Creativity

昨日遇到一個自稱美國企業客人問價，出手很低，但介紹人告知對方要求和工作量不高，計過條數仲有得執，姑且試試。

第一次電話來往，對面也是個年輕人，間中會夾雜一兩句ABC口音的英文，雖然出手低，但又要求設計公司有水平，一開始已經起晒鋼。

黑人為了交戲，就跟他扮一回ABC，間中拋一兩句很無謂的英文，例如「網站設計不能夠跟你公司一貫型像相差太遠」變成「成個design 唔可以同你個brand image deviate 得太遠」(英文及廣東話均以竹昇口音讀)。

只要有少少常識，都唔會諗住咁少錢真係有個brand consultant 同你吹水吧？我只係將串魚蛋放在塑膠日本料理碟上，睇落好似貴格d。滿足左佢的自尊心後例行公事出報價單，個客雖則有「美國總部」，但係無香港聯絡地址。算啦，可能真係剛開張，乜都未有完全唔奇。

點知條蛋散隔一陣又打來，話我可唔可以順手幫佢logo 轉下d色，用creativity 幫佢個logo 做modification，同埋想第一轉睇下d effect 夠唔夠creative，一聽完就覺得好唔掂，我仲以為假大空只限於大陸，原來英文人一樣有，只不過轉做英文，件事好聽左。就好似我係胡主席，突然興起：「我陣間想同Taiwan做unification，俾個lead time我，要快。」下面d人聽到嚇死都似。

錢少的project唔係未做過，大前提係對方都要有個合理預期知道自己俾咁少錢會有d 乜野貨色，大家都要搵食，freelancer 的成本就是時間，錢少就自然不會花太多時間做太複雜的東西。最驚成日用creativity 來撻人，潛台詞就係「出左咩事都係因為你唔夠creative」。

越傾越唔對路，黑人就借d意將個價提升兩倍幾趕佢走。

好多時，creative並不一定需要好多特效，只要言之有物便可：
http://www.tuckshopfilms.com