星期一, 1月 05, 2009

立法原意

(空想聖經教室mode)

亞當夏娃未吃果之前,係三點畢露條條fing架喎!本來佢地吃喝拉睡日日大戰三百回,在上帝眼中係無問題的,直至佢地識得分辨善惡又擁有無限壽命,上帝先至叫停。

如果無分辨善惡能力,可能阿當殺左夏娃都無乜問題。

「老豆!夏娃被我吉到唔識郁了,點算?」
「哦,整過件啦咁。今次呢件叫Mary,得唔得手?」
「索!我吉!」

既然人類墜落關鍵係因為懂得「分辨善惡」,咁我地一直以來的「導人向善」會否多9餘呢?
可能「善惡不分」才是再度取得Club Eden入場券的條件。

若真的如此,香港距離天國再臨日子必不遠矣,盲光社比其他組織又再接近天堂多一步。

(/空想聖經教室mode)

**********

工作緣故,天主教講的仁義道德背後原意,黑人略猜到一二。

天主教重點係「家庭」,社會由無數家庭構成,家和萬事興,每一個家庭都是社會核心。

家庭由人組成,因此天主教極著重個人及家庭培育。

天主教會反對性行「商品化」,因為不利男女成立健康的家庭。(咁蒲精或者S男M女又真係幾難成家立室生兒育女既...)

天主教反對同性戀,估計背後原因相同,人人斷背山,邊有阿媽生?

從呢個方針推想,其實天主教仁義道德背後有明確而且實際的理由,並非洪水猛獸。只不過執行到某一個位,就走晒樣。

再加上現在的傳媒鍾意斷章取義甚至憑空老作,任何事都被逼扭曲到二元對立。睇咸網就道德淪亡,打機就讀唔成書 etc。以前有個幾好的二元對立例子:你係消防員,宜家俾你揀,一係救火,一係救人,你揀邊樣?

(係喎...救火定救人好呢?)
(拿,救火就燒死晒d人,救人就燒死d火,你揀啦!)
(死啦...救火定救人好呢...點揀呀?有無model answer?)

如果天主教甚至耶教以「培養健康家庭」為主題,好多野可以理性對話,唔駛下下打餐死。

好可惜現時香港的民智及傳媒生態不容許大家咁做。A1 黃徫文出櫃,陳日君怒斥有天譴 (A20吳敏倫博士呼籲理性討論同性戀問題)

另一樣野,就係耶教的PR麻麻地,大家淨係見到佢地反乜反物,好少人知道佢地背後有咩理由。而唔少半桶水的耶教拉登,嗌完口號示完威,都未必知道自己搞場大龍鳳真正為左乜。

要「打造」好家庭,話題亦不須針死色情一味,查實日日開OT做到性無能,又何來健康和諧好家庭?又唔見d聖徒剷下d無良腦細?

8 則留言:

ah-yun 說...

咩事啊~~~ 近來咁得閒寫咁多野既!!!!

Betty 說...

不相信圣诞经, 吃一个苹果就要离开Club Eden, 那么「一日一苹果, 医生远离我」应该改为「一日一苹果, 上帝远离我」.

塞米一條揚陸轟炸機 說...

一個社會將"建立家庭"的方式只集中於配偶的成份,即係一元性地將家庭生活同性生活完全劃上等號。如果"好家庭"的定義單純地是一男一女開始的話,那麼單親家庭怎麼辦? 基督教教會往往又將教會單位的弟兄姊妹關係形容成一個"家庭",咁即係點先?即係嚮教會係一個群交團體???

一班人反對色情文化,卻自己先入為主地將所有世事都用下半身思考,諷刺到極點。天主教還好,所有立論的原點都專一從聖經出發,起碼原宗原旨代表宗教角度表態。你睇下盲光社影音使團之流?日日用埋晒d偽科學扮權威,刻意誘導愚弄大眾猶屬等閒,假借科學根據將宗教立場泛道德化強行包裝才天怒人怨。

作為一個基督徒我唔打算更正黑人對耶教的statements喇,更何況家陣成灘野明顯係一班偽道德膠自己走上高地借刀殺人,擺返個真理出黎都無補於事。

說...

宗教其實就係叫人無條件地「信」,根本就係要你放低理性,所以以邏輯推理去指出佢地背後意義,對於好多「教中人」泥講,係冇意義...

笑聽 說...

耶教拉登... 一語中的!
唉,查實我都好心痛,教會中既反智洪流有時好難抵擋,三言兩語又好難解釋。

方潤 說...

> 要「打造」好家庭,話題亦不須針死色情一味,查實日日開OT做到性無能,又何來健康和諧好家庭?又唔見d聖徒剷下d無良腦細?

其實天主教有咁做,佢地有個乜鬼「正義和平委員會」,批評香港工資太低工時太長會破壞家庭。(地鐵都有廣告)

基督教都有類似活動,不過唔係主流,亦唔見有大教會出面支持。

方潤 說...

應該話,基督教既主要問題,係有班友「挾聖經以令教徒」,用宗教問題做幌子,騎劫了教會群體,令所有人都以為他們代表全體教徒,藉以推行他們喜歡的一套政策。

方潤 說...

應該話,基督教既主要問題,係有班友「挾聖經以令教徒」,用宗教問題做幌子,騎劫了教會群體,令所有人都以為他們代表全體教徒,藉以推行他們喜歡的一套政策。