星期二, 5月 27, 2008

直銷迷魂記(三) ---附FAQ

最厲害的大話,係9分真話夾1分似是而非。第一堂「創業之路」的課堂精華,黑人且為大家筆錄,頗長,先感謝大家的耐心。

上半部係一個上左岸的新移民上線分享自己的得救見証,當然少不了show自己的神跡:早兩日以數萬元買下的一款名錶。下半場由一位前稅務局公務員主講(現為星級公爵),此人頭腦清楚,說話淺白動人,稍有學歷的不會覺得白痴,沒有學歷的也能懂,而且懂得向聽眾問問題搞互動,絕對值得學習。

****** 講課內容分隔線 ******

MLM (multi level marketing) 多層推銷是甚麼?

傳統銷售模式裡,一件貨物要從廠家去到用戶手中,須經過以下的途徑:
廠家 > 運輸/物流 > 批發 > 代理商 > 廣告商 > 零售商 > 用家

MLM 屬於第四代的銷售模式,將過程大幅簡化
廠家 > 運輸/物流 > x領 > 用家(網狀擴散)

由上表可見,MLM節省了大量金錢成本,而節省了的錢去左邊?大家知道嗎?
就係每一位加盟的分銷商手入面喇。

MLM 入面,每一位分銷商都可以向其他用戶發牌經營,其實呢個發牌分銷系統(黑人按: franchise)大家都唔會陌生,例如麥當奴、7-11、小肥羊、KFC等等。

不過佢地的發牌系統就十分唔著數喇,例如某甲加盟開左間麥記賺到錢,就算佢叫某乙買牌開一間麥記又賺大錢,收益都去歸返母公司,某甲根本無著數。開麥當奴大家知唔知要幾多錢呀?唔好話麥當奴,就算係開一間茶餐廳,閒閒地都講幾二百幾萬,又要舖租、請伙記,搞九個月都唔知有無得回本,你估開茶餐廳容易架?開麥記、7仔就仲大鑊,未開舖先要俾一大舊錢買牌照。

MLM就唔同喇!每人發牌可以跟公司拆賬獲利,仲要係你7成公司3成喎,邊度搵呀?我地無舖租無其他雜費,銅鑼灣三間公司既租唔駛你地俾錢,輕裝上路,成本係咪無佢地咁貴?(眾曰:係!)

接下來,就要為大家解答一些做亮xx常遇到的難題:

1. 無朋友
我地有好多公爵候爵,初初移民黎香港時有無朋友呀?朋友點黎呀?都係識嗟係咪?我地個團隊會教你點樣去識人,點樣見多d人,根本唔成問題。


2. 無時間
好多人話無時間做,但係洗錢又有時間喎!唱k、打機、睇戲、沖涼dup骨乜都齊,偏偏無時間賺錢?好多人都嫌份工佔左好多時間又無前途,宜家我地呢度有錢搵有前景佢又縮沙喎,你話d人咩心態呢下?(眾笑)

3. 無錢
拿!我講清楚先,如果我有個內地朋友,今日打電話俾佢,佢三個月後先上門加盟,話係行路黎香港既,我會叫佢先搞掂兩餐先(眾笑)。一個成年人,五千蚊俾唔俾得起呀?呢度有無做生意既朋友?(有人舉手) 如果你見到有商機,想創業但係唔夠錢,你會唔會想辦法周轉呀?做生意有邊個未借過錢?你諗下一般傳統創業,你借果d錢有幾多俾左包租公?你係咪幫緊佢打工呀?我地呢度有一個良好制度,有一班人走過呢條創業之路,証實係可行,有錢賺既,先至會叫你投資,擺明蝕既邊個做呀?

4. 無興趣
大家打工係為錢定係為興趣?有邊個係為興趣請舉手?(無人舉手)你地都算好呀,之前一堂有個司機大佬,八千蚊一個月,包頂頸話係為興趣喎。咁我問佢:「你一日渣幾耐車?8小時?好,既然你為興趣嘛,咁我俾你渣到16小時,人工減到4千蚊,雙倍時間喎,夠興趣未?佢立刻啞左。」各位,打工梗係為左錢啦,我地呢度就係俾一個平台俾大家,幾年賺十幾年的錢,辛唔辛苦?梗係辛苦啦!興趣留返搵夠錢退左休先至慢慢黎啦 (眾呼采)

5. 無口才 & 6 無信心
有邊個一出世識講野?如果生個BB出來佢突然同你講:「喂你好放低我喇喎」嘩下,識講野既BB,怪物黎既,整死佢都黎唔切啦!無人一出世就有口才識sell野架,大家睇下x姐、y姐(一位做酒樓樓面,另一位洗廁所的新移民) 連廣東話都講唔正,仲有呀z姐,字都唔識睇,佢地都可以上公上候,你地點解唔得呀?「朋友你叫乜名?」(指向黑人身邊巴基斯坦地盤佬) 「大家俾d掌聲佢好唔好呀?巴基斯坦黎既都唔驚,你地驚咩呀?」

信心點黎呀?係咪好似口才咁,係後天培養出黎呀?就算你無信心,無口才都好,我地呢度既團隊會點呀?會幫忙培訓你成材為止,我地MLM最大優勢就係咁,有一個不斷增大既團隊在後面支持你發展,係咪呀?(係!)

7. 產品貴
有人話我地d產品賣得貴,大家知唔知咩叫品牌效應呀?同一罐可樂,百佳賣3蚊,7仔賣6蚊,茶餐廳賣10蚊,半島酒店賣50蚊,係咪同一罐可樂呀?(係!) 有無人走去半島酒店話佢賣d可樂厄錢呀?點解會咁呢?就係有個品牌幫佢增值囉,我地公司成立左9年,正規經營,宜家永久代理LB亞洲銷售線,係咪有個品牌響度呀?價錢貴就係貴左呢度係咪呀?(係!)

8. 不是必須品
大家除左衫褲鞋襪同埋兩餐之外,有咩野唔係必須品呢?銀包係咪必須品呀?你可以袋晒落個袋度喎,有無朋友食煙?煙係咪必須品呀?係?你問下身邊唔食煙的朋友煙係咪必須品?呢個社會每日都有好多人買緊一d唔係必須品既野,大家都係想改善自己生活質素係咪?有邊個唔需要健康呀?如果我地呢隻空氣產品,可以為你同你家人帶來健康,係咪好大市場呀?

9. 市場飽和
好多人都會講,喂你地個網絡咁擴展法,好快就會飽和喎!首先我想講,每年有幾多人移民黎香港?每年都有好多人畢業投身就業市場係咪?我地既人口係咪不斷流動呀?大家係咪每人都有一部手機?有幾多個人用緊我地既產品呀?唔多,係咪?咁手機同香薰邊個先至係飽和呀?仲有,你部手機會唔會換?會唔會壞呀?所以除左開新單之外,我地仲會有翻單既生意,係咪?另外,我地宜家開拓緊大陸市場,上面個市場有幾大,係咪有排都未開拓完呀?

10. 賺朋友錢
如果你開一間餐廳,會唔會在招牌寫住「不準朋友光顧」?唔會咁傻的,係咪?朋友來幫襯,你都係均真做生意,一樣咁計數。唔通佢食完飯,你收佢錢就係厄錢?有邊間餐廳唔收朋友錢既你話我知,等我去做佢朋友,帶埋成村兄弟去幫襯 (眾笑) 咁我地做呢盤生意,正規經營,同朋友傾生意,係咪要在商言商,傾得清楚呀?咁先至係專業既表現,係咪?

11. 國內不合法
點解國內會將傳銷當作不合法呢?因為國內之前傳銷業發展得很太篷勃,乜都有人拿去sell,甚至有人在牆上刮d粉落黎又sell,情況開始失控,於是政府唯有一刀切,禁止傳銷或多層推銷活動,只可以由sales直銷賣貨俾客,係咪無左個網絡效應呀?

宜家中國政府立場係點呢?之前有篇報導(黑人分左神聽唔到):國家宜家會「摸著石頭過河」,一步一步慢慢來。最終中國會開放佢地個市場俾我地,不過係一步步咁黎ok?佢地見到MLM在歐美日本都行得通,宜家我地都開拓緊國內市場,以香港為基地,最終大陸都會同國際接軌的。

12. 朋友做過唔掂 & 13. 100個人有幾多個得
你身邊有無朋友俾老細炒魷呀?例如呀x姐個洗碗同事被老細炒魷,大家會唔會話飲食業厄人呀?每個人在呢個平台,有幾多成果係咪要睇自己呀?返工唔努力失敗係咪好正常呀? (第13點佢含糊其辭,黑人亦不太記得了)

14. 問下朋友/屋企人先
大家剛剛加盟時,我地係咪叫大家唔好同身邊d人講呀?就係因為大家未夠了解,未清楚盤生意運作,俾家人問到口啞啞,係咪令佢地擔心呀?「車,厄人既,你咁都信佢?」而且初期身邊總會有朋友親人俾說話你聽,佢地可能出於好心架喎,不過就係打巢緊你,對業務發展唔好的。而且佢地未親身了解、未做過,居然可以話返俾你聽盤生意係點,係咪好搞笑呀:「拿呀仔,我就唔清楚佢地搞乜喇,不過係厄人既。」(眾笑)

15. 返去諗下先
我成日聽到呢一點都覺得好奇怪,有咩係公司度了解唔到,但係返左屋企反而了解得到呢?通常咪又係返左去問屋企人。結果會點?我之前都講左,就係俾一d 唔清楚、一知半解既人影響你的諗法?


******* 下課分隔線 *******


即使受過邏輯訓練,擅於語理分析的朋友,一時三刻都未必拆得晒咁多招,仲要當時係播緊強勁節拍的dance music、大家附和拍掌情緒亢奮。講者習慣透過一些positive 的反問,令大家下意識習慣左去認同佢的說話,記得有一次佢講左句反話,大家都反射性地答「係」,搞到佢自己要補返鑊。

另外,唔好忘記,當晚的聽眾教育水平並不是十分高。

課堂足足三小時,下課後仲未完,羊牯們立刻被押戒返公司舉行屠宰大會。首先新移民酒樓大姐候爵對住同學們講自己的發跡故事,然後拿自己本銀行存摺俾人睇佢近兩年的收入 (每月平均8至12萬),經大姐中央處理後,羊牯們再回到自己的上線小組接受屠宰。

第一日上門時,上線會叫你平平地五千零蚊加盟,不過到左今日就會改口風,叫你加大注碼投資六萬幾至十四萬不等,如果閣下透露過自己的經濟條件不俗,更會鼓勵「套架」,一次過買四十幾萬的貨。

突然要拿十幾萬,大多數月薪幾千蚊的人當然做不到。呢個時候每個小組的「大頭」就會教你向財務公司借錢投資:「頭先講師都講過,創業搞生意邊個未借過錢?借去fing、去賭就唔好,周轉黎做生意就值鼓勵喇!

上線仲帶黑人四圍問其他「伙伴」,原來每人至少都六萬幾起步,癲果d甚至二十幾歲借屋企人四五十萬來較飛,當晚巴基斯坦朋友不幸地都同意用六萬幾銀開始。

玩到呢一步已經過左comfort zone,想再聽多一晚課堂已不可能。西裝友搵左佢的上線「大頭」向黑人落嘴頭。黑人話自己有些少股票可以放,但係要隔幾日先有$,跟住個「大頭」就言重深長地講:「你買的係好股票既話,梗係由得佢長線升啦,唔好隨便放左佢。借錢俾果少少息,反而仲好,我有個安信好兄弟,你聽朝請半日假辦埋佢得唔得?

跟住黑人講左幾個理由拖佢,睇下佢會點答。佢十分concern 地講:「因為呢,個agent要入一樣叫TU既野,要中午十二點前入既,聽朝佢會得閒,之後兩日weekend 佢未必得,無咁好。」(頂你,我都係咁樣hea 走我d客,我點會唔知你做緊乜?)

西裝友招殺著反而make sense喎:「拿,你聽日搞掂呢,第日你可以同人講,我第二堂都未上就已經投資落黎,說服力強好多,到時仲叻過我啦,我都要上晒兩堂先決志。你信我,我最初都係投放左六萬幾,第一個月已經搵返,呢條路我行過,我做左三年,我知道條路點行。如果我還唔到,仲點可能做幾年,做到上候挑公呢?就算我地保守d做,三個月一定搵得返,三個月發三個牌喎,點會做唔到?

查實當時最簡單的脫身方法就是play ball:「好,我聽朝儘量問下老細果邊請唔請得假,請到的話我十一點call 你再約地方好嗎?

當然呢個假,點問都請唔到。


******* 感想分割線 *******

1. 查實MLM搵唔搵到錢呢?有一撮人係搵到錢既。朋友A的母親以前經營另一間公司的層壓式傳銷,最高收入都試過七萬幾銀。不過呢d錢好多時只係公司割左你成隻腳,再分返件小腿俾你。以38伯爵為例(38即38%拆賬率,其實是誤導,見最底伸延閱讀),黑人要投資6萬3,然後再厄多5個人投資6萬3,先至可以回本兼賺返幾千銀水腳,呢盤生意係咪好難做呀?(係!)

DCxL經營左9年,公爵候爵的數量應該遠遠不止此數 ,証明有相當大部份的人退出或者無法晉升 (既然無底薪,應該都係quit左架喇)。

2. 黑人相信如果夠黑心的話,身邊有些人會中計的,如果唔搞身邊人就要向一些教育程度較低的人埋手先至得。不過呢班人中左計之後,以佢地的能力能否搵到下線羊牯呢?機會不是太大囉,換言之又係做得幾個月一兩代,之後欠落一身債 (因為未翻晒本),個朵臭晒,風險太大。

各位blog友網友太醒目,好難埋手,十居其九都可以輕易在網上搵到唔少數碼皇冠的黑材料。

頭一日有位講師都試過向黑人派一些頗lame的定心丸:「黑人你都有上網架可?」「少少咁啦。」「網上都有d唔好既流言,大部份都係其他非法既公司用來中傷我地既,你諗下,我地做左9年,合法經營賺到錢,佢地又點會唔眼紅?最簡單打擊你的方法就係搵人寫衰你,係咪?早排咪請左幾個大陸人落黎示威囉,不過你唔駛理會呢d聲音,做好盤生意就夠。

3. 點解無差人取締呢間公司?因為每個羊牯都要成立一間有限公司去接貨,亦即係講師提及的franchising,閣下與亮xx之間的金錢往來都只係公司與公司之間交易,並不犯法。甚至佢地的年報上每年得獎的公爵候爵,都係用返自己公司名義獲獎。

西裝友不斷同我講:「香港地,打個電話15分鐘差人一定到啦,如果我地厄人犯法既,開咁大個office搏拉呀?」黑人絕對同意,如果唔係諗過度過有灰色位可以走,又點會做得咁揚呢?

4. 亮xx的產品是否流野?坦白講個product 本身無問題,市場亦如佢地所講,係可以好大。不過問題出在佢地的經營模式並不健康。可口可樂要增大銷量,會透過不同的宣傳營銷策略令人養成飲可樂的習慣和意欲,而不是tum人買十幾萬罐,半年後再收佢存倉費囉。

5. 西裝友是否壞人?黑人不信佢係壞人,反而覺得佢either 信左一套扭曲的價值觀,或者佢已經睇到好化,當係遊戲咁玩,純粹係從遊戲中獲取最大利潤。換言之,測謊機未必測到佢講大話,因為佢講緊佢相信的真話,或者佢講緊真相的某些部份。

6. 洗腦威力有幾大?如果留多兩個星期,黑人應該信左佢地套野。人性總有些弱點,無論閣下意志和識見有幾強,總有失守的一日。尤其喊口號及大量集體活動,再加上長時間浸淫在一個無乜時間感的環境,確實會wear down一個人的獨立意志,情況跟奧姆真理教差唔多,佢地當年都有科學家同專業人士加入喎!

好,無聊完,講完故仔,又要繼續搏殺 (証明我都係工字不出頭,跟十萬月薪無緣)

(全文完)


******* 伸延閱讀分割線 *******

LB 的晉級及拆賬方法,所謂38, 41等等的稱號都是錯的,實質拆賬率並無咁高,講師提及的7/3分賬,更加只有幾個人可以享受得到


某網民6個月在LB的收入

28 則留言:

Justin 說...

你寫咁多,怕唔怕比人滅口呀??

建議你搵三點備案先,如果你一個星期唔蒲頭,到時又可以出A1。

e 說...

嘩你呢個entry超精彩囉……簡直應該永久置頂,造福萬民。

我讀緊中學果時都有朋友帶過我上亮X思,上面班人有好多真係好識講野,我留左係果度成兩三個鐘,都愈聽愈心軟。但之後走左一落到樓下又突然好清醒喎,完全有俾人洗腦o既感覺囉。真係少d定力都唔掂。

匿名 說...

黑人好厲害喎!記得咁多野~

LB~想當時我細佬都決過志,結果佢無問財仔借,問左阿媽借,而阿媽因為怕佢問財仔借,所以借左比佢喇!結果點?結果我細佬最後都係踏踏實實搵份工做囉!!!!

而我,其實唔多唔少都去過呢d講座,實不相瞞,我都做過羊牯,不過當然唔係萬萬聲果d啦!我不否認有人真係做得到,不過呢行的確唔係個個都做得到的,例如我.

BTW,佢地既presentation skill真係好好,避重就輕,意志好似好堅定,實搵到咁.

但我都覺得奇怪,既然黑人都唔係有心要做既,點解當初又會上去聽佢地既講座呢?

說...

你好啊~剛剛有會員張貼左你個板板~~

睇完覺得好精彩~

本人都係lb o既受害者~當時我朋友扼我上去~
真係聽兩聽就信哂~矣即刻比左5360出黎~

不過第二日就冇去~之後更加冇做~
因為我同我男朋友講左~佢話我個fd扼我~
其實我真係唔信架~後來唔想做都冇諗過退錢~
因為佢話比5360出黎係買個牌~但係有5000蚊o既貨送返比我地返屋企試用~
咁我唔做~個牌都退唔到~之後就閣疊左1個月~
唔知點解有一日心血來潮上網搵呢間野o既料~
結果就梗係知我比我個fd扼左啦~
而我都叫佢比返錢我~佢話冇得退~得貨~
最後都係搞左好耐先拎得返一半....

不過冇左咁多錢就梗係心有不甘啦~之後我就o係呢個板度做板主~教人退錢喇~
http://www.hkmensa.net/forumdisplay.php?fid=404

我叫jime~ nice to meet u黑人

ah-yun 說...

哇﹐你帶左個recorder上去丫﹖我好乖呀﹐睇晒囉。

美國曾經都好興呢D架。(可能而家都興﹐間唔中都聽到下。) 我係中學時朋友帶我去過。詳情真係唔記得lu﹐(中學喎大佬!) 但我記得我好清醒下﹐一D都唔動搖囉。其實咪就係靠扼人join攢錢唧。扼人越多咪攢越多錢囉。加上﹐真係好似返教會咁囉。覺得好好笑。

英倫肥龍 說...

段 FAQ 超強! handle objection 部份值得重溫又重溫...睇完睇怕要出番本叫【顧客不能說“不”呀!】既書呀!

呢類講座,其實都聽過,真係眼光光,心慌慌! ==3

說...

我嗰時都試過俾左幾千蚊,學你咁去「尋幽探秘」,得出既結論/經驗同你差唔多...但嗰時一開始上去,佢地仲會要收起晒我地啲餏呀、電話咁,直到你肯join至會俾番放你走...而家仲有冇咁做?

凱恩 說...

米>>
應該就唔會收起你電話既,不過你想走果陣佢地會不斷反問你「點解你無興趣?」「你有咩野考量?」「點解你要返屋企諗?」之類黎令你無法招架,當年我上interxxx就用左呢一招:

我:「我諗我唔join喇,拜拜。」
眾:「點解呢?係咪你有咩難言之隱呢?我地呢度好多人都可以幫你架喎!」
我:「我無興趣。」
眾:「點解呢?你無興趣賺錢咩?」
我:「係。」
某人:*狐疑*「唔好玩啦~邊有人唔鐘意錢架?」
我:「我想問你叫d人上黎決志,成功率大約係幾多呢?」
某人:「都好高架,大約9x%架~」(唔記得確實數字啦)
我:「我咪剩下果n%囉。得閒飲茶啦。」

由此可見,我d口才可能係迫出黎既…

------

講返轉頭,板主上呢堂講課令我諗起九品芝麻官既包龍星…真係勁。

Elvis 說...

點解你可以咁得閒, 有時間做埋咁多無謂野, 都唔媾多兩條女?

Elvis 說...

橙,

你d 口才超強, 笑爆我

ah-yun 說...

噢﹐好重要既唔記得問﹐呢﹐你個西裝友朋友仔係唔係好型仔架﹖(如果唔係點會咁呀~~)

乜唧﹐問下之嘛~~

Rosie Yip 說...

小妹第一次拜訪貴blog,真係覺得十級精彩!
黑人能夠智退西裝友,保持清醒頭腦,固之然要擊節讚賞!但傳銷課程o既講師更加係令人五體投地,佢篇speech 絕對可以成為教材呀!!!

Elvis 說...

Yun,

你呢排好渴咩?

黑人 說...

> justin

已有記者打電話來投訴我太無聊,放心。

> elizza

感謝欣賞!澳門的亮xx還有一個月就會被政府取締了,不知香港會否效法?

> sze

我估我個腦專用來裝d無聊野,原來抄的notes 只係得15個point,內容全部靠記憶轉述

我當初有幾個原因上去:
1. 呢個sales好似掂d,睇下佢點法掂法
2. 尋幽探秘
3. 無聊
4. 想體驗下洗腦班有幾勁
(其實3解釋左一切)

> 雲妹子

我真係靠記咋 ~ 係咪好無聊呢
呢個sales 本來係體育教師,以前係香港青年軍打劍擊的,睇得出以前好fit,宜家有少少生意人的脂肪,不過咁樣襯西裝先至顯得事業有成。原來佢d 臭史都有人揚過,靠逼d下線俾錢慶祝生日又賺幾十萬買左架三手法拉利

> 南區肥龍

係呀,所有angle 都cover 晒咁濟
而且有幾大部份係事實,不過套落去解釋MLM就變成曲解嗟

> 懷

謝謝!希望多d人睇到啦。你不妨問下有無人有興趣現身說法啦,因為可能有記者會做專題。

> 米搞

查實差唔多。無乜變過,令我失望既係...我以為佢地轉營賣實貨 (咁係健康的跡象),原來無呢回事,主要利潤來源依然係靠發franchise的牌照人傳人喪屍食人城。

> 橙

強!你咁灰的回答,完全超出15點FAQ之外,九成九的「分銷商」應該唔知點答你

> elvis

你知我咩條件架。我可以吸引到20間傳銷集團拉攏我加盟,都未必溝到一個女仔啦。人生要無聊下才不致白過。

> rosie

講真,個課程幾值得去一次。
我有個fd 係senior marketing,佢聽完我講之後,第一覺得我d sales skill 強左,入去佢公司做應該會變top sales,第二就係佢甚至想叫佢d sales 走去報讀

(立刻喝住佢,萬一佢成個sales team 把握左呢個創業機會集體請辭,佢就大大鑊!)

ah-yun 說...

Elvis:
我係見黑人叔叔好似有點餓﹐睇下佢係咪轉移了目標。你唔好誤會我。

(叔叔唔好打我。)

黑人 說...

> 雲妹子

大鑊!俾你咁講講下,我近年好似又真係無乜心情追女仔喎!係咪餓得太耐,變左質?點算!

渣估 說...

黑人兄:

呢篇精彩到爆!

渣估廿零歲時, 亦因想搵多d 錢而玩過 MLM, 傳統的、雙軌的都玩過。

好遺憾, 破財之餘亦令到好多「兄弟姐妹」損手。

接著幾年, 渣估對呢班「短命下線」(八位"咁多")特別內疚, 仲周不時請佢地食飯飲野, 幾年來都償還唔番。

下線加入, 只因為投本人信心一票。傳銷幾近撈偏門, 後生仔可免則免。

黑人兄係自僱人士嗎? Self-employed 多勞多得。 努力d, 你講既「十萬月薪」並唔係好高既目標, 做自己中意既事, 有熱誠, 鑽研一下 marketing, 滿意既客戶就係你最好既「公爵/候爵」salesmen, 最好加少少運氣啦!

互勉之!

(31.5.2008)

C.M. 說...

嘩!正!

十足十警訊加長版!

匿名 說...

我之前上過去另一間傳銷公司~係俾朋友呃上去的,最後俾左幾千蚊拎左d貨先甩到身,因為俾成班人圍住......走左之後即打電話叫我朋友第二日去退貨,因為7日內可退未用過未開過的貨(健康食品)~ 點知我朋友話, 佢收貨時d人話幫佢check貨,開鬼晒佢d貨...&(*$^#&^ 好cheap啊. 於是我自己一個上去退貨 + 退會. 有個自稱係香港前職業足球員圍左我半個鐘,問我點解要退, 我話我要去外國讀書,唔會再返黎香港,所以要咁多貨無用。我對住個應該係做左無耐既男仔扮可憐(點解話佢似做左無耐,因為佢面上有種同情既表情,睇黎佢問財仔借唔少),佢真係同我辦退會. 之後去銀行gum返d錢俾我。佢俾錢我o個下,感覺到佢好肉痛......anyway...我覺得自己好好彩...走得快

匿名 說...

HI
我都係第一次黎你呢度睇
其實上網都睇過好多傳銷D衰野
我都好好彩冇中過招
其實睇完你D文
我反而覺得傳銷班人D sale skill非常純熟,因為齊睇你打既都覺得佢地好有說服力,意志弱D都死硬.老老實實,對於香港呢個marketing主導既世界,只要有佢地呢種sale skill 做咩都唔會死
而家搞到我都想上去體驗下添

匿名 說...

我超欣賞你
我冇中過招,但上過3次
你夠膽俾錢去驗證!
當年我3次都係用冇錢,冇card先走得甩,話第2日俾,仲叫我簽野,彩佢都傻
我話聽日先,磨能左我3粒鐘先走得

成世日最能憎傳銷,賺到錢又點,乞九人憎
上去爛泥咁,吹你唔漲既

匿名 說...

黑人你會唔會繼續寫?
上完兩堂就冇得玩?

匿名 說...

寫得真係無得彈!多謝你!

其實我係一個充滿好奇心既高中生,但係數碼皇冠的衰野真係聽得太多,唔想落搭,岩岩仲有個舊同學想推我去決志添,但我無跟佢上去。

你都講過上面的環境好容易令人態度軟化丫,如果真係想上去探險完全身而退,有無咩野要準備? 

唔該晒你 =P

黑人 說...

謝謝大家的鼓勵...

其實我當初是無聊兼好奇才上去
仲有少少後續,過幾日有時間再寫埋佢

匿名 說...

網主哥哥 : 我佩服你既膽色同毅力同埋堅定既意志!!

匿名 說...

有個好好朋友已經俾佢地班人扼左,可以點做呀?

Sam 說...

This is ridiculous. Thanks for this informative post on SCAMS!!!!!

Unknown 說...

我有中學同學投資左幾十萬,吾知佢宜家後吾後悔呢?呢d十個都吾知有冇一個揾到食,好心d人清醒d啦,真係當左自己是馬雲,講埋d天馬行空、虚目飄渺嘅嘢,早d瞓啦,發埋d春秋大夢