電車男派對求生指南

首先，我絕對認為落機舖挑機玩20元Gundam DX 或Seed Destiny 或者Gundam vs Gundam 比任何派對都好玩。

又，我認為夜晚11點落街跑步兩小時比去派對有意義。

我覺得最好飲的酒，有三種1.) 家庭聚會打邊爐時用coffee mug 裝的不知名紅酒，大家怕難度又年紀大了，所以會買比較fruity的口味 2.) 朋友聚會時的Bailey's 或者Icewine，多多都唔拘 3.) 大啖拉麵時手上的殺破狼 Sapporo。因為小弟完全不黯酒味，好不好喝唯有視符場合和身邊的人。

空閒時間除了練跑，我會選擇看VCD, 去漫畫茶坊、畫公仔或者睇咸碟，絕大多數的派對都不能做以上行為。

綜合以上四大理由，先天上黑人無論去甚麼party都覺得不吸引和悶，去蒲更加死多兩錢。

有這個前設，要去party通常只有非去不可的俾面派對。

看完C+的case study，心想都幾大鑊，事關自己在多數的派對都會屈埋一二邊淨係同朋友傾計，尤其去蒲的話更嚴重。

經過多年慘痛經驗，毒男宅男電車男們若逼不得以困在一個陌生環境應酬，有幾招或能保命：

1. C+ 個博有些高手都講過，耐唔耐扮在不經意四圍行下，當然不要好似孤魂野鬼咁不斷飄 "Dave, did you notice that wandering guy or it's just me seeing things?" (衛哥，你有無望到果條友飄來飄去，抑或係我陰陽眼？)

2. 搵d比較友善的異性傾計，如果唔知邊個比較友善，先試下向樣衰果d埋手 (係好現實，無計，鬼叫你甩唔到身一定要來)。

3. 開場白99% 都係微笑 hello 我叫乜乜柒柒你點稱呼，之後呢招一定要學，美國名嘴Larry King教既，不妨先自嘲破冰：「唉，我呢挺電車男，落到黎呢度衣香鬢影硬係唔自在，你睇我著到咁薯就知我唔屬於呢度架啦。」 Larry 訪問過無數大人物，鏡頭下千百萬對眼望住佢，唔緊張有鬼，佢劈頭就直認不諱 Tonight I'm really nervous，講完之後反而應對如流。如想睇全文，可以睇下佢果本How to Talk to Anyone, Anytime, Anywhere，學到一招半式已經好好用。

4. 下一式，都係Larry King 教既 (印象中係啦，無書在手，又係多年前的事了)，唔知講乜，最好引人地講自己，King師傅教落，人人都鍾意talk about themselves，天下間無一個題目比呢個更加universal，放諸四海皆準。「係呢，睇你打扮，你係咪果d好低調既上市公司主席？唔係？咁你做乜架？今晚邊個請你來？ etc etc」

5. 我以前成日唔明點解boxing賽事d 拳手成日要擁抱，原來係一個爭取喘息機會的技術動作，假如對方肯同你講幾句，不巧講完無話題，你又諗唔到點介紹自己身世時，最好就係講下你朋友 (假如佢站在你身邊的話)，如果佢不是忙緊，yap 佢過來介紹下然後借斟酒或向廁所遁逃，咁你可以稍為回氣組織思路，等你個朋友同對方擁抱下。

6. 呢個唔係一個招數，係禁忌，通常毒男宅男們的口才較弱，千祈不要懶幽默！無把握的話，不要隨便講笑。黑人自己以前試過無數次懶醒講爛gag，跟住dead air 三秒鐘，大家繼續傾計當我無講過野。切記 Act natural，如果你既natural係緊張，就由得佢緊張好了，一般心地正常的人酒過三巡會笑笑口勸你relax，友善但拘謹在某些人眼中是可愛的表現，至少多數人不特別討厭就是，好過明明係老處男，偏要扮情場聖手，其他人不是傻的。

7. 無論幾唔捨得，要不時switch 去另一group人，或者break 開等對方跟其他人交際，吊靴鬼痴死一兩個人係禁忌之二，break 開飲兩口悶酒，望下有邊一pair 人傾得過，或者打開手機扮覆緊SMS都好，總之唔好全場跟實一兩個人。

8. 止蝕：因為party重來都不是你的對應地形，總之做完大龍鳳，湊夠quota跟足夠的人social 過，時候又不早了(ie. 10:00 pm 或以後)，拿拿林閃人啦！你玩得開心又另計。