聞到血腥味...

隔離blog 打大交，搞到blog主要出擂台叫陣，寫blog寫到咁，真係唔多開心。

寫blog都預左會有人上來批評。有時合理，有時純粹無理取鬧，作為旁觀者，當然知道呢d 事無日無之，無需上心。不過作為當事人，俾人踩上自己地盤踢竇，好難當無事。

要杜絕呢類hate mail，一係就用意見管理，批過才出街，又或者斬趾避沙蟲鎖blog。但係寫得blog大多數都想有人睇，後者並不是解決辦法。訪客寫comment 都希望較快見到回應，要網主事事審批，又可能減低留言意欲。

第三條出路，就係將blog變成另一種隱惡揚善，又或者只談風月。因為作者無法知道另一端的讀者是何方神聖，萬一是自己客戶、配偶甚至子女，見到不該見之事物，認真大鑊。

亦有功力較深的blogger 可以利用假人寫真事，甚至完全坦蕩蕩寫真人真事，至今都是極少數。

將自己生活幾近鉅細無遺地紀錄那位，黑人一直都很佩服的，因為他一直很詳細地講自己的工作進度、所見所聞等等，甚至投資組合都會詳列。但世人喜歡壞消息，賺錢no comment，跌市時就會有人講「喂呀股神，身家蒸發左幾多呀？嘿嘿！」

要數年如一不怕這些冷嘲熱諷，需要頗高EQ。

自問沒那種精神素質，唯有少寫少觸雷。

*****

公司附近新開一間三聯，黑人以前返工每朝都會走去機舖看學生們打機，看一兩局過乾癮，現在多了間書店，看新書較方便。

昨日買了東尼十大投資心法和Richard Branson傳記。本來還想買the world is flat，不過怕自己哽不完，看完這兩本再算。