星期五, 3月 14, 2008

不如上我公司丫?

繼續上次講的桃花運

女性朋友又約黑人出來請食飯。有人請,當然義不容辭赴約。但係背後有附帶的線 (strings attached),就係好神秘地叫黑人飯後上佢公司,而且唔好有其他節目。

古時候好傻好天真的年紀,黑人會幻想上到公司後,二人發生香艷的前戲,再來連場三級場面。然後問個女仔「我地即係算點」,甚至真係會蠢到去七仔準備安全器材。

只不過,黑人已經長大喇。

個女仔最初話自己做紅酒生意,但係黑人在一個場合中,偶爾聽到佢係做傳銷的 (公候伯子男爵果類),做酒的傳銷都無乜問題,只要唔係sell 我就得。

當晚,黑人面帶笑容,一直等緊佢開口講呢句話:「我陣間想介紹一個創業機會俾你...」

「機會我就遇過唔少,不過呢d錢,唔易賺喎。我上一次去過某字母品牌香薰公司既寫字樓,果位『朋友』都好想俾d 機會我,但係我差d打人,佢地先肯放我走囉。」

跟住佢行開左講電話,未幾,就有兩位美女同事咁橋收工落黎一齊食飯。同事A與B一位係親切大姐feel,另一位係可愛美少女。

又果然,佢地的策略都係十分類似:「係呢,阿黑人,你宜家做咩工呀?」

B:「哦...咁前境好唔好?每個月賺幾多?」

黑人為左交戲,將實況稍為潤飾,就已經present 到一個十分潦倒的形象。

A:「咁慘呀?我有個親戚呢,又係做你果行...佢地真係好辛苦架,又搵唔係多...二十幾歲,都係得果三萬幾,封左頂喇。」(當然啦,比起你段script所寫的月入十萬,係差好遠)

黑:「三萬幾已經唔錯,只要稍為識得理財投資,每月儲二萬,揀幾隻穩陣的藍籌,做到四十歲應該夠錢退休,身家仲可能每三五七年翻一倍添,六叔果個二百萬投資組合,即使近排跌到趴街,零四年到宜家都翻左一倍啦。」

A:(自知領野)「呀,又唔係既,佢要養家,阿爸走左,阿媽又無做野,所以都幾辛苦咁...」

黑:「哦,又真係幾慘。」

跟住不著邊際講左一輪,A拿出佢的道具:八卦雜誌,「隨手」翻到一頁講貝沙灣某富豪樓盤的專欄。

A:「呢位仁兄,係我地一個同事黎架,佢三十幾歲,做傳銷出身,白手興家,宜家買左呢個單位,好犀利呀佢。」

B:「黑人哥哥,你係咪唔鍾意傳銷架?」

黑:「(終於接近正題) 查實我又唔反感既,不過投資出去既錢,都要睇下有幾大風險同埋回報係點嘛。我有朋友寫program既,佢做過一個MLM member tracking system,接觸到呢類公司點樣賺錢。條formula 入面,頭幾個generation 係好大機會賺到錢,假設順利搵到下線,理論上係有十幾倍回報,問題係去到後期的generation 就慘喇,去到某個位,基本上要全香港九成人口都買佢地的貨,先至可以有足夠下線令佢地有利潤。小弟唔係數字人,唔記得實質條算式係點,不過呢d幾何級數的東西應該唔難計得到,因為咁擴展法,實有一個爆煲位,睇下邊個接炸彈嗟。」

黑:「你有無問過雜誌入面呢位師兄,佢係第幾個generation 既人呢?」

A:「errrr... 咁做人既野,又唔可以完全數字化去睇既...」

黑:「當時我都諗過,若果可以加入頭一兩代generation,查實都無妨擺一萬幾千玩下,問題係呢d公司又好容易摺埋,老字號果幾間又輪唔到我玩。回報係吸引,但係風險過高,我認為玩唔過囉。」

(再一輪不著邊際的閒聊)

B:「不如第日多d出黎同我地玩啦,我地遲d搞BBQ,你都黎啦!」

黑:「夾到有空檔一定黎!」

結果,上公司大戰連場的情節完全沒有發生,黑人就繼續好悶地過電車男生活。

16 則留言:

塞米一條揚陸轟炸機 說...

高招高招~~~拜服拜服~~~~~~


睇頭幾段,以為真係有野八卦野睇添,哈哈哈哈...

sun 說...

唔知係咪我個樣太七
未試過有傳銷美女介紹創業機會過我

嘿嘿

塞米一條揚陸轟炸機 說...

>唔知係咪我個樣太七
>未試過有傳銷美女介紹創業機會過我

+1 XDDDDD

Carole 說...

上咗去
唔方唔大戰

我呢一定係好惡死嗰隻
無人叫過我去

Yun 說...

係咪靚女來架﹖


(如果唔係﹐你都好得閑下播。)


(仲話好忙!)

米都話唔搞咯 說...

(如果唔係﹐你都好得閑下播。)


(仲話好忙!)

x2

Carole 說...

x 3

凱恩 說...

樓上幾位都係虛無中找重點的高手

傳銷我都"瀨"過一兩次
佢地俾個願景實在太ideal喇
香港人咁現實
應該好清楚無乜幾位可以卅幾歲白手興家買貝沙灣

俾我就會好想問, 「果位仁兄d錢邊度黎? 咪又係佢棵tree下面d人度黎?佢買到貝沙灣, 都係你地供佢咋~」

Morca 說...

X4

Chris 說...

勁啦你,一王戰勝三后



佢成日話忙咪就忙呢d囉~ :P

桃紅三點式 說...

x5

野蠻郡主 說...

咪就係…

黑人 說...

> 塞米 / sun

可能係黑人外觀比較笨實 (愚笨又踏實),所以先至成日撞到呢d 野

> carole

上左去,佢地幾個圍你一個,好難走甩架。

*****

近期本blog 出現留言交叉感染事件
好多交叉人,暫時至少有 x5 個發病者

Carole 說...

係ar
所以咪大戰囉
一定大打出手

係喎
我冇你電話嫁
係你office樓大叫??
明日又天后

塞米一條揚陸轟炸機 說...

黑人,我地係好朋友黎架嘛~~~我地都係為事業忙到爆既,無計啦......


所以呢.....................................








(如果唔係﹐你都好得閑下播。)


(仲話好忙!)

x6

bunny 說...

成篇都是笑料,很有趣+經典呀:D