Politics for dummies?

如果有一個網站，可以archive 各候選人4年前甚至8年前的政績對比，方便選民了解，認真功德無量。

再如果有一個網站，可以將味如嚼蠟的政綱，化成跟簡明易懂又貼近生活的撮要，加上系統化的tag和伸延閱讀，讓一眾政冷感老中青有需要時可以迅速recap，多好。

既然有openrice，點解唔可以有openpolitics 呢？(又，查實好似係有個獨立媒體做緊類似的事，甚少上，慚愧)

會考都有精讀本，點解時事不可以？香港人一生習慣精讀貼題目，用同一方式陳述政綱，會否事半功倍呢？

好老實講，一般打工仔甚少留意電視新聞，返工無得睇，放工無心機睇，除左的士司機大佬外，好多人公司連收音機都唔俾開。大多數人接觸時事的窗口可能來自朝早一份免費的七點半或大都會，烏下烏下都係睇睇有無令人提神的花邊新聞，未必有腦汁留意「前早餐派反對最高工時」，即使望到，佢可能無follow 開咩叫早餐派，最高工時是利是弊，亦無法在短短百餘字cover得到，6蚊一份彩色報紙可能為包紙巾同風月娛樂版，大家都知不同報紙會講不同的大話，每年71遊行人數某一家報大，另外幾家報細，無邊份信得過。政冷感，並非一朝一夕。

不過，返左公司，大家蛇皇會走去逛下forum 睇下blog (或者youtube)，呢度其實係一個好龐大又未被充份開發的溝通渠道 (2.0 世代我不稱之為宣傳了，宣傳是單向活動，溝通卻可以有comments, tags 及相互 rss feed)

例如，一個3x歲的老闆仔覺得現在的租好L貴，強積金好L厄錢，員工要求最高工資最低工時，佢應該搵邊個？點搵？有事要搵白鴿眼，你信嗎？黑人相信一般人會選擇搵車公耶穌基督釋袈矛尼梵天齊天大聖，自求多福是也。

如果有一個時事的archive，至少該名老闆仔可以了解下各種問題前脈後絡，甚至如果個網的互動性及知名度足夠的話(即係政黨人都會上來發言及索料)，佢可能可以在網站中直接跟政黨接觸。

平台立場可以偏頗 (事實上邊可能完全中立？)，但同樣可以為各黨派提供一個發放資料的渠道，講真泛民亦有害群馬，霸住個位靠抗議靠soundbite 尸位素餐大有人在，兩個黨的地區工作攤出來一比，原來建制黨在某區幫過唔少新移民家庭，同區泛民得個up字，係人係鬼清楚晒。

我知係9up...我明係說易行難，講下嗟，犯法呀？(黃子華語)