星期四, 1月 01, 2009

新年三合一

倒數節目

祝大家2009年保住份工、夠錢找卡數、做牛做馬都有少少時間做返個人。

黑人新年不是特別快樂,也沒有不快樂,同樣推掉了所有派對,自己窩在家放空腦袋。

倒數前幾小時MSN也關掉,因為上面有大量鬱悶寂寞的人,自問不想編故事說自己也很鬱悶,也不想重覆解釋為甚麼不想去party 而並非無得去party諸如此類。

放工時份甚至有位朋友在MSN審犯般質問黑人為何除夕沒節目 (但又不是邀請你去佢的party喎,純粹講完you should 乜乜柒柒之後就offline,問來做乜?)

今年很奇怪,突然一下子不恨去蒲、不恨無女朋友、不怕電話完全沒有響、不須找朋友訴苦或者找些節目証明自己一個人過佳節也很好。總之一想到交際應酬,就有種莫名的疲累感。

正如富中國特色的選舉,黑人去LKF之前通常可以預知結果:一班人悶在一起想法子講些懶有趣的話題,沒有勁歌熱舞辣妹或下半場,悶到undingable 時間又不早了就借d意走人。

埋單結帳飲了三兩杯好貴又不是特別好飲的東西,坐的士趕回家(或者等勁耐通宵巴),次日溫溫鄧鄧,一次過浪費幾百元加兩天人生,完全不划算。

派對動物在燈紅酒綠的場合已經natural high,黑人落機舖打機都有類似的感覺。只不過兩種人互調卻是慘劇:黑人在老蘭一邊講爛gag一邊悶到抽筋,派對動物一邊迴避Rx-78的雷射槍同樣悶到抽筋。

凱撒的歸凱撒,上帝的歸上帝,蒲精和電車男最好各從其所,阿門。

*******

新年大計

幾日假期其實最適合靜下來,計劃來年人生大計,因為年紀大左玩乜都好快悶。

中國人是言語巨人行動侏儒,而男人大隻講的傾向特別嚴重,中年人再死多兩錢,黑人作為一個中國男人30年,相當明白箇中奧妙。

不知看倌有否類似經驗,以前的年度目標通常很空泛如:「練大隻d」或「讀好d書」、「學html」、「學日文」、「不做電車男做型男」...歲晚盤點自己知咩事。

上述的大綱,只能令自己感覺良好,實際上是執行不了的中藥科技港,要真正實踐目標就不能務虛。

例如「練大隻d」,到底想有幾大隻?練來為乜?

哦,原來練完想追女仔,近期d女最buy邊個大隻佬呢?哦,黃德斌。要練到黃德斌的身形,要有甚麼條件呢?上yahoo知識查查「六舊腹肌」,大隻佬B回答說:六舊腹肌沒有散賣,要全個人地操fit,想由功夫熊貓變黃德斌,需每星期做x組練習,為期y年。

然後再看看自己每星期的schedule,到底有無辦法附合上述條件,並設計一個可以執行的訓練計劃,不用咬著牙齦一放工就催谷(咬足一年牙齦會牙周病的,咪玩啦師兄),重點是能夠舒適地持續進行,這才是務實的年度目標。

如無法付出上述的時間心力,就不要妄想做黃德斌了,想法子以功夫熊貓的身段吸引女孩子吧!

*******

淑女指標

無啦啦被Elvis擺上台,當然想擺返佢上台,大家好兄弟平起平坐才合理。

寫左咁多野開始唔夠 ram,諗唔到位入佢,算。

只不過,Elvis個淑女指標唔準既,得閒可以去消委會告佢。

話說空姐e和非洲a小姐一聚,兩位仁姐前世根本撈亂骨頭,自己無啦啦已經可以笑一餐,黑人的出現,純粹只係令佢地多一個藉口發神經。可惜吾友Elvis在象牙塔太久,身邊儘是有紋有路有識之士,突然見到兩個傻到hihi 的女人,一時間無法理出個頭緒 (唔make sense是也),人腦天生構造難以接受唔make sense之事物,勉強找個理由解釋,唯有將黑人扯落水了。

一不離二,後來Elvis再邀請黑人測試另外兩位女性朋友的淑女指數,頭一局在小肥羊進行,某m完全不及格,完全沒有淑女應有的含蓄,黑人倒想起陶傑講過的另一個版本:一個含,一個抽搐。事關黑人含住粒青豆,對面無啦啦都會笑到抽筋,最後嚴重到要躲在Elvis身後避免見到黑人任何舉動。

第二場落LKF,對象是某知名女(前)博客c小姐。黑人第一個感覺是:凌波麗來了。

c小姐以冷艷博學見稱,當晚飲了幾杯,流竄在霓紅燈和爛gag之間,臉上正是凌波麗那種faraway look。

不巧,話題碰觸到新世紀福音戰士,凌波麗的眼神才活過來。

於是,大家熱烈地向三點小姐進行information bombardment,解釋新世紀是一套如何高深富哲理的後現代動畫。

黑人懶醒地出手拯救越來越迷惘的三點:「拿,新世紀個大綱就係有13隻怪獸打3個機械人,怪獸逐隻出,每次有2-3個機械人打一隻怪獸,打到最後機械人輸左。」

噢雪,經黑人一輪搶白,凌波麗無癮地行開走去傾SMS。

照計,c小姐應該符合淑女指標對吧?但有睇過佢個blog或面書的朋友,不難見到類似的句子:「挑那星,你無L野下嘛?咩L野淑女?」

9 則留言:

小瓶子 說...

倒數節目 : 显示你可能年纪开始大了, 年青的时候是无无谓谓的party都会去一番.

匿名 說...

其實我比較想知怎樣才是「淑女」?

看見你,又不笑就是嗎?
為什麼看見你不笑就是淑女?

匿名 說...

事關黑人含住粒青豆,對面無啦啦都會笑到抽筋,最後嚴重到要躲在Elvis身後避免見到黑人任何舉動。

有無咁誇張呀又...

唔係,你一定係做左d咩黎既...

sze

小瓶子 說...

含住粒青豆<----是否隐含了某些意思, 不能从字面解释?

匿名 說...

都話有睇你啦,又唔信。唔洗窒得咁應吓嘛。
text sex好緊要㗎嘛 =p

黑人 說...

> 小瓶子

係呀,未老先衰,無計。
我真係食青豆佢都可以笑一餐果下厲害

> 匿名一號
我都唔知,個指標係elvis 9up出來
你不如問返有關部門啦,我只係跟足程序証明佢個講法唔work 而已

> sze

真係無做野果下先至驚

> 匿名二號

原來果晚神交中,唔怪得果頭交完呢頭對住我地就on交交啦...

ryo 說...

haha... love this post...

"undingable" -- what a good description..

happy new yr..

Yun 說...

我唔明既係﹐點解拉埋我落水既呢﹖

新年快樂呀! ^^

黑人 說...

> ryo

thanks! happy new yr to you too!

> 蜜雲妹子

係囉,我都唔明,可能elvis 想有多d公信力掛!新年快樂呀 ~