星期二, 2月 17, 2009

舊同學聚

不打算去。

人比人自卑係一個理由,但不是全部,頂籠佔一半。就算我突然發大達拿埋廣告金帆獎漫畫新人獎特首金紫荊都好,一樣唔想去,唔想聽人曬命,亦唔想曬人。

通常呢d聚會場合都係悶到震:十幾年前已經無乜兩句,十幾年後突然間會好多野傾咩?之前去過幾次舊同學聚會,一係聽佢地呻自己點慘 (哎也,蝕左幾十個,雖然係閒錢,都肉痛丫嘛),一係就聽佢地的搞笑野 (嘿,我公司個老闆,勁搞笑,佢每日八點鐘一定返到公司,唔早唔遲,你話係咪好好笑丫哈哈哈哈)

仲有,就係會收到好多唔係好熟既舊同學乘機派紅色炸彈,低手既會即場派,一般會當日問你抄電話地址,然後再派。挑,十幾二十年無聯絡,好熟呀?無飲野下話?分分鐘你娶邊個我都未必望得到,你個準老婆/老公對在下只而言係一個概念,小弟最怕概念股。五舊水人情我去和居和居刷返餐燒雞串好過啦,飽到嘔都得。

最後一樣,都幾煩既,就係a原來唔妥b,b又同c曾經行埋過,d係離左婚既第四者之類。查實現在搞blog友聚多少都有類似問題,根據六度分離定律,每次聚會不能多人,否則總會有死對頭組合出現。

大家分道揚鑣咁多年,興趣視野朋友圈都超級唔同,當中有好多人假如唔係舊同學的話,根本無興趣同佢傾計,大家無乜共通話題,勉強講股票時事,對方都係勉強答。假如要keep in touch,facebook或多或少已經keep左,你知道我未死,我知你仍在生,夠了。

真係想keep in touch 果班人,查實十幾年來一直有keep,有心的,自然會想法子聯絡。亦都乘機感謝一眾舊同學仲記得小弟,前生修到。

大堆頭式的同學聚,thanks but no thanks,玩得開心d。

老爸果隻圓滑,自問一世都學不來,公司全棟大樓千幾人上下一致通過開先例同佢慶生,個extended network要好勁先至做得到。

**********

題外話,連d機友都開始一個二個結婚擺酒,第日可能連機舖都無得蒲囉。

6 則留言:

匿名 說...

勁有同感, 成晚真係好難捱的, 其實十幾年無見, 再見真係唔知有咩好講, 特別係自己覺得無咩(成就)好同人講既時候 (當然, 結婚都可以係一種成就黎既 =P)

十幾年攪一次會有興趣去下既(如果相熟既都會一齊去), 8掛下大家近況, 都可能會聽到d好笑野, 成日攪都無意義啦

yuenyuen

Betty 說...

甘你要快D 结婚, 一次过赚番晒D 人情返来啦!

黑人 說...

> yuenyuen

結婚當然係一種成就啦,不過同席大把人結左婚,到時又要比拼邊個既BB大得快d,邊個層樓抵d,邊個家務辛苦 etc

十年搞一次都多謝了,以前在學校都唔熟的話,無謂夾硬扮fd啦

> 小瓶子

賺左人情,蝕左個人咪得不償失?

匿名 說...

蝕左個人咪得不償失?<--可能係你賺左個人或者二個三個...

小星

Betty 說...

甘聚会时, 你可以讲下你响BLOG度写嗰D 有趣话题嘛, 不用下下都同人比较0既...

陳大文部落 說...

舊同學,聚咩吖,老實講,真係衰啲講句,人地發左達,咪又係替人高興,聽人地大談『我的成功之道』。

人地無嘢撈,又鞋口鞋面,訴苦大集會,聽左又幫唔到乜嘢;同樣,如果自己好境,講生活品味,又會刺痛別人,大家都無癮。

我自己而言,最怕係聽人地成功之道,好怕人比人,尤其是果啲卡片,吹到好高,好似個個都係成功人士,果一刻覺得自己忽然一事無成,人地點成功, sorry 我無乜興趣知,我也沒什興趣『和大家分享我的心路歷程』,自問都是人一個而已。


係老友,已經係老友,因舊同學聚會而成為『新朋友』,唔係無,少啲囉。