回應就是新post

將桌面角色扮演遊戲變成一門活動，先天所限，這門玩意永遠不會是主流，只會變成niche，大極有限，死又死唔去之流。在blog吹水証明條橋得唔得，係無結論的，尤其大家無數渣手，得個吹字。

玩TRPG性質跟選特首差不多，主持預先寫好劇本及結局(當然有走棧位)，讓玩家自以為推動劇情，實不離預計之內。

以我自己跟陌生人玩game的經驗，好少遇到完全沉默既參加者。再沉默都有辦法令佢respond及interact，例如要佢介紹自己個角色(不是介紹佢自己)，有怪獸來襲要還擊，或者有一些佢個角色才可以solve的難題等等，我印象中，因為係role play另一個人，不用擺自己上台，通常好快就會玩得比較放。

至於有無女仔玩，我都認為係有的，當然要視符題材及包裝。urban legend一向是萬靈丹，例如電台節目聽到女人嚎哭聲，之後主持接二連三死去，玩家們是電台職員、警探及大學靈異學會組員 (或可加插宗教人士，視符參加者宗教背景)。

近年不拒抗暴力題材的女生漸多，只要增強故事性，減少機械性的戰鬥操作，同樣可以吸引女性入場，尤其見到女仔玩razing storm同埋gundam時，我更加覺得只要節奏控制得宜，女仔係會落場玩的。

香港人信名人endorsement多於一切，如搵到網絡電台DJ介紹甚至示範，已經自動扯到一班人來玩。問題不在乎搵到幾多人來試玩，搞些許噱頭多多都有，如何培育好主持才是難關，因為遊戲是否好玩，極大程度在乎主持人口才及急才。

反而，諗諗下，想培育遊戲主持人，應該走去編劇興趣班果邊埋手...