參考，細心解讀她的潛台詞，大概已能將她的客品(客戶品性)歸類。

聽A連珠炮地講了兩個多小時，散會一如所料沒有next step (除了G自告奮勇試稿之外)。

**************

會後跟G說，這單案子，恕不能接。

心中沒講一句：是A小姐面目可憎，第一眼直覺上已經認為她難頂，交談後只是加強這個感覺矣。

我解釋：「客戶對口單位是C小姐，可是真正話事的人是A，觀其談吐及待人接物，想必不是真正的老闆，倒似老闆下面的親信宦官，換言之，我們要跟C小姐聯絡，猜想A小姐的心意，而那些心意卻未必是真正老闆想要的東西。」

「初時我以為你們已經相熟，毋須互相介紹，原來除了C小姐之外，全部都是第一次見面。初次見面，A小姐不介紹自己倒算了，一坐下就滔滔不絕發表自己的偉論，換言之她不在意我們是甚麼人，甚至當我們面前講不知我們跟大陸土風設計師有甚麼分別，可想而知我們在她心中的地位，是非常之低。」

「再看她所講的參考例子，全部都是同業，心目中有甚麼風格或感覺完全講不出，而我所舉的例子，則全數駁回，理由是這不是他們的行業。即是說，他們只能接受同業做過的東西。」

G說：「那些網站的樣子很平易柒人，不難抄呀。」

我答道「當然，抄得似，A小姐是不會插你的，畢竟那是她的建議。可是她會覺得你的作品沒有超出她想像範圍，是你無料到。真正做些與眾不同的東西，又會回到『同行不是這樣做』的死位，回想一下開會的情景，我們講的proposal，除了砌pitch稿的建議外，全數被她駁回，而且由始至終，也沒有問過我們一句意見，可見她不會跟人協商合作，倒是習慣發號司令的人。」

「雖然我們哥兒倆都等錢用，可是對方初步的schedule是8月中，稿卻要現在開始砌，這單案子至少要玩四五個月，你打算開多少錢？萬五？二萬？一定倒蝕入肉，開一個合理價位，又輪到他們不接受，師奶的數口最精，大陸收五千，你們開五萬，到底你們是甚麼新鮮蘿白皮？所以，權衡利害，我也不建議你做，除非你應承了幫朋友又另計。」

雖然，這個階段跟G割纜有點殘忍，可是主動建議免費試稿的是他，總不成由小弟承受。當然，他太早應承了太多東西，現階段想退也不能，唯有硬做，而且也不能交太差的貨，否則自毀商譽。

身為朋友，只能建議他開個天價及大額訂金，用價錢嚇跑客人，一味用減價和試稿作招徠，實在不是傾生意的方法。

無字天書

記得以前一位做製作的前輩經驗之談：「4As廣告公司最強的地方就是presentation，除非你有緣入去打工，否則就算你偷到他們的powerpoint 也學不到他們的技巧。」

後來讀過The Perfect Pitch這本書，再加上早前一次工作上的體會，印証此言不虛。

這並非甚麼九陽神功秘笈，純粹因為專業的presentation，通常沒有太多文字，絕大多數是visual aid，假如講者水平夠高，隨時連標題都沒有，開完會送個pps給你都偷不到師。

Jon Steel這類神級presenter本身是堅決反對使用powerpoint的，他喜歡用傳統的黑色card board 貼上圖片作演講道具，例如介紹自己公司的廣告作品時，他會事先將作品card board 反轉，順時針繞場佈置。開會時他就可以站起來逐一揭開解說，吸引與會者注意。(當然，這招要視符場地格局以及受眾，所以他亦非常強調事前實地考察)

對於吾等凡夫俗子打工仔來講，要開會present大概離不開用powerpoint 一途，唯獨多圖少字的原則依然有效。

最低劣的方法是以point form 和broken english將講稿照搬上紙，會議期間沒多少人會認真閱讀，即使有人讀，他們的注意力會轉到powerpoint slide的文字上，冷落了講者(即是你)，真正有效的方法是用圖片/短片將講者的概念圖象化，加強聽眾的印象。切記，九流clipart 或「裝飾性」圖片並不是visual aid，只是很奄悶的distraction。如何分辨有效無效，看倌最好讀一下The Perfect Pitch書中正反實例，篇幅所限此處不贅了。

可以對比上兩幅和下兩幅的ppt slide，是小弟在廣告學堂時巧取豪奪得來的講稿。前者是某大4A 市場策略部的手筆，後者是某creative director 說明ambient advertising的slide。雖然不算apple to apple comparison，我幾肯定當年對學生印象最深的必定是後者。

編劇

做完女媧補大鑊。客大喜，請食飯吹水。

客戶本身是個監製兼創作人，經常外判creative，日後還有合作機會。

監製的網齡停留在web1.0，不黯2.0世界，撞著黑人這個web1.5，也就權充盲公竹。偶爾談起他最近跟進的案子，大概是想法子利用2.0技術，為客戶搞些宣傳campaign，問題是想不到可以搞作的點子。

製作班子是金牌award-winning developer/creative公司，大家磋商了好些時候，講過寫game、寫app，探索過不少可用的科技平台，監製苦笑年紀大了，撐開腦袋硬啃科技字母湯如rss feed digg twit之類，實在吃不消。那邊廂，好些1.0世代甚至pre-internet世代的朋友，又勸他不要陷入科技迷陣，其實有時人肉操作更優勝的...

黑人不涉利益衝突，隨口up三數建議，監製聞之擊掌稱善。

原來，科技派和人肉派，各自表述自己技術優勢之餘，忘了end user是甚麼人，有甚麼需要。

監製把小弟捧上天，當然要回敬拍拍馬屁：其實監製你不懂甚麼2.0科技，卻是最有優勢的人呀！

「科技最終都要向人服務。人不外乎吃喝拉睡七情六慾，監製你讀電影出身又是行家，人面廣，人生百態早已有個大概。稍為運用編劇技巧，要推敲一個John或者Mary每日的生活劇本情節，完全無難度。」

「再講，觀察人，總比追科技trend更貼近紅心。日本手機app某大創始人，本身是個完全不懂科技的女生，但她知道生活上有甚麼細節可以再改善，先想好生活點子，再要求工程師、編程員想辦法在科技上配合。」

大家在自己領域浸淫久了，很易忘記end user：設計人太專注美觀及標奇立異，編程人陷入技術迷障。至於創作公司，往往先考慮令自己look good和獲獎。

假如廣告學堂要教甚麼是創意，請不要老老土土再講outside inside the fcuking box，不如讀三兩本編劇書，訓練如何寫像真的生活劇，對工作更加有幫助。

四月運程

某大機構要設計一個interactive booth，又報價又要proposal，搞掂之後話唔做。(即係搵左另一個supplier)

跟左就黎四個星期，得幾千蚊兩個人分的web project，個客唔認數又添新requirement，話做完就找數。而我呢邊就話唔找就唔做，僵持，似乎佢又係搵緊另一個supplier，搵到記住話我知，我都想知你地咁L奄悶又無錢又高要求，有邊個頂得順

連續搏殺左好多日，昨日通頂趕工，今日個客打黎話做錯晒請重做，附上溫馨提示請閣下不要懶醒自動波，問清楚先至做。
d料又係斷截禾蟲做住先，唔夠資料，執生估中就係應份，估錯左就係你懶醒，好波

就黎close既project，個客突然話有些finishing touch，差好少嗟請快手做埋佢啦 ~ 粗略估計需時至少三日

本來programmer話好易既programming，由三日變成要做兩個星期，放假休息停工，陣間要諗辦法同客解釋

好似仲有個客拖數就黎拖左三個月

欠人既數找晒，但人欠我既數全部未返

下星期要找卡數

完全唔明點解咁多人羨慕freelancer既生活，可能佢地望到最成功果d，望唔到我呢d級數吧

高人話今年有唔少桃花，中晒，才子E每次回港大把女仔嬲埋去，佢見我谷上腦好心約埋我出黎。d女仔係好掂，不過唔係有男友就係quali太勁哽唔落

唔計上述既野，仲有一份proposal 同埋一份layout要砌，但宜家已經超眼訓，多謝晒。

呻完，埋位繼續。

女人性格

最近接一單案子，網站製作，急趕。客戶是個典型女人性格的女人，擅於感性溝通，不擅理性邏輯思考。

因為事前規劃欠佳，網站的內容都是斷截禾蟲地一丁半點擠出來，很多時做好了轉頭又要改，死線不變。

最麻煩就是客人心血來潮，突然想起就拋個request出來，然後問你幾時有。

辛苦計出一個時間，她又討價還價「星期五太遲，黎啦幫幫忙星期三啦」「星期三前真係做唔切喎」「但係我星期三一定要出到街...幫幫忙啦」，總之玩了一輪word games，最後「咁我星期三等你喇喎」，despite the fact 我個答案係「做到幾多得幾多，做唔晒唔關我事。」

如是者交鋒一兩次，很快就摸到個pattern。原來客人需要一個口頭承諾，有承諾就有安全感，有安全感不管現實能否起貨都不要緊，deadline時就會十萬個電話打來問責 「又話星期三有既？仲有，你上次應承我有Q，點解無？」(Q是任何黑人從未聽過的requests)

長久不是辦法，其他客人的project schedule 亦全被打亂，再加上通了幾晚頂，生活節奏亂籠。於是不再輕易接她的電話，始終打舌戰不是我強項，就算給你辯到deadline提前至星期三又如何？處理technical issues的人是我，現實是星期三不行就是不行，program不能分段上，未寫好就跑不動，跑不動就無野睇，一字咁淺。

不通電話，就變成msn chat攻勢，結果淨係msn 拉鋸都可以無左整個上午。終於要「向無理要求說不」，請對方將所有requests 用email 白紙黑字寫清楚，因為她們(連同老闆)的想法天馬行空，突然就有新點子，隨口說說就要你點石成金paste字成site 幫幫手唔該啦黎啦。吾生有也涯，以有涯隨無涯，蝕入肉矣。

然後客戶老闆寫email和打電話來發脾氣，黑人絕少在公事上發沒有作用的脾氣，亦相信多數的生意人也是如此，誰知客人女老細的來電都無甚建設性，講完一輪前因後果心理背景深情分享，next step就係「你快d覆返個期俾我。」至於「期」是甚麼，整個website還有甚麼outstanding tasks 就隻字不提(主動問都依然同你分享心路歷程)，來電目的純粹是表達她憤怒無助的感覺，我明，theropy session丫嘛。

故事發展是loop回文章的第三段「d字可唔可以放大d...改顏色，幫幫手啦...幾時有丫唔該？」

報酬丟那媽，計劃亂如麻。割蓆止蝕，怒出invoice，附加一句：再改，事無大小，逐次收費。

(又，坦白講，我非常明白點解佢地以前次次同freelancer合作做website都被人甩底或者反面。)

三月近況

以前做job唔係咁趕，除非某些specific 印刷相關的job必定要上疊之外，一般website 野遲少少，俾人鬧可以灑賴皮，嘻嘻哈講sorry 就過骨，頂多扮下死狗。

宜家好多job都唔得，唔係個客發老脾，而係deadline過左就無得追返。
例如星期一個客要出席某某presentation，你份draft 出唔到就可以收皮。
以前deadline遲左的理由通常都好簡單，就係自己懶 (或者太樂觀)，宜家未必單純係懶唔懶的問題，handle三五單project其中一單有變卦成個schedule就錯晒。

例如客戶A突然話deadline提前，客戶B諗到新idea，客戶C等左好耐好不安，想你「做左幾多都send來睇睇」(其實未做，只係deadline前兩日先得閒開波)。淨係想法子拉鋸、educate個客或者想折衷辦法都花唔少時間精力，試過有一日除左公事MSN同埋傾電話之外，朝早十一點開工去到夜晚七點後先有自己時間做野。

做time management 只係無咁大鑊而已，呢d變卦要爆出黎，一樣會整亂成個安排。你expect個design需時兩日，再估佢會改預多兩日，再預鬆一日突發，結果點呢？個客同你講無五日咁多，後日出個draft啦，要快，收線三分鐘唔夠，另一個客打黎，阿黑人，頭先唔記得同你講...

(你估我唔想請個人幫忙咩，有得揀，邊個唔想做老闆)

*********

近年真係唔可以挨咁多夜，因為挨完夜either 傾電話時唔夠精神，問漏野、答錯野或者應承左唔應該應承既野，或者唔夠ram 去諗d program 或者諗design點樣做，甚至完全無動力開工都唔係未試過。

同埋，就算訓得足，一個人最sharp既時間真係有限，有時一d明明好廢既溝通手續同電話粥，就撞正你最sharp果陣先至殺埋黎。幸好一般人對freelancer都有少少包容，兩點前唔接電話，佢地會以為你做到好夜三點不露 (唔到三點都唔露面)，咁樣先至有早段時間做野。

最福佳既，係你劃左十二點上床訓，但係因為之前兩日通左一次頂，個生理時鐘倒轉左，唔係話訓就訓。

********

菲傭終於返左黎，打掃一輪成間屋係乾淨左既。

話晒，當時我只係做最minimal 既家務，基本的洗衫洗碗，間中加送煮飯，有塵有污糟在所難免。

反而果陣最多做既，係多左行出廳check下阿麻點。

以前有菲傭在佢身邊轉來轉去，就算個菲傭吞pok都好，至少唔駛擔心阿麻有事。菲傭放假果排，真係耐唔耐就走出去望下佢點，無野講都搵一兩句野來講、開多d燈、開電視、倒下抽濕機d水(自從有抽濕機佢d風濕改善80%)、換下佢個暖水袋 etc，因為頭幾日真係試過佢太過悶，個人無乜心情，連血壓都暴跌。

最麻煩係阿麻八十幾歲人又懞唔晒，成日會擔心好多野，五分鐘前講好左無問題，話咁快又驚今日中午餐飯點算、晚飯無買送、隔夜送要快d食埋唔係就變壞、菲傭幾時返 etc，真係要有個人constantly在佢眼前揚來揚去抹抹掃掃，佢先至會安樂。

********

有左今次經驗，我係超佩服果d同我差唔多年紀，但係已經為人父母公私都打點得妥當既人。
果d做足三十個鐘唔訓，補眠幾粒鐘再踩三十個鐘既人，我真係做唔到。
再諗諗下，我自己30歲都開始覺得精力唔夠用，咁果d大我十幾二十年，有老婆仔女兼情婦既人又點挨既呢？照計佢地應該比我更加唔掂，所以要呻又真係輪唔到我，丟那媽，頂硬上囉！

********

最後，誠意推薦「中文解毒」，陳雲著。

睇左一半已經超慚愧，嘩，乜原來我d中文有咁Q多語病 (即使我正正經經寫文時都係)

其次就明白，中國或者沒有輸出革命，沒有輸出貧窮，但肯定輸出大量文字污染，內地的中文隨時差過香港，因為多水份多虛字，仲衰多錢崇洋，唐文英語化。本書個封面係一pack雞蛋，其中一隻個蛋黃有種不正常的紫紅，睇到就會心微笑。

Tribes, Seth Godin著。厄錢，佢講野有少少point既，但查實佢講的東西用一個blog entry就講得完，夾硬拖成一本書，又俾佢厄到。