星期五, 1月 02, 2009

大敗家

零八年黑人沖太歲,黑星高照,做乜都衰過人。

之但係,黑星都好睇住黑人,破財劫儘量揀d唔等駛既野壞,所以desktop只係壞左三次,laptop 燒左兩次,手機壞一次。最後黑星見黑人一貧如洗,都諗唔到有咩可以再搞壞佢。

可惜上頭催quota,黑星思前想後,最後揀中左黑人對波鞋。

於是,黑人其中一隻波鞋,著唔夠一年某日無啦啦爛左個底。

波鞋爛底,一直都懶換照出去見客見朋友,不過會有意識地將爛底果邊踩住。直至聖誕抖左幾日,回過神,終於意識到自己對鞋要換(查實褲都著到就來穿)。

記得在廣告前輩梁伯處見到佢對nike 可以跟ipod 連線計步速計距離etc,於是心痕想去買。

把心一橫,將戶口d 生果金同綜援提晒出來,血拼去也。

跟售貨員理論多時,黑人呼天搶地,控訴蘋果(nasdaq: AAPL)壓榨弱勢社群,點解ipod shuffle (HKd$377)無得兼容nike 計步器(HKD$220),一定要ipod nano(HKD$1150+HKD$220)先至做到?

剛俾完錢,售貨員再送來溫馨提示:「先生你諗住練跑既可?跟機果個headset呢,跑跑下好易跌出黎,建議你買過個扣住耳仔既(HKD$220)...」

(@#$%$^$&)

跟住去Giga sports...

「先生,唔好意思,你睇中果幾款ipod專用鞋,你個碼剛好賣斷...」

「下?我個碼響北美好普通咋喎。」

「先生,不如你移民去果度買啦。」(這兩句為設計對白)

於是,洗左千幾蚊,都仲未可以買到波鞋解決原有的問題,而且仲要過兩三日再駛多七八舊水先得,為左宣洩心頭的鬱悶,走左去pageone 掃左兩本Seth Godin的書,一本long tail,一本村上春村講跑步的新作,臨行前醒起應承左支持空姐e,遍尋不果,但係見到佢飛火星果位同事本新書,埋單找數六舊水。

寫到呢度,突然醒起我買果對波鞋係出街用,跟ipod 計步器compatible 有鬼用...

(黑星哥哥,呢招破財劫高章丫)

3 則留言:

匿名 說...

原來飛火星果位你都有睇?
空姐e本書周圍都有得賣喎!

sze

黑人 說...

我去果間pageone 無呀陰公

匿名 說...

商務大把,買本比你當新年禮物...XD

新年快樂呀!
(你都快D祝我新年快樂,心想事成,順順利利,財源廣進啦,財色X收啦!)

SZE