劈炮

近來跟一單網頁project，要為客人建立一個網頁更新系統，行內簡稱CMS (Content Management System)。因為客人本身需要經常update網頁 (不可能每次搵我)。佢電腦水平不高，word 和excel 已是極限，故此更新系統不能複雜。

跟一個新的programmer 合作，以前短暫做過一陣同事，醞釀合作已久。佢技術無問題，自己跟老婆出來搞公司，又剛身為人父，黑人憑上述因素覺得佢可靠，嘗試合作。

合作不久就出事了，原來他又要做自己野，又要湊BB，經常都很忙，第一節的工作無法完成。最尾要抽回另外判給別人做。本身這是沒問題的，太忙，早些講就可以，我會儘量安排。

第二節工作就開始有些態度上的問題浮現，事緣黑人將客戶的server 資料交給佢處理，好耐都無進展。佢要陪BB睇醫生又要跟自己的job，所以客人打來查詢，黑人都用不同的理由擋左好幾次，隔一輪也打去問進度如何都話好忙。拖了差不多三個星期，才跟我講密碼不正確，資料不齊，所以「無password我做唔到野」大佬，我不斷同個客講「做緊做緊」又問左好幾次「有咩資料唔齊？」，宜家先話login 唔到，想撐你都難啦！

面懞懞擺平了第二節，第三期涉及真正建構CMS 工作，第一轉睇 beta，佢聲稱好多功能未整好會慢慢加上去，黑人望上去感覺良好大致無事，就繼續去馬。

本來以為上星期可以完工收錢，但走上去做校對，發現錯漏時好多野都改唔到，而且界面過份簡單，操作卻極繁複，做錯少少野即場睇唔到又無得翻轉頭。一個自動化更新系統變成要人手寫code 解決，咁同我叫個客自己寫一個網有乜分別？

佢話除左重寫之外無辦法，跟住賴黑人第一節搵人做的東西有問題、睇辦時無反對，宜家先至話有問題唔o岩規舉...etc。繼而話要加錢，並且要收尾數的一半才肯做。

本來不想節外生枝，加錢都俾你，總之快快手擺平件事就算。但係又要再收deposit就真係唔得。過海就是神仙，姑且假設佢不會一收錢就走佬，但若果再有問題，佢可能會覺得錢都收得七七八八，剩低d 蘇州c 閣下自理，到時人財兩空，想再搵人補鑊就難。

然後，呢位哥仔就彈左個好長的msn，指大家本來是合作關係，但黑人當佢伙記咁使，而且不斷改野唔知幾時改完etc，所以劈炮, sorry for the rash decision etc etc

回想初初出黎做，都會覺得d 客成日想整蠱自己，後來見識過兩個唔多務實的老細，自己又試過做客，就無咁易發脾氣。

打電話跟supplier deal 其實都辛苦，逐版web page校對寫revision /debug list，試過就知奄悶到想死，仲要安撫supplier 情緒哄佢做野，各有難處。

大哥，大家都係想快d收錢完事，邊得閒扮老細同你拖長黎做呢？

*******

輾轉得知兩位朋友一個意外成孕被逼墜胎，另一個的男友不忠卻情絲未斷，很可惜幫不上甚麼忙，只好祝你們早日脫離低谷轉運。