星期六, 9月 06, 2008

零八年九月初雜記

1. 又中毒,今次連開機都唔得咁濟,宜家全力剷緊,上次中毒唔見左三四日,今個weekend 應該又凍過水

2. 就黎投票,可惜無時間留意,除左唔投大細眼同唔投藐嘴之外,唔知投邊個好。最初我覺得熟女團隊果個初熟團長唔錯既,keep得好又只係大我幾年,而且佢地個黨一向識present,點知睇完佢地今屆條promo,嚇到我連volume都唔敢開,望左幾個scene就關左。反而大細眼個黨條廣告做得幾好喎,四平八穩放在一堆甩皮甩骨裡比較,就顯得高章了

3. 用消去法,應該都唔會投老闆黨,至今佢地都未有野入我屋,不過就算有都唔會投,大家慳得一蚊得一蚊,好事

4. 白鴿眼太老,主要老在思維方面。連佢地自己都對個新人無信心,新banner改左做瑤柱撐羊心連任,新人今舖真乃西

5. 光頭教師、怪醫、四眼中女同埋動物,我應該唔會投動物,動物最叻係遊街示威舞龍舞獅,入左蠟會佢無得咁玩,而且唔覺得佢可以做到正經野。四眼中女被傳一向係尸位素餐,未查証過。光頭老師一直出唔到頭,背後有好多辛酸史,fine,入左去你想做乜?睇佢d宣傳品只見到一個憤怒中年,部署似乎麻麻,下屆先啦。至於怪醫小弟都不熟佢係人定係鬼,wiki一下先

6. Why So SERiOUS? 梁文道早幾日在明報的社論講中晒小弟的心聲:a.) 宜家個困局連特首都擺唔平,選你班蛋散入去立會作用不大。b.) 阿爺有組別功能,built in,剷都剷唔走,又食ram。c.) 真正的權力核心是大財團和地產商,佢地不用經普選洗禮就可以連任,有幾個係姓李的,其他似乎分得幾散下

7. 遲下經濟再轉差,應該會來一次二百萬人大遊行倒曾,但係倒董倒曾倒屎倒尿都唔會改到乜,因為倒唔到地產商大財團

8. 就算明知無乜大作為,都要投票。無謂讓媒體上有太多air-time 俾建制派的馬屁精廢up,我寧願聽「反對派」鬧下政府,純粹聽完條氣順d

9. 最近見到「活色生香」的新包裝廣告,進步左d喎!真係的起心肝走去抄日本仔,唔再玩bad taste 低手惡趣。

耐唔耐有d 奇怪entry 係search 活色生香而走入來小弟個blog,唔知當中有無佢地的marketing staff呢?我諗佢地下一步應該做online marketing,先要執靚自己d keywords,至少人地search 活色生香時會先見到佢地,而不是小弟n年前插爆佢地的文章。其次係在forum/yahoo知識等地方自問自答宣傳自己(不要俾人察覺,發現左會籮爆),仲有搞一些online 的campaign,價錢應該平過搞TVC或傳統print ad,效力亦更大。如果看倌真的是活色生香的員工或老細,得閒去網上廣告達人涼伯處取經吧!(幫襯佢地都可以,但小弟無收佣亦唔識佢)

10. 點解會覺得有活色生香的人睇過呢度?因為之前寫anyidea,上google 搵有關資訊,第一個彈出來的不是anyidea,而係小弟果篇「設計已死」。後來有關方面真係有回應過小弟 (估計佢地都落力做左唔少SEO等自己個網排名高返d)。而不幸地,佢地目前逐漸被小弟的預言批中,價錢越做越平,越來越少單,較有水準的高手都離開了。

11. 今年年底comic world 同rainbow gala 互撼,故意在前後兩日一齊擺展,苦了一眾同人組織,又要俾貴租,又無咁多時間精力連踩兩個event。Rainbow的存在是好的,逼comic world進步,今期comic world想逼到rainbow 收皮,損人利己,無晒風度分,對大圍環境都不利 (同人圈有幾多錢賺呀?大家係上市公司就話嗟!)

12. 公司樓下開左間韓國人私人會所 (聞說韓佬的私人會所 = 雞竇),有時做到半夜3,4 點都聽到佢地唱k,都係好事,至少知道自己不是大廈內的第二生還者 (第一生還者是看更阿伯)。

13. 半夜在銅鑼灣大街搵地方醫肚,有時都幾感慨,點解成街都係香車美人夜夜笙歌,而小弟就做到有今生無來世為乜?

14. 呢排挨到好殘,就黎可以代表港隊參加殘奧

8 則留言:

ah-yun 說...

喂﹐未死喎。

^^

Ka Yue 說...

票投社民連~

鬧下政府都好。
http://hk.youtube.com/watch?v=o_gWaDh6R6o

匿名 說...

為乜呢個問題我最近都成日諗,無論是在工作還是在學習上,或者多想一點事件過後的結果,個人會開心ddddd呢!

你保重呀,希望你部電腦唔好再中毒啦!

凱恩 說...

黑人,你係咪用黎正版防毒? 有無興趣夾份買個卡巴斯基 multi user licence?

黑人 說...

> 雲妹子

係呀,未死住

> 家儒

如果毓民選港島區我會投佢,阿牛就難d

> sze

我諗到的過後結果通常好灰喎,係好現實的灰,所以少諗為妙。

> 凱恩

可以,但係多人版卡爾巴好似係3 user license,仲有一個搵邊個分?

凱恩 說...

>黑人

ck嘛!

Elaine 說...

夜晚落新光食宵夜,見到個個帶金Rolex,我帶膠Relax... ...

黑人 說...

> elaine

我連膠Rolex 都冇...
唯有努力工作,try my breast 啦